သျှမ်းပြည်တောင်ပိုင်း တောင်ကြီးမြို့နယ်သို့ရောက်ရှိလာသော စစ်ဘေးရှောင်များသည် လျှပ်စစ်မီးရရှိရန် သက်ဆိုင်ရာလူကြီးများထံ ကျပ်သိန်း(၃၀) ပေးနေရကြောင်း သတင်းရရှိသည်။
တောင်ကြီးမြို့နယ် နောင်ကားကျေးရွာ၊ တံတားမီးလောင်ကျေးရွာ၊ ဒုံခရာ ကျေးရွာနှင့် ညိုမီးကျေးရွာ ဘက်တွင် ကရင်နီပြည်မှ ရောက်လာသော စစ်ရှောင်များရှိကို ၎င်းနေအိမ်အတွက် လျှပ်စစ်မီးရရှိရန် ကျပ်သိန်း (၃၀)အထိ ပေးရသဖြင့် ဆိုလာပြားများကို အသုံးပြုနေရသည်။
“လျှပ်စစ်မီးယူမယ်ဆို သိန်း (၃၀)ကုန်မယ်လို့ ပြောတယ်။ သူတို့ ဒေသခံ တွေယူရင်တော့ ဆယ်သိန်းလောက်ပဲ ကုန်တာ။ ကျမတို့က မီးမယူနိုင်ဘူး ဆိုလာနဲ့ပဲ သုံးနေရတာ။ ဆိုလာအားမရှိရင်တော့ ဖယောင်တိုင်မီးကို အားကိုးနေရတာ” ဟု စစ်ရှောင် အမျိုးသမီးတစ်ဦးက ေပြာသည်။
ထို့အပြင် စစ်ရှောင်များသည် အလုပ်ကိုင် အခွင့်အလမ်း ရှားပါးသောကြောင့် ကြုံရာ အလုပ်များ လုပ်ကိုင်နေရပြီး ကျပ်သိန်း (၃၀)သည် ၎င်းတို့ စစ်ရှောင်များအတွက် နှစ်ဝက်စာ စားသောက်စရိတ်နှင့် ညီမျှနေကြောင်း ၎င်းအမျိုးသမီးက ထပ်လောင်းပြောသည်။
တောင်ကြီးမြို့ပေါ်နှင့် ၎င်းအနီးဝန်းကျင်ရောက်ရှိလာသော စစ်ဘေးရှောင်များသည် ဧည့်စာရင်းများကို တစ်လ လျှင်တစ်ကြိမ်တိုင်နေရကြောင်းနှင့် တကြိမ်တိုင်လျှင် ကျပ်ငွေ သုံးသောင်း အထိပေးနေရကြောင်း စစ်ရှောင်အမျိုးသားက သျှမ်းသံတော်ဆင့်ကိုပြောသည်။
“စစ်ရှောင်တွေနေတဲ့ နေရာဆို သူတို့က သီးသန့်ထားတာ ကိုယ်နေတဲ့ ရပ်ကွက်၊ကျေးရွာမှာဆို စစ်ရှောင်ကိုဆို ခွဲခြားလိုက်သေးတယ်၊ ရပ်ကွက်ရုံးတို့ အုပ်ချုပ်ရေးမှုတွေဆို ဧည့်စာရင်းကို တစ်လတစ်ခါ တိုင်ရမယ်ပြောထားတယ် တစ်ခါသွားတိုင်ရင် ကျပ် သုံးသောင်းပေးရတယ်၊ တစ်ခါတလေဆို စစ်မှုထမ်းကြေးလည်း လာကောက်တယ်။”ဟု ၎င်းအမျိုးသးကဆိုသည်။
စစ်ဘေးရှောင်များကို ရပ်ကွက်အချို့ မြို့ခံများက ခွဲခြားမှုများ ၊လုပ်အားခ ခေါင်းပုံဖြတ်မှုများ ကြောင့် သည်းခံ နေရကြောင်းနှင့် ၎င်းတို့၏ ဇာတိနယ်မြေဖြစ်သည့် ကရင်နီပြည်ကို မပြန်ရသည်မှာ (၄)နှစ်ရှိပြီ ဖြစ်ကြောင်း ၎င်းအမျိုးသးက ပြောသည်။
ပြီးခဲ့သည့် ၂၀၂၃ခုနှစ် နိုဝင်ဘာလ ၁၁ ရက်တွင် စစ်ကော်မရှင်နှင့် ကရင်နီအမျိုးသား ကာကွယ်ရေး တပ် KNDFတို့ တိုက်ပွဲပြင်းထန်စွာ ဖြစ်ပွားခဲ့ကြပြီး ကရင်နီပြည်မှ စစ်ရှောင်များ ထောင်ချီ ထွက်ပြေးခဲ့ရသည်။
ထိုသို့ ထွက်ပြေးတိမ်းရှောင်ခဲ့ရပြီးနောက် ပြီးခဲ့သည့် ၂၀၂၄ ခုနှစ်တွင် စစ်ကောမရှင်တပ်က ကရင်နီပြည်နယ် လွိုင်ကော်မြို့မှ စစ်ရှောင်များကို နေရပ်ပြန်လာရန် အတင်းဖိအားပေးမှုကြောင့် စစ်ရှောင် အချို့ နေရပ်ပြန်ခဲ့ရသည်။
ယခုလက်ရှိ တောင်ကြီးမြို့နယ်တွင် ကျန်ရှိနေသည့် စစ်ဘေးရှောင်များကို စစ်ကော်မရှင်တပ်က နေရပ်ပြန်လာရန် ဖိအားပေးနေပြီး မပြန်လာလျှင် အိမ်ခြံ မြေများသိမ်းဆည်းမည်ဟု ခြိမ်းခြောက်နေကြောင်း သိရသည်။
Leave a Comments