သျှမ်းပြည် တောင်ပိုင်း လင်းခေးခရိုင်အတွင်း စစ်ကောင်စီတပ်နှင့် သျှမ်းပြည်ပြန်လည် ထူထောင်ရေးကောင်စီ (RCSS/SSA) တို့က မူးယစ်ဆေးဝါးသုံးစွဲသူများကို အပြိုင်ဖမ်းဆီးကာ တပ်သားစုဆောင်းနေကြောင်း ဒေသခံများထံမှ သိရသည်။
ပြီးခဲ့သည့် ဇူလိုင်လမှစတင်ကာ လင်းခေးမြို့ပေါ် နှင့် ကျေးရွာအချို့ရှိ မူးယစ်ဆေးဝါးသုံးစွဲသူများကို စစ်ကောင်စီတပ် နှင့် (RCSS/SSA) တို့က လိုက်လံစစ်ဆေးဖမ်းဆီးပြီး တပ်သားစုဆောင်နေကြောင်း လင်းခေးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“သူတို့ သတင်းရတာဖြစ်ဖြစ် တခုခုသိထားရတာဖြစ်ဖြစ် ရွာတွေကိုဝင်တာ လမ်းသွားလမ်းလာကို စစ်ဆေးပြီး ဖမ်းတာရှိတယ်။ပြီးတော့ သတင်းရလို့ အိမ်ထိဝင်စစ်တယ်။ဆီးတွေပါ စစ်တယ်။”ဟု လင်းခေးမြို့ဒေသခံ အမျိုးသမီးတစ်ဦးက ပြောသည်။
ထိုအပြင် စစ်ကောင်စီတပ် နှင့် (RCSS/SSA)တပ်တို့ နှစ်ဖွဲ့ မူးယစ်ဆေးဝါးသုံးစွဲသူများကို အပြိုင်အဆိုင်ဖမ်းဆီးသော်လည်း စစ်ကောင်စီတပ်ထံ ဖမ်းဆီးခေါ်ဆောင်ခံရမည်ကို ဒေသခံများက ပိုပြီး စိုးရိမ်နေကြကြောင်း လင်းခေးမြို့ဒေသခံ အမျိုးသမီးတစ်ဦးက ဆက်ပြောသည်။
“စစ်ကောင်စီတပ်က မူးယစ်ဆေးသုံးစွဲသူကို ဖမ်းပြီး ရှေ့တန်းကို ပို့တော့ ရွာကလူတွေက ပိုပြီး စိုးရိမ်ကြတယ်။သူတို့ဖမ်းတာ အသက်အရွယ်မရွေးဘူး အကုန်ဖမ်းတာပါ။ကျနော် အသိတွေလည်း ပါသွားတယ်။ဒါပေမယ့် RCSS ကတော့ မူးယစ်ဆေးဝါးသုံးတဲ့ လူငယ်တွေပဲဖမ်းတာ၊ လူကြီးမဖမ်းဘူး” ဟု လင်းခေးမြို့ဒေသခံ အမျိုးသမီးတစ်ဦးက ပြောသည်။
ယခုကဲ့သို့ စစ်ကောင်စီတပ်နှင့် RCSS တို့က တပ်သားများကို အပြိုင်စုဆောင်းလာခြင်းကြောင့် လင်းခေးခရိုင်အတွင်း တိုက်ပွဲများ ပြန်လည်ဖြစ်ပွားလာမည်ကိုလည်း ဒေသခံများက စိုးရိမ်နေကြသည်။
ပြီးခဲ့သည့် (ဩဂုတ်လ ၂၂ ရက်)တွင် မိုင်းပျဉ်းမြို့နယ်ရှိ သျှမ်းပြည် ပြန်လည် ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ထိန်းချုပ်နယ်မြေထဲ အာဏာသိမ်းစစ်တပ်နှင့် ၎င်းလက်အောက်ခံ ပြည်သူ့စစ် ပူးပေါင်းတပ်ဖွဲ့တို့မှ တောနင်းဝင်ရောက်လာခြင်းကြောင့် ဆင်မောင်းနှင့် တာကော်ကျေးရွာအုပ်စုတို့တွင် နာရီဝက်နီးပါး နှစ်ဖက်ထိတွေ့တိုက်ပွဲ ဖြစ်ပွားခဲ့ကြောင်း သိရသည်။
Leave a Comments