မြန်မာပြည်သူတွေ လျှပ်စစ်မီးမှန်မှန်မရလို့ ဖယောင်းတိုင် တွန်းနေရတဲ့ဒုက္ခကို အသုံးသတ်ဖို့အတွက် အစိုးရက အဖြေရှာလိုက်ပါပြီ။

အဲ့ဒါကတော့ မြေကြီးပေါ်မှာ မီးမပေးနိုင်ရင် အာကာသထဲကို သွားကြည့်ဖို့ပါပဲ။

လာမယ့် ၂၀၂၈ ခုနှစ်မှာ မြန်မာအာကာသယာဉ်မှူးတစ်ယောက်ကို အာကာသထဲ လွှတ်တင်တော့မယ်လို့ သမ္မတရုံး ပြောခွင့်ရ ဒေါက်တာခိုင်ခိုင်စိုးက သတင်းကောင်း ပါးလိုက်ပါတယ်။

ပြီးခဲ့တဲ့ သြဂုတ်လ ၁၇ ရက်ကနေ ၂၃ ရက်အထိ ရုရှားနဲ့ ဘယ်လာရုစ်ခရီးစဉ်မှာ အာဏာသိမ်းသမ္မတ ဦးမင်းအောင်လှိုင်ဟာ မိုင်ပေါင်း ၂၀,၀၀၀ နီးပါး ပျံသန်းခဲ့ပြီးနောက်မှာတော့ မြန်မာနိုင်ငံသားတွေဟာ ကမ္ဘာမြေပေါ်မှာ ခြေကပ်မနေသင့်တော့ဘူးဆိုတာကို သဘာပေါက်သွားပုံရပါတယ်။

အိမ်မှာ မီးမလာရင် အာကာသထဲသွားနေဆိုတဲ့ မူဝါဒသစ်လားလို့တောင် ထင်မှတ်ရပါတယ်။

မြေပြင်မှာ ဘယ်ကနေ ဗုံးကျလာမလဲဆိုတာထက် အာကာသထဲကနေ ဘာအန္တရာယ်တွေ ကျလာမလဲဆိုတာကို စောင့်ကြည့်ဖို့ စခန်းတွေ ဆောက်ဦးမှာပါ။

ဒါ့အပြင် ဂြိုလ်တုတွေ၊ GNSS စခန်းတွေနဲ့ ၂၀၂၈ မှာ အာသာသယဉ်မှူး လွှတ်မယ့်အစီအစဉ်ဟာ “ဆန်ပြုတ်သောက် နေရပေမယ့် အာကာသထဲတော့ ဗျောက်အိုးဖောက်ချင်တယ်” ဆိုတဲ့ စိတ်ကူးမျိုးလို့ ဝေဖန်သူတွေက ပြောနေကြပါတယ်။

ရုရှားနိုင်ငံက ပေးလိုက်တဲ့ “ဂုဏ်ထူးဆောင်ပါမောက္ခ” ဘွဲ့ကလည်း အတော်လေး ထိရောက်ပါတယ်။

ကုန်ဈေးနှုန်းတွေ တက်နေတာကို မထိန်းနိုင်သေးပေမယ့် ရုရှားတက္ကသိုလ်ကတော့ အာဏာသိမ်းသမ္မတ ဦးမင်းအောင်လှိုင်ကို စီးပွားရေး ပညာရှင်အဖြစ် အသိအမှတ်ပြုလိုက်ပြီမို့ ရှေ့လျှောက် မြန်မာ့စီးပွားရေးဟာ Rocket လိုပဲ အာကာသထဲကို ထိုးတက်သွားတော့မလား မျှော်လင့်ရပါတယ်။

လျှပ်စစ်မီးအတွက်လည်း “Mini” ဆိုတဲ့အတိုင်း ချစ်စရာကောင်းတဲ့ နျူကလီးယား ဓာတ်ပေါင်းဖိုလေးတွေ ဆောက်ပေးဖို့ ရုရှားနဲ့ တိုင်ပင်ခဲ့ပါတယ်။

ဒါတင်မကသေးပါဘူး၊ ဘယ်လာရုစ်နိုင်ငံကနေ ကားတာယာစက်ရုံတွေလည်း လာဆောက်ပေးဦးမှာပါ။

အာဏာသယာဉ်မှူးက အာကာသထဲကပြန်လာရင် မြန်မာပြည်လုပ် တာယာတွေနဲ့ ကားမောင်းပြီး အိမ်ပြန်နိုင်အောင် ကြိုတင်ပြင်ဆင်ထားတာလည်း ဖြစ်နိုင်ပါတယ်။

ဘာပဲဖြစ်ဖြစ် ၂၀၂၈ ကျရင်တော့ မြန်မာပြည်သူတွေဟာ မီးပြတ်လို့ မှောင်နေတဲ့လမ်းဘေးမှာ ထိုင်ရင်း အာကာသထဲ ပျံတက်သွားမယ့် မြန်မာ့အာကာသယာဉ်ကို လက်ပြနှုတ်ဆက်နိုင်ဖို့ အားတင်းထားကြပါဦးလို့ပဲ တိုက်တွန်းလိုက်ပါရတယ်။