သျှမ်းပြည် ဆီဆိုင်မြို့နယ် တိုက်ပွဲအတွင်း စစ်ကောာင်စီတပ်ဖွဲ့နှင့်အတူ ပူးတွဲတိုက်ခိုက်နေလျက်ရှိသော ပအိုဝ်းပြည်သူ့စစ်များအနေဖြင့် စစ်အာဏာရှင်လက်အောက်မှ ရုန်းထွက်ပြီး အမျိုးသားလွတ်မြောက်ရေး လမ်းကြောင်းပေါ်သို့ အမြန်ဆုံးကူးပြောင်းကြရန် PNLAမှ ယနေ့ (ဇန်နဝါရီလ ၂၉ ရက်)၌ တောင်းဆိုလိုက်သည်။
ယမန်နေ့ (ဇန်နဝါရီလ ၂၈ ရက်)တွင် စစ်ကောင်စီနှင့် စစ်ကောင်စီလက်အောက်ခံ ပြည်သူ့စစ်အဖွဲ့ PNO တို့သည် လုံခြုံရေးဆိုင်ရာလှုပ်ရှားမှုကိုဆောင်ရွက်နေသည့် PNLA စစ်ကြောင်းကို ချောင်းမြောင်း ပစ်ခတ်ရန် စောင့်ဆိုင်းနေကြောင်း သတင်းရသဖြင့် ဝိုင်းဝန်းပိတ်ဆို့ဖမ်းဆီးရာ စစ်ကောင်စီတပ်သားနှင့် လက်အောက်ခံ ပြည်သူ့စစ် ၃ ဦးကို ဖမ်းဆီးရမိခဲ့ကြောင်း ရေးသားဖော်ပြထားသည်။
ယင်းဖမ်းဆီးမှုအတွင်း M22 သေနတ် ( ၁) လက်၊ ယာမမူးယစ်ဆေး အထုပ်ကြီး (၁) ထုပ် နှင့် ကျည်ဆံများကို သိမ်းဆည်းရမိခဲ့ပြီး ပအိုဝ်းအချင်းချင်း တိုက်ခိုက်မည်မဟုတ်သည့်အတွက် ဖမ်းဆီးရမိသည့် ပြည်သူ့စစ်များကို အသက်ရှင်ခွင့်ပေးမည်ဟု ဆိုသည်။
အလားတူ ယနေ့ (ဇန်နဝါရီလ ၂၉ ရက်)တွင် ဆီဆိုင်မြို့နယ်အတွင်း ပြည်သူပိုင်ပစ္စည်းများကို လိုက်လံခိုးယူနေသည့် သူခိုး ၃ ကိုလည်း ဖမ်ဆီးရမိခဲ့ပြီး ဥပဒေအတိုင်း အရေးယူမှု ဆောက်ရွက်ခဲ့ကြောင်း အဆိုပါထုတ်ပြန်ချက်၌ ရေးသားဖော်ပြထားသည်။
ထို့အပြင် စစ်ကောင်စီနှင့် လက်အောက်ခံ ပြည်သူ့စစ်အဖွဲ့ PNO တို့သည် ဆီဆိုင်မြို့နှင့် ကျေးရွာများကို လက်နက်ကြီး၊ လေယာဉ်များဖြင့် ဗုံးကြဲတိုက်ခိုက်ခြင်း၊ မီးလောင်ဗုံးဖြင့် တိုက်ခိုက်ခြင်းကြောင့် ဆီဆိုင်မြို့အတွင်းရှိ sweet dream ဆိုင်အပါအဝင် ပြည်သူပိုင် အိုးအိမ်စည်းစိမ်များ ယမန်နေ့ (ဇန်နဝရီလ ၂၈ ရက်)က မီးလောင်ပျက်စီးခဲ့သွားကြောင်း ဆိုသည်။
လက်ရှိတွင်လည်း စစ်ကောင်စီနှင့် လက်အောက်ခံ ပြည်သူ့စစ်တပ်ဖွဲ့တို့သည် ဆီဆိုင်မြို့ကို ဗုံးကြဲတိုက်ခိုက်ခြင်း၊ လက်နက်ကြီးဖြင့် ပစ်ခတ်တိုက်ခိုက်ခြင်းတို့ကြောင့် မြို့တွင်းအခြေအနေသည် လုံခြုံမှုအားနည်းနေဆဲကြောင်း ထည့်သွင်းပြောဆိုထားသည်။
ထို့ကြောင့် မိဘပြည်သူများအနေဖြင့် မလိုလားသည့်ထိခိုက်မှုများမဖြစ်စေရန် ဆီဆိုင်မြို့အတွင်းသို့ ဝင်ရောက်ခြင်း၊ နေအိမ်ပြန်ကြည့်ခြင့်း၊ ပစ္စည်းများပြန်သယ်ခြင်းများ မပြုလုပ်ကြသေးရန် နှင့် လုံခြုံဘေးကင်းသည့် နေရာများတွင် ခေတ္တခိုလှုံနေထိုင်ကြရန် PNLA မှတိုက်တွန်းထားသည်။
