သျှမ်း-ကရင်နီ (ကယား)ပြည် နယ်စပ် မိုးဗြဲ၊ဖယ်ခုံဘက်တွင် စစ်ကော်မရှင်တပ်က ဒရုန်း၊ လက်နက်ကြီးများဖြင့် နေ့စဉ်နီးပါး တိုက်ခိုက်နေသဖြင့် ဒေသခံများ ထပ်မံ စစ်ဘေးရှောင်နေရကြောင်း သတင်းရရှိသည်။

ပြီးခဲ့သည့် ဇူလိုင်လ တတိယပတ်မှစပြီး မိုးဗြဲ အနောက်ဘက်ခြမ်းကို စစ်ကော်မရှင်တပ်က လက်နက်ကြီး၊ ဒရုန်းအသုံးပြု နေ့စဉ်တိုက်ခိုက်နေသဖြင့် လုပ်လက်စ စိုက်ခင်းများကို ချန်လှပ်ထားပြီး ဒေသခံများ ဘေးလွှတ်ရာသို့ ထပ်ံ စစ်ဘေးတိမ်းရှောင်နေရကြောင်း သိရသည်။

ထို့အပြင် သျှမ်း-ကယားနယ်စပ် ဖယ်ခုံဘက်တွင်လည်း စစ်ကော်မရှင်တပ်နှင့် ပအိုဝ်းပြည်သူ့စစ် (PNO)တို့က အင်အားအလုံးရင်း ဖြည့်တင်း၍ စစ်ကြောင်းထိုးမှုများ မကြာခဏ ပြုလုပ်နေကြောင်း သိရသည်။

“မိုးဗြဲနဲ့ ဖယ်ခုံ တကြောဘက်ဆို စစ်တပ်နဲ့ က စစ်ကြောင်း မသွားတဲ့ ရက်မရှိဘူး၊ စိုက်ခင်းထဲ ရှိနေချိန် လက်နက်ကြီး၊ ဒရုန်းတွေ ထပေါက်ကွဲတာ ဒဏ်ရာ ရတဲ့ သူမရှိလို့ တော်သေးတယ်၊ ညလည်း ပစ်နေတာပဲ စိတ်က မလုံခြုံတော့ ရှိတာ အကုန်ထားခဲ့ပြီး ထွက်ပြေးရတာ၊ အသက်ထက် ဘာမှ အရေးမကြီးဘူး ဆိုပြီး ထားပစ်ခဲ့တာ။”ဟု စစ်ရှောင်လာသူ အမျိုးသမီးတစ်ဦးက ပြောသည်။

ထိုသို့ စစ်ရှောင်ပြေးရာတွင်လည်း ဒေသတွင်း စစ်ကော်မရှင်တပ်ဂိတ်နှင့် PNO ဂိတ်များတွင်လည်း စစ်ဆေးမှုများ တင်းကြပ်ထားကြောင်းနှင့် ငွေကြေးများလည်း တောင်းနေကြောင်း ၎င်းအမျိုးသမီး တစ်ဦးက ပြောသည်။

စစ်ကော်မရှင်တပ်နှင့် PNO ပူးပေါင်းတပ်တို့သည် တော်လှန်ရေးလက်နက်ကိုင်များနှင့် ထိတွေ့တိုက်ပွဲ များလည်း ဖြစ်နေသောကြောင့် စစ်ရေးအခြေနေ ပြင်းထန်လာမည်ကို ဒေသခံများ စိုးရိမ်နေကြသည်။

အလားတူ ပင်လောင်းဘက်တွင်လည်း စစ်ကော်မရှင်တပ်နှင့် PNO တို့က အင်အားများ ဖြည့်တင်းနေပြီး ဖယ်ခုံ-မိုးဗြဲဘက်သို့ စစ်ကြောင်းထိုးနေ၍ စစ်ရေးအခြေနေ တင်းမာနေသောကြောင့် သတိရှိရှိ နေစေလိုကြောင်း ပင်လောင်း ဒေသခံ ခွန်မျိုးက ပြောသည်။

“အဓိကတော့ ဆောင်းပြောင်း၊ နန်းနိမ့် တို့ တောင်စလုံး မြောက်စလုံးဘက်က ပိုသတိထားစေချင်တယ်၊ အဲဘက်ကို နေ့တိုင်းစစ်ကြောင်း သွားတယ်၊ တစ်ခါသွားရင် တစ်ရာလောက်ရှိတယ်၊ အင်အားဖြည့်ရင်လည်း ကား ဆယ်စီးအထိ လူလာချသွားတယ်။စစ်ပွဲတွေ ထပ်မဖြစ်ပါစေနဲ့ ဆုတောင်းနေရတာပေါ့၊ စစ်ဆိုရင် ဘယ်စစ်မှ မကောင်းဘူး ပြည်သူတွေက ပိုနစ်နာရတယ်။”ဟု အဆိုပါ ခွန်မျိုးက ပြောသည်။

ပြီးခဲ့သည့် ( ဇွန်လ ၁၅ ရက်) ည ၁၁ နာရီဝန်းကျင်တွင် မိုးဗြဲမြို့ အရှေ့ခြမ်း ကောင်ဝှက်ကျေးရွာ အနီးကို စစ်ကောင်စီက လေကြောင်းဗုံးကြဲတိုက်ခိုက်ခဲ့ကြောင်း သိရသည်။

မိုးဗြဲမြို့ နှင့် ဖယ်ခုံမြို့ကို စစ်ကော်မရှင်တပ်တို့က ပြန်လည်ထိန်းချုပ်ထားသော်လည်း အုပ်ချုပ်ရေး ယန္တရား လည်ပတ်နိုင်ခြင်း မရှိသည့်အပြင် မြို့အပြင်ရှိ ကျေးရွာအချို့နှင့် စစ်ရေးအရအရေးပါသည့် လမ်းပိုင်းကို ကရင်နီတော်လှန်ရေးတပ်ဖွဲ့တို့က ထိန်းချုပ်ထားသည်။

ထို့ကြောင့် စစ်ကောင်စီတပ်သည် ၎င်းတို့အတွက် အရေးပါသည့် မိုးဗြဲ-ဖယ်ခုံ လမ်းပိုင်းကို အပြည့်အဝ ပြန်လည် ထိန်းချုပ်နိုင်ရန်ဖိအားပေး ထိုးစစ်ဆင်တိုက်ခိုက်မှုများ ပြုလုပ်နေကြောင်း သိရသည်။