သျှမ်းပြည်တောင်ပိုင်း၊ ညောင်ရွှေမြို့ပေါ်နှင့် အင်းလေးဒေသဘက်တွင် လှုပ်ရှားဆောင်ရွက်နေသည့် အရပ်ဘက် လူမှုအဖွဲ့အစည်းများကို စစ်ကော်မရှင်က လိုက်လံ ဖမ်းဆီးနေကြောင်း သတင်းရရှိသည်။

ပြီးခဲ့သည့် ၂၀၂၂ခုနှစ် အောက်တိုဘာလ (၂၈) ရက်နေ့တွင် အသင်းအဖွဲ့ မှတ်ပုံတင်ခြင်းဆိုင်ရာ ဥပဒေ ပုဒ်မ ၄၁၉ ဖြင့် ပြဌာန်းခဲ့ပြီးနောက် ထိုဥပဒေအထဲတွင် အစိုးရမဟုတ်သော အသင်းအဖွဲ့များကို မှတ်ပုံတင်ထားခြင်း မရှိလျှင် အရေးယူဖြစ်ကြောင်းနှင့် နိုင်ငံရေးနှင့် ဆက်စပ်လုပ်ငန်းများ လုပ်ကိုင်လျှင် အရေးယူမည်ဟု ဖော်ပြထားသည်။

အဆိုပါ ဥပဒေကို ညောင်ရွှေမြို့နယ်တွင် လက်တွေကျင့်သုံးကာ ဖိအားပေး ဖမ်းဆီးမှုများ ဆက်တိုက်လုပ်ဆောင်လာသောကြောင့် ဒေသတွင်း အရပ်ဘက် လူမှုအဖွဲ့အစည်းအချို့ အလုပ်များ ရပ်ဆိုင်းထားရကြောင်း ညောင်ရွှေမြို့နယ် အရပ်ဘက်လူမှုအဖွဲ့အစည်းတွင် လုပ်ကိုင်နေသည့် အမျိုးသားတဉီး က သျှမ်းသံတော်ဆင့်ကိုပြောသည်။

“ ညောင်ရွှေ အင်းလေးဘက်မှာ အခု CSO လုပ်နေတဲ့သူတွေကို လိုက်ဖမ်းတာ။ အင်းလေးရွာဘက်တွေမှာ စစ်ကြောင်းနဲ့ ဝင်စစ်ပြီး ဖမ်းတာတို့ လုပ်တယ်၊ ညောင်ရွှေက ဟိုတယ်မှာဆို အထဲထိ ဝင်ဆွဲဖမ်းတယ်၊ ကျနော်ရဲ့ အသိ တစ်ယောက်လည်း အဖမ်းခံရတယ်။”ဟု ၎င်းကဆိုသည်။

ထိုသို့ စစ်တပ်မှ ဖမ်းဆီးမှုများ လုပ်ဆောင်လာသောကြောင့် အရပ်ဘက် အဖွဲ့အစည်းများက အလုပ်များ ရပ်ဆိုင်းထားကြပြီး အင်းလေး သွားလမ်းတွင်လည်း စစ်တပ်မှ စစ်ဆေးဖမ်းဆီးမှုများ ပြုလုပ်နေလျက်ရှိကြောင်း သိရသည်။

ထို့အပြင် စစ်တပ်ဘက်မှ ညောင်ရွှေမြို့ပေါ်တွင် လာရောက်နေထိုင်သူများကိုပါ ညဘက် ပေါ်တာဆွဲ ဖမ်းဆီးမှုများ ပြုလုပ်လာသောကြောင့် ခရီးသွားလာသူ နည်းပါးလာကြောင်း ညောင်ရွှေ ဒေသခံများက ပြောသည်။

အရပ်ဘက် အဖွဲ့အစည်းများဖြစ်သည့် CSO အဖွဲ့အစည်းများကို ဖိအားပေး တင်းကျပ်လာသောကြောင့် အင်းလေးဒေသ အတွင်း ဖွံ့ဖြိုးတိုးတက်ရေး လုပ်ငန်း လုပ်ဆောင်နေမှုများ ရပ်ဆိုင်းသွားနိုင်သောကြောင့် ဒေသခံများအတွက် အဆင်မပြေ ခက်ခဲမှုများနှင့် ကြုံလာရမည်ကို စိုးရိမ်နေကြကြောင်း အင်းလေး ဒေသခံ အမျိုးသမီးတဉီးက သျှမ်းသံတော်ဆင့်ကိုပြောသည်။

“ဒီလို အဖွဲ့အစည်းတွေလာပြီး လုပ်ဆောင်ပေးနေသေးလို့ အင်းလေးဒေသက ချောင်လည်နေတာ၊ ဒီအဖွဲ့အစည်းတွေက အင်းလေးဒေသအတွက် တစိတ်တဒေသ အထောက်ကူပြုတယ်၊ ဒီအဖွဲ့အစည်းသာ မရှိရင် အင်းလေးက အရင်လိုခက်ခဲလာမှာ ရေကြီးမှုတွေဖြစ်ခဲ့ရင်တောင် လက်နက်ကိုင်တွေက ကူညီတာမဟုတ်ဘူး။” ၎င်းအမျိုးသမီးက ပြောသည်။

ယခုလက်ရှိ ညောင်ရွှေမြို့နယ်တွင် စစ်တပ်နှင့် ပအိုဝ်းပြည်သူ့စစ်(PNO) တို့ ပူးပေါင်း၍ ပေါ်တာဆွဲ ဖမ်းဆီးခြင်း၊ ရှောင်တခင် စစ်ဆေးခြင်းများ ပြုလုပ်နေပြီး အင်းလေးဒေသတွင်လည်း အင်အားသုံးစစ်ကြောင်း ထိုးမှုများ ပြုလုပ်နေသည်ဟု ဒေသခံများထံမှ သိရသည်။

ပြီးခဲ့သည့် ဩဂုတ်လ ပထမပတ်တွင် ညောင်ရွှေမြို့သို့ရောက်လာသည့် ဧည့်သည်အမျိုးသားနှစ်ဉီးကို စစ်ကော်မရှင်တပ်နှင့် အုပ်ချုပ်ရေးမှူးတို့က မနက် အစော တနာရီအချိန်တွင် လာရောက် ဖမ်းဆီးခေါ်ဆောင်သွား ကြောင်းသိရသည်။