တာချီလတ်-မိုင်းရှူးပြေးဆွဲနေသည့် လိုင်းကားများသည် ယခုနှစ်အတွင်း စက်သုံးဆီ စျေးနှုန်းမြင့်တက်မှု၊ ဝယ်ယူရန်ခက်ခဲမှုနှင့် စစ်ကော်မရှင်၏ စစ်ဆေးရေးဂိတ်များ တင်းကြပ်မှုတို့ကြောင့် ရပ်နားလိုက်ရကြောင်း သတင်းရရှိသည်။

လက်ရှိ တာချီလိတ်မြို့တွင် ဓာတ်ဆီ ၉၁ တစ်လီတာလျှင် ၆၅ ဘတ်ခန့် ရှိသော်လည်း တရားမဝင်ဈေးကွက်တွင် ၈၀ ဘတ်မှ ၁၀၀ ဘတ်ဝန်းကျင်အထိ ပေးဝယ်ရသည့်အခြေအနေရှိပြီး ဓာတ်ဆီ ၉၅ မှာ ရှာဖွေဝယ်ယူရန် ခက်ခဲနေကြောင်း ကားသမားများထံမှ သိရသည်။

တာချီလိတ်-မိုင်းရှူး ခရီးစဉ်တွင် ယခင်က ခရီးသည်တစ်ဦးလျှင် ကားခ ကျပ် ၁ သိန်းခွဲဝန်းကျင်သာ ရှိခဲ့သော်လည်း လက်ရှိတွင် ကျပ် ၂ သိန်းခွဲဝန်းကျင်အထိ မြင့်တက်လာကြောင်း ကားသမားတစ်ဦးက သျှမ်းသံတော်ဆင့်ကို ပြောသည်။

“ဆီဈေးတွေ မပြတ်တုန်းက၊ မတက်တုန်းက တစ်ယောက်ကို ၁ သိန်းခွဲလောက်ပဲ။ အခု တစ်ယောက်ကို ၂ သိန်းခွဲ။ကုန်တွေကလည်း တင်လို့မရဘူး။ တာကောတံတားမှာ အရမ်းစစ်တယ်။ မကိုက်ဘူး” ဟု ၎င်းက ပြောသည်။

စစ်ကောင်စီ၏ “ရက် ၁၀၀” စီမံကိန်းအတွင်း ပို့ကုန်၊ သွင်းကုန်များကို စစ်ဆေးမှု တင်းကြပ်လာသဖြင့် သျှမ်းပြည်အရှေ့ပိုင်းမှ သျှမ်းပြည်တောင်ပိုင်းသို့ ကုန်စည်တင်ဆောင်သည့် ကုန်တင်ကားကြီးများနှင့် တွဲကားအချို့လည်း ရပ်နားထားရကြောင်း သိရသည်။

ယခုနောက်ပိုင်း ကုန်စည်များ တင်ဆောင်သွားလာရန် အခက်အခဲရှိလာခြင်းကြောင့် ခရီးသည်တင် ကားကြီးများ အနေဖြင့် ခရီးသည်များကိုသာ တင်ဆောင်ပြေးဆွဲပါက စက်သုံးဆီနှင့် အခြားကုန်ကျစရိတ်များကို ကာမိရန် ခက်ခဲလာကြောင်း ကားသမားတစ်ဦးက ပြောသည်။

“အခု သွားနေကြတဲ့ လိုင်းကားအကြီးတွေက အလုပ်မဖြစ်ဘူး။အဲ့ကားက လူမရှိရင်လည်း မထွက်ဖြစ်ဘူး။ ခရီးသည်ရှိမှာကို စောင့်ရတယ်။ ကားကြီးက ကုန်ပါ တင်ရမှ တွက်ခြေကိုက်တာ။ အခုက ကားသေးနဲ့ ပြန်သွားနေရတာ။ ကားသေးက ဆီဖိုးသက်သာတယ်။ဆီကလည်း ဝယ်ဖို့ခက်နေလို့။ ကားသေးနဲ့ဆို လူရှိရင် ရှိသလောက် ထွက်လို့ရတယ်” ဟု ၎င်းက ပြောသည်။

ထို့ကြောင့် တာချီလိတ်-မိုင်းရှူး ခရီးစဉ်တွင် ပုံမှန်ပြေးဆွဲနေသည့် ခရီးသည်တင်ကားကြီးအချို့ ရပ်နားလာပြီး လက်ရှိတွင် ဆီစားသက်သာသည့် ကားငယ်များဖြင့်သာ ခရီးသည်ရှိသလောက် ပြေးဆွဲနေကြရကြောင်း သိရသည်။

အဆိုပါ ကုန်တင်ကားကြီးများနှင့် တွဲကားများသည် ထိုင်းနိုင်ငံထုတ် စားသောက်ကုန်များ၊ အဝတ်အထည်များနှင့် လူသုံးကုန်ပစ္စည်းများကို အဓိက တင်ဆောင်သွားလာကြကြောင်း သိရသည်။