သျှမ်းပြည်တောင်ပိုင်း၊ တောင်ကြီးမြို့ မြို့မဈေးအနီးရှိ လမ်းဘေးဈေးသည်များကို စည်ပင်က ရိုက်နှက်ပြီး ပစ္စည်းများ သိမ်းဆည်းသွားကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် ဩဂုတ်လ ၁၂ ရက်တွင် တောင်ကြီးမြို့ နံနက်ခင်းဈေးတခုတွင် လမ်းဘေးဈေးသည်များကို “ဈေးမသိမ်း”ဟူသော အကြောင်းပြချက်ဖြင့် စည်ပင်များကို ဝင်ရောက်ရိုက်နှက်ကာ ပစ္စည်းများကို သိမ်းဆည်းကာ ကားပေါ်တင်သွားကြောင်း သိရသည်။

အဆိုပါ ဖြစ်စဉ်နှင့် ပတ်သက်ပြီး စျေးသည်များက မကျေနပ်သဖြင့် စည်ပင်ဝန်ထမ်းများနှင့် အချေတင် စကားများ ရန်ဖြစ်ခဲ့ကြကြောင်း ဖြစ်စဉ်ကို မြင်တွေ့ခဲ့သည့် အမျိုးသားတဉီးက သျှမ်းသံတော်ဆင့်ကိုပြောသည်။

“စည်ပင်က ဈေးသိမ်းချိန်မှာ မသိမ်းလို့ ဘာညာနဲ့ ဝင်ရိုက်တာ၊ ဈေးသည်ပိုင်တဲ့ ပစ္စည်းကို အကုန်သိမ်းပြီး ကားပေါ်တင်တာ၊ စျေးက ပုံမှန် ၁၁ ကျော် ၁၂ နာရီလောက်မှ သိမ်းတာ အဲ့ဒါကို ၁၁ နာရီလောက်ကတည်းက လာပြီး စည်ပင်ဝန်ထမ်းတွေက စျေးသည်ကို ရိုက်နှက်ပြီး သိမ်းကုန်တာ၊ စည်ပင်လား လူဆိုးဂိုဏ်းအဖွဲ့လားတောင် မသဲကွဲဘူး။”ဟု ၎င်းအမျိုးသားက ဆိုသည်။

ထိုသို့ စည်ပင်ဝန်ထမ်းများမှ ပစ္စည်းများ သိမ်းဆည်းကာ ဈေးသည်များကို ရိုက်နှက်ခဲ့မှုနှင့်ပတ်သက်ပြီး သက်ဆိုင်ရာ ရုံးများတွင် ဖြေရှင်းခဲ့သည်။

စည်ပင်ဝန်ထမ်းများအနေဖြင့် လမ်းဘေးစျေးသည်များကို နိုင်ထက်စီးနင်း လုပ်ပိုင်ခွင့်မရှိသကဲ့သို့ ရိုက်နှက်ခွင့်လည်း မရှိကြောင်း၊ လမ်းဘေးစျေးရောင်းရန်အတွက် စည်ပင်ကို အခွန်ဆောင်ထားရကြောင်း လမ်းဘေးစျေးရောင်းသည့် အမျိုးသမီးတဉီးက သျှမ်းသံတော်ဆင့်ကိုပြောသည်။

“ ကျမတို့ လမ်းဘေးစျေးရောင်ကြပေမယ့် အခွန်ဆောင်ရတယ်။ ရောင်းချင်တိုင်းရောင်းချလို့မရသလို စည်ပင်ကလည်းရိုက်ချင်သလိုရိုက် မောင်းထုတ်ချင်သလို မောင်းထုတ်လို့မရဘူး။ စည်ပင်ဥပဒေညှိရင် ကျမတို့ ဒဏ်ကြေးဆောင်ရတယ်။ အခုလို ကိုယ်ထိလက်ရောက် ရိုက်ခွင့်မရှိဘူး” ဟု တောင်ကြီး လမ်းဘေးစျေးရောင်းချသည့် အမျိုးသမီးက ဆိုသည်။

လက်ရှိ စည်ပင်အောက်ခြေများသည် လမ်းဘေးစျေးသည်များထံ ငွေကြေး အဆမတန်ကောက်ယူမှု၊ အကြောင်းမရှိ အကြောင်းရှာပြီး ငွေတောင်းမှု၊ စျေးသည်များ အချေအတင်ပြန်ပြောဆိုသည့်အခါတွင်လည်း ရိုက်နှက်ကာ စျေးသည်ပစ္စည်းများကို သိမ်းယူမှုများလည်း ပြုလုပ်လာကြောင်း ၎င်းကပြောသည်။

“ အခုစည်ပင်က ပိုက်ဆံလိုချင်လို့ လမ်းဘေးစျေးသည်တွေရဲ့ သိမ်းတာလားတောင် တွေးမိတယ်။ ကျမရဲ့ စျေးဗန်းတွေ ကုန်စိမ်းတွေ ခဏခဏသိမ်းသွားတယ်။ ပိုက်ဆံနဲ့ပြန်ရွေးရတယ်။ တခါရွေးရင် တသောင်းကျပ်၊ သုံးသောင်းကျပ်နဲ့ရွေးရတယ်” ဟု ၎င်းစျေးသည်ကထပ်လောင်းပြောသည်။

တောင်ကြီးမြို့မစျေးအနီးရှိ လမ်းဘေးစျေးသည်အများစုသည် ငွေတိုးချေးကာ ဝမ်းရေးရှာဖွေစားသောက်ရပြီး၊ ကုန်စိမ်းရောင်းရသည့် ငွေများဖြင့် ပြန်ဆပ်ရကြောင်း၊ စည်ပင်များ၏ ဖမ်းဆီးမှု နှင့် စျေးရောင်းခွင့်မပြုမှုကြောင့် ကုန်စိမ်းများပုတ်သိုးမှုများလည်းကြုံတွေ့နေရကာ အကြွေးများပိနေကြောင်း လမ်းဘေးစျေးသည်များ ပြောပြချက်အရသိရသည်။

ယမန်နေ့က စည်ပင်ဝန်ထမ်းများနှင့် ဈေးသည်များ အချေအတင် စကားများပြီး စည်ပင် ပစ္စည်းများ သိမ်းဆည်း ကားပေါ်တင်နေသည့် ဗွီဒီယိုကို လိုင်းပေါ်တင်ခဲ့သော်လည်း စည်ပင်များက ပြန်ဖြုတ်ခိုင်းသည်။