Friday, June 14, 2024

ဖယ်ခုံတွင် စစ်ကောင်စီ စစ်ကြောင်းထိုးခြင်းကြောင့် တစ်ပတ်အတွင်း အရပ်သား ၅ ဦးသတ်ဖြတ်ခံရ

Must read

သျှမ်း-ကရင်နီ (ကယား) ပြည်နယ်စပ် သျှမ်းပြည်တောင်ပိုင်း ဖယ်ခုံမြို့နယ်တွင် စစ်ကောင်စီ စစ်ကြောင်းထိုးခြင်းကြောင့် တစ်ပတ်အတွင်း အရပ်သား ၅ ဦးသတ်ဖြတ်ခံလိုက်ရကြောင်း စုံစမ်းသိရသည်။

ကရင်နီတော်လှန်ရေး အင်အားစုတပ်ဖွဲ့များ ထိန်းချုပ်ထားသည့် ဖယ်ခုံမြို့ကို စစ်ကောင်စီက ပြန်လည် ထိန်းချုပ်နိုင်ရန်အတွက် စစ်ကြောင်းထိုးစစ်ဆင်ရာ ဧပြီလ ၂၁ ရက်က ဖယ်ခုံအနောက်ဖက်ခြမ်းရှိ တောင်တွင်းတစ်နေရာတွင် စစ်ရှောင်နေကြသည့် အသက် ၃၃ နှစ် မောင်နဲ၊ အသက် ၃၆ နှစ် ကိုမားကို့နှင့် ၎င်း၏ဇနီး အသက် (၃၇) နှစ် မမူ့ဆကော်လာတို့ကို သတ်ဖြတ်သွားခဲ့ကြောင်း တော်လှန်ရေးတပ်ဖွဲ့များက ပြောသည်။

အလားတူ ဧပြီလ ၂၃ ရက်တွင်လည်း ဖယ်ခုံမြို့နယ် ဟိန္ဓမရပ်ကွက်တွင်နေထိုင်သူ ကိုမျိုး နှင့် ၎င်း၏ ဇနီး မရှိ တို့သည် တောင်ယာမှ ပြန်လာစဥ် စစ်ကောင်စီ စစ်ကြောင်းနှင့်တိုး၍ လင်မယားနှစ်ဦးစလုံး ပစ်သတ်ခံခဲ့ရသည်ဟု ဆိုသည်။

“ဟုတ်ပါတယ်။ မိုးဗြဲဘက်ကနေ စစ်ကူလာတဲ့ စစ်ကောင်စီ စစ်ကြောင်းက စစ်ရှောင်ပြည်သူ ၅ ဦးကို ဖမ်းဆီးသတ်ဖြတ်ခဲ့တာ ဒီရက်ပိုင်းမှာရှိပါတယ်။ စစ်ကြောင်းထိုးရင်း လမ်းပေါ်မှာတွေ့တယ်၊ ပြီးတော့ ဖမ်းဆီးခေါ်ဆောင်သွားတယ်။ ပြီးတော့ရက်ရက်စက်စက် နှိပ်စက်ပြီးတော့ ပစ်သတ်လိုက်တာပါ။ အားလုံးပေါင်း ၅ ဦးရှိပါတယ်” ဟု KNDF ဗဟိုပြန်ကြားရေးတာဝန်ရှိသူတစ်ဦးဖြစ်သည့် တာအယ်စိုးကက သျှမ်းသံတော်ဆင့်ကိုပြောသည်။

သတ်ဖြတ်ခံရသူ မောင်နဲမှာ ဇနီးနှင့် ကလေး ၃ ယောက်ကျန်ရစ်ပြီး လင်မယားဖြစ်သူ ကိုမားကို့နှင့် မမူ့ဆကော်လာတို့မှာ ကလေး ၄ ယောက်ကျန်ရစ်ခဲ့ကြောင်း၊ လင်မယားဖြစ်သူ ကိုမျိုးနှင့် မရှိတို့မှာ ကလေး ၃ ယောက်ကျန်ရစ်ခဲ့ကြောင်း သိရသည်။

ယင်းကဲ့သို့ ပြည်သူအပေါ် ရက်ရက်စက်စက် သတ်ဖြတ်သွားသည့် စစ်ကောင်စီများ၏ လုပ်ရပ်နှင့်ပတ်သက်၍ တာအယ်စိုးက ယခုလိုဆက်ပြောသည်။

“အဓိကတော့ သူတို့စစ်ကြောင်းထိုးလာတဲ့ဟာကို မြင်တွေ့သွားတဲ့ စစ်ရှောင်၊ ပြည်သူတွေကိုသာ လက်စဖြောက်တာဖြစ်တယ်။ သူတို့စစ်ရေးအသာစီးရဖို့အတွက် ဘာကျင့်ဝတ်မှမရှိဘူး။ စစ်သည်တော် ကျင့်ဝတ်လည်းမရှိဘူး။ နိုင်ငံတကာ ဥပဒေလည်း ဂရုမစိုက်ဘူးဆိုတဲ့ပုံစံမျိုးနဲ့ ဖမ်းဆီးသတ်ဖြတ်လိုက်တာ ဖြစ်ပါတယ်။ သူတို့တွေက လူသားမဆန်ဘူး၊ လူစိတ်မရှိဘူး” ဟု ၎င်းကထပ်လောင်းပြောဆိုထားသည်။

ပြီးခဲ့သည့် ဧပြီလ ၁၁ ရက်တွင်လည်း ဖယ်ခုံမြို့နယ် အနောက်ဖက်ခြမ်းရှိ ပီကင်းရွာနှင့် လွယ်ကင်းရွာကို စစ်ကောင်စီက ပေါင် ၅၀၀ ဗုံးကြဲခြင်းကြောင့် အသက် ၃ နှစ် ကလေးငယ် ၁ ဦး၊ အသက် ၁၂ နှစ် မိန်းကလေး ၁ ဦးနှင့် အသက် ၆၅ နှစ်အရွယ် အမျိုးသမီး ၁ ဦးသေဆုံးပြီး ထိခိုက်ဒဏ်ရာရသူ ၅ ဦးရှိခဲ့သည်။

လက်ရှိတွင် သျှမ်း-ကရင်နီ (ကယား) ပြည်နယ်စပ်ဒေသဖြစ်သည့် ဖယ်ခုံမြို့နယ်နှင့် မိုးဗြဲမြို့တွင် စစ်ကောင်စီတပ်နှင့် ကရင်နီပူးပေါင်းတော်လှန် အင်းအားတပ်ဖွဲ့များ တစ်ကျော့ပြန်တိုက်ပွဲဖြစ်ပွားလာရာ ၁ နီးပါးကြာပြီဖြစ်သော်လည်း တိုက်ပွဲဆက်လက်ဖြစ်ပွားနေသေးကြောင်း သိရသည်။

Leave a Comments

- Advertisement -spot_img

Latest article