သျှမ်းပြည်တောင်ပိုင်း ရွာငံမြို့နယ် သိမ်ကုန်းကျေးရွာအုပ်စုတွင် စစ်ကော်မရှင်တပ်က အထိုင်ချ တပ်စွဲထားပြီး အသက် ၂၀အရွယ်ရှိ လူငယ် (၅)ဉီးကို သေနတ်ဖြင့် ပစ်ခတ်ကာ၊ ထိုထဲတွင် တဉီး ထိမှန်ခဲ့ပြီး ကျန်သူများကည်း ဖမ်းဆီးရိုက်နှက်မှုပြုလုပ်ခဲ့ကြောင်း မျက်မြင်တွေ့ရှိသူများကပြောသည်
သျှမ်းပြည်တောင်ပိုင်း၊ ရွာငံမြို့နယ် တောင်ဘက်ရှိ ကျေးရွာများတွင် စစ်တပ်က ရှောင်တိမ်းခိုင်းထားသော်လည်း ပစ္စည်းပျောက်မည်စိုး၍ နေရပ်ပြန်လာသူများ ရှိကြောင်း သတင်းရရှိသည်။
ရွာငံမြို့နယ် အတွင်း သြဂုတ် ၁၆ရက်မှစတင်ကာ စစ်ကော်မရှင်တပ်က ဝင်ရောက်ကာ တပ်စွဲခဲ့ပြီး၊ ကျေးရွာ ဒေသခံများကိုလည်း ၃ရက်အတွင်း အပြီးပြောင်းရွှေ့ရန် အမိန့်ထုတ်ထားကြောင်း သိရသည်။
ထို့နောက် ရွာငံမြို့နယ် ရေဉီးကျေးရွာ အုပ်စုအတွင်းရှိ ကျေးရွာများတွင်လည်း စစ်တပ်က တပ်စွဲကာ ဒေသခံများ အခြားသို့ ထွက်ပြေး တိမ်းရှောင်ရန် ယမန့်(သြဂုတ် ၁၇)ရက် ညနေပိုင်းတွင် ပြုလုပ်နေစဉ် လူငယ် (၅)ဉီးကို တွေ့ရှိပြီး သေနတ်ဖြင့် ပစ်ကာ၊ထိုထဲတွင် တဉီး ကျည်ဒဏ်ရာရရှိပြီး လက်ရှိ မြိုင်ဆေးရုံသို့ ပို့ဆောင်လိုက်ကြောင်းသိရသည်။
ကျန် လူငယ်(၄)ဉီးကိုလည်းစစ်ကော်မရှင်တပ် က ဖမ်းဆီးရိုက်နှက်ပြီး ပြန်လွှတ်လိုက်သည်။
“ အဓိက လူငယ်တွေမလို့ သေနတ်နဲ့ပစ်လိုက်တဲ့သဘောပဲ။ တယောက်ကတော့ ရွာငံမြို့ပေါ်ဆေးရုံကိုပို့လိုက်တယ်။ ကျန် ၄ယောက်တော့ ရိုက်ခံထားရတော့ ညိုမဲလောက်ပဲ။ ကျနော်တို့လည်း စစ်တပ်ကိုမြင်တော့ ပြန်လှည့်လာရတာ” ဟု ကိုယ်တိုင်မြင်တွေ့ခဲ့ ဒေသခံ တဉီးက သျှမ်းသံတော်ဆင့်ကိုပြောသည်။
လက်ရှိ ရွာငံမြို့နယ်အတွင်းရှိ သိမ်ကုန်းကျေးရွာအုပ်စု၊ ရေဉီးကျေးရွာအုပ်စု မြိုင်ကျေးရွာအုပ်စု အတွင်း နေထိုင်သည့် ပြည်သူများသည် အခြားလွတ်ရာသို့ ထွက်ပြေးနေကြပြီး၊ အချို့သက်ကြီးသည့်သူများသည် နေအိမ်ကို သူခိုးဝင်ရောက်မည်ကို စိုးရိမ်သဖြင့် အိမ်စောင့်ကျန်ခဲ့ကြောင်း သိရသည်။
“ လူငယ်တွေကတော့ လွတ်ရာသို့ ပြေးကြပြီ။ လူငယ်ဆိုရင် တပ်က ပိုပြီး စိုက်ကြည့်တယ်။ အိမ်ကိုလည်း ထားပြီး သွားလို့မရဘူး။ စစ်တပ်က လာခိုးတက်လို့ အိမ်စောင့်လည်းကျန်ထားရသေးတယ်။” ဟု သိမ်ကုန်းကျေးရွာမှ ဒေသခံအမျိုးသားတဉီးကပြောသည်။
ထို့အပြင် စစ်ကော်မရှင်တပ်သားများသည်လည်း မြိုင်ကျေးရွာ ဘုန်းကြီးကျောင်းနှင့် မြစေတီကျေးရွာဘက်တွင် အင်အား အများပြား တပ်စွဲထားကြောင်း ၎င်းအမျိုးသားက ထပ်ပြောသည်။
ဆက်လက်ပြီး ဓနုဒေသ အခြေစိုက် ပြည်သူ့ကာကွယ်ရေးတပ်မတော် ၁၀၀၃ တပ်ရင်းဘက်မှလည်း စစ်ကော်မရှင်တပ်က ဒေသခံများကို ရှောင်တိမ်းခိုင်းပြီး နေအိမ်မှ ပစ္စည်းများကို ယူဆောင်ခြင်း၊ အိမ်မွေးတိရစ္ဆာန်များအား သတ်ဖြတ် စားသောက်ခြင်းများ လုပ်ဆောင်လေ့ ရှိကြောင်း ထုတ်ပြန်ထားသည်။
“တော်လှန်ရေးဘက်က ထုတ်ပြန်ထားသလိုပဲ ရွာကနေရှောင်ရင် တန်ဖိုးကြီး ပစ္စည်းကို တစ်ခါတည်းယူ သွားသင့်တယ်၊ မှတ်ပုံတင်တို့ အရေးကြီး စာရွက်စာတမ်းတွေကို ယူသွားဖို့လိုတယ်၊ ခနရှောင်ခိုင်းတယ် ဆိုပေမဲ့ ရှေ့ဆက် ဘာဖြစ်လာမယ် မသိဘူးလေ ၊ စစ်တပ်ကလည်း ဖမ်းဆီးမှုတွေ လုပ်နေတာကို လည်း သတိထားစေချင်တယ်။” ဟု ရွာငံမြို့ခံ အမျိုးသားတစ်ဦးက ပြောသည်။
ပြီးခဲ့သည့် ဇူလိုင်လ နောက်ဆုံးပတ်တွင် စစ်ကော်မရှင်တပ်နှင့် ဓနုပြည်သူ့ လွတ်မြောက်ရေးတပ်တော် (DPLA )တို့ တိုက်ပွဲဖြစ်ပွားပြီးနောက် ရွာငံမြို့နယ်အတွင်း စစ်တပ်မှ စစ်ဆေးဖမ်းဆီး မှုများမကြာခဏ ပြုလုပ်လာခဲ့သည်။
Leave a Comments