သျှမ်းပြည်တောင်ပိုင်းတွင် ဝက်နာရောဂါဖြစ်ပွားပြီး ဆက်တိုက်သေဆုံးမှုများလာပြီးနောက် ဝက်သားစျေးနှုန်း ကျဆင်လာကြောင်း သတင်းရရှိသည်။

ပြီးခဲ့သည့် ဇွန်လမှစပြီး သျှမ်းပြည်တောင်ပိုင်း ညောင်ရွှေမြို့နယ်တွင် ဝက်နာရောဂါ စတင်ဖြစ်ပွားခဲ့ပြီးနောက် သေဆုံးမှု များရှိခဲ့ပြီးနောက် ဝက်သားဈေးနှုန်းများ ကျဆင်းလာပြီး ဝက်ဝယ်သူများလည်း နည်းပါးလာကြောင်း သိရသည်။

“ဝက်ကလည်း ရောင်းချင်နေပြီ ဝယ်သမားကလည်း မရှိဘူး၊ အရင်က သိန်း (၃၀) တန်တဲ့ ဝက်ဆို အခုချိန်ဆို သိန်း (၂၀) တောင် ပြန်ရမှာ မဟုတ်ဘူး၊ ဝက်သားဈေးက အရင်က တစ်ပိဿကို ကျပ် သုံးသောင်း ကျော်အထိ ရှိတယ်၊ အခုတော့ နှစ်သောင်းတောင် ဝယ်စားတဲ့သူနည်းတယ်၊ ဝက်‌ရောင်းလည်း အရင်းတောင် ပြန်မရဘူး။”ဟု ဝက်မွေးမြူရေး လုပ်ကိုင်သူ ဦးစံလုံးက ပြောသည်။

ထို့အပြင် ဝက်သေများမှ အသားထုတ်ရောင်းသူများလည်း ရှိသောကြောင့် ရောဂါကူးစက်မည်ကို စိုးရိမ်၍ ဝယ်စားသူများ နည်းပါးလာကြောင်း ၎င်းအမျိုးသားက ဆက်ပြောသည်။

ဝက်သားပေါက်များကို ရောင်းဝယ်ရာတွင်လည်း ယခင်က ဝက်တစ်ကောင်လျှင် ကျပ် သုံးသိန်း ခွဲအထိ ဈေးရှိခဲ့သော်လည်း ယခုဇူလိုင်လတွင် ဝက်ကလေး တစ်ကောင်ကို ကျပ်(၁၈၀၀၀၀) သာရှိ၍ ဝယ်မွေးတဲ့သူပင် နည်းလာကြောင်း သိရသည်။

“ဝက်သားပေါက်တောင် ဝယ်မွေးသူသိပ်မရှိဘူး၊ သားပေါက်ထားတဲ့ ဝက်တွေကို ဈေးလျော့ရောင်းတာတောင် ဝယ်သူမရှိလို့ အိမ်မှာ ဝက်ငါးကောင် ဒီတိုင်းကျွေးမွေးထားရတယ်၊ ဝက်သေပြီဆိုရင် မမြှုပ်ဘဲ ဖော်စားကြတော့ ရောဂါကူးပြီး ဝမ်းလျှောတာတို့ ဖြစ်ကြတယ်၊ လူတွေက ဝက်သားဆို နဲနဲ ရွံလာလို့ မစားကြတော့တာ၊ ဝက်မွေးတဲ့သူတွေတော့ ဒီနှစ် ဒုက္ခအရောက်ဆုံးပဲ။”ဟု ညောင်ရွှေဒေသခံ အမျိုးသားတစ်ဦးက ပြောသည်။

ဝက်များသေဆုံးရာတွင် အရေခွံများ ကျွတ်၍ သေဆုံးကုန်ကြောင်းနှင့် ဝက်ကိုယ်ပေါ်တွင် အဖုထစ်များ ဖြစ်၍ သေဆုံးကုန်သောကြောင့် ဝက်နာ အသားများကို မစားသုံးသင့်ကြောင်း သူနာပြု ဆရာမ တစ်ဦးက ပြောသည်။

“ဝက်နာသားတွေကို မစားတာ အကောင်းဆုံး၊ လူတွေမှာလည်း ရောဂါကူးပြီး သေဆုံးသည်အထိ ဖြစ်စေတတ်တယ် ၊အသားတွေဆို တွေ့ရာ မဝယ်စားသင့်ဘူး၊ အစိမ်းလည်း မစားသင့်ဘူး ကျက်အောင်ချက်ပြီးမှ စားရင် စိတ်ချရတယ်။”ဟု အဆိုပါ သူနာပြုဆရာမ တစ်ဦးက ပြောသည်။

ယခုလက်ရှိ သျှမ်းတောင်တွင် မိုးတွင်းကာလဖြစ်၍ မိုးများသောကြောင့် ဝက်များသာမက ကြက်များလည်း အနာရောဂါဖြင့် သေဆုံးမှုများလာကြောင်း သိရသည်။

ပြီးခဲ့သည့် ဇူလိုင်လ ၁၀ ရက်မှစပြီး အင်းလေးဒေသတွင် မိုးရက်ဆက် ရွာသွန်းမှုကြောင့် ရေတက်လာပြီး ဝက်နာရောဂါဖြင့် သေဆုံးသည့်ဝက်များကို မြုပ်နှံထားရာမှ အဆိုပါ ရေကြီးမှုကြောင့် ပြန်လည်မျောပါလာခဲ့သည်။

ထိုသို့ မျောပါလာသောကြောင့် ရေများမှတဆင့် ဒေသခံများကို ရောဂါကူးစက်မည်ကို စိုးရိမ်ကြပြီး ဝက်သေများကို အမြန်ဖယ်ရှားရန် လိုအပ်နေကြောင်း သိရသည်။