သျှမ်းပြည် တောင်ပိုင်း၊ တောင်ကြီးမြို့ပြင်ဘက်တွင် စစ်ကောင်စီတပ်သားများက လမ်းသွားလမ်းလာများကို တားဆီးကာ ဖုန်းများကို စစ်ဆေးမှု ပြုလုပ်နေကြောင်း သတင်းရရှိသည်။

ယခုတစ်ပတ်အတွင်း တောင်ကြီးမြို့ သျှမ်းပြည်နယ် ဗုဒ္ဓတက္ကသိုလ်ဘက်သို့ သွားသည့်လမ်းတွင် စစ်ကောင်စီတပ်သားများက ဆိုင်ကယ်များကို တားဆီးပြီး ဖုန်းအတွင်းရှိ အချက်အလက်များနှင့် အွန်လိုင်းလောင်းကစားဆိုင်ရာ အသုံးပြုမှုများကို စစ်ဆေးနေကြောင်း ကိုယ်တိုင်ကြုံတွေ့ခဲ့သည့် အသက် ၂၅ အရွယ်ရှိ အမျိုးသားတဉီးက သျှမ်းသံတော်ဆင့်ကိုပြောသည်။

“ဖုန်းထဲက အလောင်းကစားဂိမ်းတွေကို အဓိက စစ်ချင်တာပါ။ဖုန်းထဲမှာရှိတဲ့ အချက်အလက်တွေကို စစ်တာလား ဘာကိုတကယ်လိုချင်လဲတော့မသိဘူး။ ဖုန်းစစ်ခံရတဲ့ တချို့လူတွေကို ဖမ်းထားတာမျိုးရှိတယ်” ဟု ၎င်းကဆိုသည်။

စစ်ဆေးမှုများပြုလုပ်နေသည့် အကြောင်းရင်းကို သေချာမသိရသော်လည်း ရုတ်တရက်တားဆီး စစ်ဆေးခံရခြင်းကြောင့် လမ်းသွားလမ်းလာများအနေဖြင့် စိုးရိမ်ထိတ်လန့်မှုရှိနေကြကြောင်း ၎င်းက ဆက်ပြောသည်။

“ဘာကြောင့် ဒီလိုတာပြီးစစ်လဲဆိုတာတော့ သေချာမသိရဘူး။ အရပ်ဝတ်တွေ စစ်ယူနီဖောင်တွေနဲ့ ဆိုတော့ လန့်တာပေါ့။ ဖုန်းကိုလည်း စစ်သလို ဆိုင်ကယ်တွေကိုလည်း စစ်တယ်။ ထိုင်ခုံအောက်တွေပါ ဖွင့်ခိုင်းပြီး စစ်တာ” ဟု ၎င်းကထပ်လောင်းပြောသည်။

ရှောင်တခင်တားဆီးစစ်ဆေးမှုများကြောင့် လူငယ်များအနေဖြင့် ပေါ်တာဆွဲခံရမည်ကို စိုးရိမ်နေကြပြီး လမ်းသွားလမ်းလာရာတွင်လည်း တားဆီးခံရမည်ကို သတိထားသွားလာနေကြရကြောင်း ဒေသခံက ဆိုသည်။

ပြီးခဲ့သည့် ဇွန်လမှ စပြီး စလော့ဂိမ်းကစားသူများကို စစ်ကော်မရှင်တပ်က ဖမ်းဆီးအရေးယူမည်ဟု တရားဝင် ကြေညာခဲ့ပြီးနောက် သျှမ်းပြည် တောင်ပိုင်းတွင် ဖမ်းဆီးမှုများ စတင်ပြုလုပ်လာခြင်းဖြစ်သည်။