သျှမ်းပြည်တောင်ပိုင်း ညောင်ရွှေမြို့နယ်တွင် စစ်ကော်မရှင်တပ်က ဧည့်စာရင်းလိုက်လံ စစ်ဆေးပြီး နယ်ခံမဟုတ်သူများကို ဖမ်းဆီပေါ်တာဆွဲနေကြောင်း ဒေသခံများပြောသည်။

ပြီးခဲ့သည့် မေလ၂၁ရက်တွင် ညောင်ရွှေမြိုနယ် အင်းလေးဒေသ နန်းပန်မြို့မှ အသက် ၃၀ ကျော် လင်မယားနှစ်ဦးသည် ညောင်ရွှေမြို့တွင် သွားရောက်တည်းခိုစဉ် စစ်ကော်မရှင်တပ်က ဧည့်စာရင်းဝင်စစ်ကာ ဖမ်းဆီးသွားကြောင်း ၎င်းအသိမိတ်ဆွေ တစ်ဉီးက သျှမ်းသံတော်ဆင့်ကိုပြောသည်။

ထိုသို့ ဖမ်းဆီးသွားခဲ့ပြီးနောက် ယနေ့ (မေ ၂၆)ရက်အထိ သတင်းအစအန မရရှိသေးကြောင်းနှင့် ညောင်ရွှေမြို့တွင်တည်းခိုမည် ဆိုလျှင် သက်ဆိုင်ရာ တာဝန်ရှိဌာနများထံသို့ ကြိုတင်အကြောင်းကြား ထားသင့်ကြောင်း သိရသည်။

“ညောင်ရွှေမြို့ပေါ်မှာ နယ်ခံမဟုတ်တဲ့သူကို ဧည့်စာရင်းစစ်ပြီး ဝင်ဖမ်းနေတယ်။ နန်းပန်က ကျောင်းဆရာမ လင်မယား နှစ်ဦးတောင်ဖမ်းသွားတာ ခုထိအစနမရဘူး တချို့အုပ်ကြီးနဲ့ နီးစပ်တဲ့သူတွေ ပြောတာကတော့ စစ်မှုထမ်းလူစားထိုး ထည့်လိုက်ပြီလို့ပြောကြတယ်၊ အသွားအလာ သတိရှိရှိနဲ့ နေမှရတယ်။”ဟု အဆိုပါ အမျိုးသားက ပြောသည်။

လက်ရှိ အင်းလေးဒေသအတွင် စစ်ကော်မရှင်တပ်နှင့် ပအိုဝ်းပြည်သူ့စစ် (PNO) တို့ကနယ်မြေစိုးမိုးထားပြီး ဒေသခံများ၏ အသွား အလာများကို စောင့်ကြည့် စစ်ဆေးမှုများ ပြုလုပ်နေကြောင်း သိရသည်။

ထို့အပြင် သျှမ်း-ကယားနယ်စပ် အနီးရှိ အင်းလေးဒေသ ကျေးရွာများတွင် လက်နက်ကြီးသံနှင့် သေနတ်သံများ မကြာခဏ ကြားရသဖြင့် တိုက်ပွဲထပ်မံဖြစ်ပွားလာမည်ကို ဒေသခံများက စိုးရိမ်နေသည်။

“ညဆို လက်နက်သံတွေ ကြားရတယ် အရင်ကလည်း တိုက်ပွဲဖြစ်ဖူးတော့ စိတ်ကလန့်နေတယ် အလိုလိုကြောက်နေရတယ်။ PNOတပ်သားတွေကလည်း ကင်းလှည့်လာကြည့်တာ ရှိတော့ ပိုကြောက်ရတယ်။ တစ်ခါတစ်ခါ ရွာသားတွေကို လမ်းပြခါ်သွားပြီး တစ်ပတ်လောက်ကြာမှ ပြန်လွှတ်ပေးတာမျိုးတွေရှိတယ်။”ဟု အင်းလေး ဒေသခံ အမျိုးသမီးတစ်ဦးက ပြောသည်။

ကျေးရွာများအတွင်း ဒေသခံမဟုတ်သူများ ညအိပ်ညနေ လာရောက်လည်ပတ်လျှင် သက်ဆိုင်ရာ တာဝန်ယူရှိသူများထံ ကြိုတင်အကြောင်းကြားရန်နှင့် အကြောင်းကြားခြင်းမရှိပါက အပြစ်ပေးအရေးယူမှုများ ပြုလုပ်သွားမည်ဟု စစ်ကော်မရှင်တပ်သားနှင့် PNO တပ်သားများက အသိပေးသွားကြောင်း သိရသည်။

ပြီးခဲ့သည့် မတ်လ ဒုတိယပတ်တွင်လည်း ညောင်ရွှေမြို့ပေါ်နှင့် အင်းလေးဒေသတွင် စစ်ကော်မရှင်တပ်က ဧည့်စာရင်းလိုက်လံစစ်ဆေးခဲ့ကြောင်းလည်းသိရသည်။