သျှမ်းပြည်အရှေ့ပိုင်း မိုင်းပျဉ်းမြို့နယ်အတွင်းရှိ RCSS/SSA ထိန်းချုပ်နယ်မြေအနီးသို့ စစ်တပ်နှင့် ပြည်သူ့စစ်ပူးပေါင်းတပ်ဖွဲ့မှ တောနင်းဝင်ရောက်လာခြင်းကြောင့် ထိတွေ့တိုက်ပွဲ ဖြစ်ပွားခဲ့ကြောင်း သတင်းသိရသည်။

ပြီးခဲ့သည့် ဩဂုတ်လ ၂၂ ရက် နေ့လယ်ပိုင်း ၁၂ နာရီကျော်တွင် မိုင်းပျဉ်းမြို့နယ်ရှိ သျှမ်းပြည် ပြန်လည် ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ထိန်းချုပ်နယ်မြေထဲ အာဏာသိမ်းစစ်တပ်နှင့် ၎င်းလက်အောက်ခံ ပြည်သူ့စစ် ပူးပေါင်းတပ်ဖွဲ့တို့မှ တောနင်းဝင်ရောက်လာခြင်းကြောင့် ဆင်မောင်းနှင့် တာကော်ကျေးရွာအုပ်စုတို့တွင် နာရီဝက်နီးပါး နှစ်ဖက်ထိတွေ့တိုက်ပွဲ ဖြစ်ပွားခဲ့ကြောင်း စစ်တပ်ဘက် (၆)ဉီးသေဆုံးမှုရှိခဲ့ကြောင်း RCSS၏ ပြောခွင့်ရသူ ဗိုလ်မှူးစိုင်းခမ်းစံက သျှမ်းသံတော်ဆင့်ကိုပြောသည်။

“ စစ်တပ်နဲ့ ပြည်သူ့စစ် ပူးပေါင်းပြီး ကျနော်တို့ RCSS နယ်မြေထဲ စစ်ကြောင်းထိုးလာပြီး နာရီဝက်နီးပါးထိတွေ့တိုက်ပွဲ ဖြစ်ပြီး စစ်တပ်ဘက် (၆)ယောက်သေတယ်။ သူတို့ (စစ်တပ်နဲ့ပြည်သူ့စစ်)ပြန်ဆုတ်သွားတော့ ၆၀ မမ မော်တာနဲ့ လှမ်းပစ်တယ်။ နယ်မြေတွေထဲဝင်ရင် ခွင့်တောင်းရမယ်။ ခွင့်မရဘဲဝင်ရင် ပစ်မိန့်ပေးထားပါတယ်။” ဟု ဗိုလ်မှူး စိုင်းခမ်းစံက ဆိုသည်။

မိုင်းပျဉ်းမြို့နယ်အတွင်း ဖြစ်ပွားခဲ့သည့် ထိတွေ့တိုက်ပွဲတွင် စစ်တပ်ဘက်မှ ဗိုလ်ကြီး သန်းနိုင်စိုး ဦးဆောင်သည့် ခြေမြန်တပ်ရင်း ခမရ-၃၁၄ တပ်နှင့် စစ်တပ်လက်အောက်ခံ ပြည်သူ့စစ် ပူးပေါင်းတပ်ဖွဲ့တို့မှ စစ်အင်အား (၆၀) ခန့်ဖြင့် RCSS ထိန်းချုပ်နယ်မြေထဲ ခွင့်မတောင်းဘဲ ဝင်ရောက်လာခြင်းကြောင်းဖြစ်ကြောင်း သိရသည်။

“ အခုတော့ စစ်ရေးငြိမ်သွားပါပြီ။ သူတို့ (စစ်တပ်) က ကင်းလှည့်တဲ့ပုံစံဆိုရင် ၆၀ မမ ပါလာစရာမလိုဘူး။ ကြိုတင်ပြင်ဆင်ထားတဲ့သဘောပါ” ဟု ဗိုလ်မှူး စိုင်းခံစံကဆိုသည်။

ပြီးခဲ့သည့် ၂၀၂၄ စက်တင်ဘာလအတွင်းကလည်း မိုင်းပျဉ်းမြို့နယ် ယင်းခမ်းကျေးရွာအုပ်စု အတွင်းရှိ RCSS တပ်စခန်းကို စစ်တပ်နှင့် ပြည်သူ့စစ် ပူးပေါင်းတပ်ဖွဲ့တို့က အင်အား (၁၀၀) ခန့်ဖြင့် တိုက်ခိုက်ခဲ့ရာ ထိတွေ့တိုက်ပွဲ ဖြစ်ပွားခဲ့ပြီး စစ်တပ်ထံမှ သေနတ် (၃) လက် အနည်းဆုံး သိမ်းဆည်းရမိခဲ့ကြောင်း RCSS ဘက်မှ ထိုစဉ်က သတင်းထုတ်ပြန်ခဲ့သည်။

စစ်အစိုးရလက်အောက်ခံ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် RCSS/SSA ဦးဆောင်ပါဝင်ထားသည့် 7 EAO Alliance အဖွဲ့တို့ ငြိမ်းချမ်းရေးလုပ်ငန်းစဉ် တွေ့ဆုံဆွေးနွေးမှုများ ရှိနေသော်လည်း စစ်တပ်နှင့် RCSS ကြား မိုင်းပျဉ်းမြို့နယ်တွင် ယခုကဲ့သို့ တိုက်ပွဲဖြစ်ပွားလာခြင်း ဖြစ်သည်။