သျှမ်းပြည်တောင်ပိုင်း၊ တောင်ကြီးမြို့ ရပ်ကွက်အချို့တွင် စစ်တပ်က ဧည့်စာရင်းလိုက်လံ စစ်ဆေးပြီး အသက်ပြည့်သည့် လူငယ်အမျိုးသားများကို စစ်မှုထမ်းရန် စာရင်းသွင်းထားကြောင်း သတင်းရရှိသည်။
စစ်ကော်မရှင်တပ်သည် တောင်ကြီးမြို့အတွင်း စစ်ဘေးလာရှောင်သူများကိုလည်း တစ်လတစ်ကြိမ် ပုံမှန် ဧည့်စာရင်းတိုင်ခိုင်းနေပြီး ရပ်ကွက်အတွင်း စစ်မှုထမ်းရန်လူလိုလျှင် အသက်ပြည့်ပြီးသည့် လူငယ် စစ်ဘေးရှောင်များကိုလည်း စစ်မှုထမ်းရန် စာရင်းသွင်းခိုင်းထားကြောင်း ဒေသခံများက ပြောသည်။
တောင်ကြီးမြို့နယ်အတွင်း ဧည့်စာရင်း စစ်ဆေးမှုကို ပြီးခဲ့သည့် ဇူလိုင်လ တတိယ ပတ်မှစပြီး စစ်ကော်မရှင်တပ်က လိုက်လံစစ်ဆေးနေသောကြောင့် တောင်ကြီးမြို့တွင် ပြောင်းရွှေ့နေထိုင်သူများ စိုးရိမ်နေကြသည်ဟု သိရသည်။
“စစ်ရှောင်လာတဲ့သူတွေကိုဆို တစ်လတစ်ကြိမ် ပုံမှန်ဧည့်စာရင်း တင်ခိုင်းတယ်၊ တစ်ယောက်ကို ကျပ်သုံးထောင်ပေးရတယ်၊ ငါးယောက်ရှိရင် တစ်သောင်းခွဲ၊ အသက်ပြည့်တဲ့သူတွေကိုဆို စစ်မှုထမ်းစာရင်းထဲပါ ထည့်ထားတာ၊ တောင်ကြီးမှာ လာနေရတာလည်း စိတ်ပူပန်ရတယ်။”ဟု တောင်ကြီးမြို့တွင် လာရောက် စစ်ရှောင်နေသူ အမျိုးသမီးတစ်ဦးက ပြောသည်။
ဧည့်စာရင်း လိုက်လံစစ်ဆေးသူများသည် ရပ်ကွက်အုပ်ချုပ်ရေးမှူးနှင့် စစ်ကော်မရှင်တပ် လက်အောက်ခံ ရဲတပ်သားများက လိုက်လံစစ်ဆေးနေကြောင်း အဆိုပါ အမျိုးသမီးတစ်ဦးက ပြောသည်။
ထို့အပြင် တောင်ကြီးမြို့နယ်အတွင် စစ်ကော်မရှင်တပ် လက်အောက်ခံ အုပ်ချုပ်ရေးမှူးများက စစ်မှုထမ်းကြေးကို တစ်အိမ်လျှင် ကျပ်သုံးသောင်းမှ ကျပ်ငါးသောင်းအထိ လစဉ်ကောက်ခံနေသည်ဟု သိရသည်။
“တစ်လကို စစ်မှုထမ်းကြေး ဘာကြေးညာကြေးဆိုပြီး ကောက်သေးတာ၊ ကံကြီးရပ်ကွက်ဖက်ဆို ဧည့်စာရင်းပိုစစ်သေးတယ်၊ စစ်တပ်လည်း ကြောက်ရ PNO ကိုလည်း ကြောက်ရနဲ့ နေရတာလည်း စိတ်မလုံခြုံမှုတွေနဲ့ပဲ၊ ညဘက်ဆိုရင် ပေါ်တာဆွဲသေးတာ ရပ်ကွက် လူပြတ်တဲ့ နေရာတွေဆို ပေါ်တာဆွဲတာလည်း ကြားတယ်။”ဟု တောင်ကြီးမြို့ခံ အမျိုးသမီးတစ်ဦးက ပြောသည်။
ပြီးခဲ့သည့် ဩဂုတ်လ ပထမပတ်တွင် စစ်ကော်မရှင်၏ တပ်သားများသည် ညဈေးမှမုန့်ဝယ်ပြီး နေအိမ်သို့ ပြန်လာသည့် တောင်ကြီးမြို့ခံ အသက် (၂၈) နှစ်အရွယ် အမျိုးသားတစ်ဦးကို ပေါ်တာဆွဲဖမ်းဆီး ခေါ်ဆောင်သွားခဲ့သည်။
ထိုသို့ ဖမ်းဆီးခေါ်ဆောင်သွားသောကြောင့် မိသားစုဝင်များက ပြန်လည်ခေါ်ဆောင်နိုင်ရန် စစ်တပ်အရာရှိကြီးများနှင့် နီးစပ်သူများကို အကူညီတောင်းရာမှ ငွေကြေး သိန်းဆယ်ချီ ပေးဆောင်ခဲ့စဉ် အလိမ်ခံခဲ့ရသည်ဟု သိရသည်။
Leave a Comments