မြန်မာနိုင်ငံတဝှမ်း ဖြစ်ပွားနေသည့် ပဋိပက္ခများ၊ စီးပွားရေးပြိုလဲမှုများနှင့် နေရပ်စွန့်ခွာ ထွက်ပြေးရမှုများကြောင့် မြန်မာအမျိုးသမီး ၄၂ ရာခိုင်နှုန်းသည် မည်သည့်ဝင်ငွေမျှ မရှိကြောင်း UNDP နှင့် UN Women တို့၏ ပူးတွဲ အစီရင်ခံစာတွင် ထုတ်ပြန်လိုက်သည်။

ဇူလိုင်လ (၁၃) ရက်တွင် ထုတ်ပြန်ခဲ့သည့် အစီရင်ခံစာအရ မြန်မာနိုင်ငံရှိ အမျိုးသမီး ၄၂ ရာခိုင်နှုန်းသည် ကိုယ်ပိုင်ဝင်ငွေ လုံးဝ မရှိဘဲ ၂၃ ရာခိုင်နှုန်းသာ ဝင်ငွေမရှိသည့် အမျိုးသားများထက် နှစ်ဆနီးပါး မြင့်မားနေကြောင်း လူပေါင်း ၅၄၀၀ ကျော်ကို စစ်တမ်းကောက်ယူထားသည့် “မမျှတသော ဝန်ထုပ်ဝန်ပိုးများ- မြန်မာ့အကြပ်အတည်း စီးပွားရေးအတွင်းရှိ အမျိုးသမီးများ” အစီရင်ခံစာတွင် ဖော်ပြထားသည်။

လုပ်ငန်းခွင် ပြင်ပရှိ အမျိုးသမီး ၁၀ ဦးတွင် ၈ ဦးနီးပါးက အခကြေးငွေ မရသော ပြုစုစောင့်ရှောက်မှုနှင့် အိမ်မှုကိစ္စများအတွက် အမျိုးသားများထက် နေ့စဉ် အချိန်နှစ်ဆ ပိုမိုသုံးစွဲနေရကြောင်း အစီရင်ခံစာတွင် ရေးသားထားသည်။

ထို့ပြင် အလုပ်လုပ်ကိုင်နေသည့် အမျိုးသမီးများသည် အမျိုးသားများ ရရှိသည့် ဝင်ငွေ၏ ၇၉ ရာခိုင်နှုန်းသာ ရရှိကြပြီး အလုပ်လုပ်သည်ဖြစ်စေ၊ မလုပ်သည်ဖြစ်စေ အိမ်တွင်းအလုပ်များနှင့် ပြုစုစောင့်ရှောက်ရေးကဲ့သို့သော အခကြေးငွေမရသည့် ဝန်ထုပ်ဝန်ပိုးများကို အမျိုးသားများထက် နှစ်ဆနီးပါး ပိုမိုထမ်းဆောင်နေရသည်။

ပဋိပက္ခ ပြင်းထန်သော ဒေသများတွင် အမျိုးသားများ၏ အလုပ်အကိုင် ရရှိမှု ၈၂ ရာခိုင်နှုန်း ရှိသော်လည်း အမျိုးသမီးများမှာ ၆၂ ရာခိုင်နှုန်းအထိ ကျဆင်းသွားခြင်းကြောင့် ကွာဟချက်မှာ ၂၀ ရာခိုင်နှုန်းအထိ ရှိနေကြောင်း သုတေသနအရ သိရသည်။

ကယားပြည်နယ်သည် မြန်မာတစ်နိုင်ငံလုံးတွင် ကျား၊ မ အလုပ်အကိုင် ကွာဟချက် အကြီးမားဆုံးဖြစ်ပြီး အမျိုးသမီး ၁၂ ရာခိုင်နှုန်းသာ လုံလောက်စွာ စားသောက်နေရပြီး တစ်နိုင်ငံလုံး အတိုင်းအတာဖြင့် အမျိုးသမီး ထက်ဝက်ကျော်သည် စားနပ်ရိက္ခာ မလုံလောက်မှု ကြုံတွေ့နေရကြောင်း ဆိုသည်။

နေရပ်စွန့်ခွာ ထွက်ပြေးရမှုများကြောင့် ၎င်းဖိအားများသည် ပိုမိုဆိုးရွားလာပြီး မြန်မာနိုင်ငံတွင် နေရပ်စွန့်ခွာ ထွက်ပြေးရသူ ၃.၇ သန်း ရှိသည့်အနက် ထက်ဝက်ကျော်မှာ အမျိုးသမီးနှင့် ကလေးငယ်များ ဖြစ်ကြောင်း UNDP နှင့် UN Women တို့၏ ပူးတွဲ အစီရင်ခံစာတွင် ဖော်ပြထားသည်။