အတုအယောင် ရွေးကောက်ပွဲမှတဆင့် ပေါ်ပေါက်လာသည့် ပြည်ထောင်စုလွှတ်တော်တွင် သေဒဏ်နှင့် တစ်သက်တစ်ကျွန်း ထောင်ဒဏ်အထိ ပြစ်ဒဏ်ချမှတ်နိုင်သည့် အွန်လိုင်းလိမ်လည်မှု တိုက်ဖျက်ရေးဆိုင်ရာ ဥပဒေကြမ်းကို အတည်ပြုလိုက်ကြောင်း သတင်းသိရသည်။

ယမန်နေ့ (ဇူလိုင်လ ၂၈ ရက်) တွင် ပြုလုပ်ခဲ့သည့် ပြည်ထောင်စုလွှတ်တော် အစည်းအဝေးတွင် ပြည်သူ့လွှတ်တော်နှင့် အမျိုးသားလွှတ်တော် သဘောကွဲလွဲသည့် အွန်လိုင်းလိမ်လည်မှု တိုက်ဖျက်ရေးဆိုင်ရာ ဥပဒေကြမ်းကို ပြည်ထောင်စုလွှတ်တော် နာယကဖြစ်သူ ဦးအောင်လင်းဒွေးက တစ်ပိုဒ်ချင်းစီအလိုက် လွှတ်တော်အဆုံးအဖြတ် ရယူပြီး အတည်ပြုခဲ့သည်။

စစ်အစိုးရ၏ ရွေးတုလွှတ်တော်တွင် အတည်ပြုခဲ့သည့် အွန်လိုင်းငွေလိမ် ကျားဖြန့်တိုက်ဖျက်ရေး ဥပဒေကြမ်းထဲ အပြင်းထန်ဆုံး ပြစ်ဒဏ်မှာ ပုဒ်မှ-၄၇ ပါ ပြဋ္ဌာန်းချက်ဖြစ်ပြီး အွန်လိမ်းလိမ်လည်မှု ကျူးလွန်ရန် အကြမ်းဖက်ခြင်း၊ ညှင်းပန်းနှိပ်စက်ခြင်း၊ မတရား ဖမ်းဆီးချုပ်နှောင်ခြင်း၊ ရက်စက်ကြမ်းကြုတ်စွာ ပြုမူ ဆက်ဆံခြင်းတို့ကို ကျူးလွန်ပါက ထောင်ဒဏ် ၁၀ နှစ်မှ တစ်သက်တစ်ကျွန်းအထိဖြစ်စေ၊ သေဒဏ်ဖြစ်စေ ချမှတ်နိုင်ပြီး ငွေဒဏ်လည်း ချမှတ်နိုင်ကြောင်း ပြဋ္ဌာန်းထားသည်။

အလားတူ အွန်လိုင်းငွေလိမ် ကျားဖြန့်ပြစ်မှု ကျူးလွန်ခဲ့စဉ် လူသေမှုအထိ ဖြစ်ခဲ့ပါက သေဒဏ်ချမှတ်ရမည်ဟု ဖော်ပြထားပြီး အွန်လိုင်းငွေလိမ် ကျားဖြန့်နေရာ လက်ခံဖွင့်လှစ်ခြင်း၊ ဒစ်ဂျစ်တယ် ငွေလိမ်မှု ကျူးလွန်ခြင်း၊ ကျားဖြန့်ငွေလိမ် လုပ်ကိုင်ရန် လူခေါ်ခြင်း သို့မဟုတ် ဦးဆောင်လုပ်ကိုင်ခြင်းတို့ကိုလည်း ထောင်ဒဏ် ၁၀ နှစ်မှ တစ်သက်တစ်ကျွန်း ပြစ်ဒဏ်အထိ အပြစ်ပေး အရေးယူနိုင်ကြောင်း ဖော်ပြထားသည်။

ပြည်ထောင်စုလွှတ်တော်က အတည်ပြုလိုက်သည့် အဆိုပါ အွန်လိုင်းလိမ်လည်မှု တိုက်ဖျက်ရေးဆိုင်ရာ ဥပဒေကြမ်းကို စစ်အစိုးရ ကိုယ်တိုင်ခန့်သမ္မတ ဦးမင်းအောင်လှိုင်ထံ ဆက်လက်ပို့ဆောင်ပြီး ၎င်းလက်မှတ်ရေးထိုး ထုတ်ပြန်လာပါက ဥပဒေကြောင်းအရ အသက်ဝင် ကျင့်သုံးမည်ဖြစ်သည်။

အတုအယောင် ရွေးကောက်ပွဲမှတဆင့် ပေါ်ပေါက်လာသည့် လွှတ်တော်များမှ ရေးဆွဲပြဋ္ဌာန်းလိုက်သည့် ပထမဆုံး ဥပဒေသည် ကျားဖြန့်တိုက်ဖျက်ရေးအတွက်ဟု ဆိုသော်လည်း တရုတ်-မြန်မာ နယ်စပ်တလျှောက် ကျားဖြန့်ငွေလိမ်လုပ်ငန်း ထွန်းကားရာ တိုင်းရင်းသားလက်နက်ကိုင်တပ်ဖွဲ့ ထိန်းချုပ်နယ်မြေများအထိ မည်သို့ အရေးယူမည်ကို ဆက်လက်လေ့လာ စောင့်ကြည့်ရမည်ဟု လေ့လာသူများက ပြောသည်။

အခြားတစ်ဖက်တွင် ထိုင်း-မြန်မာ နယ်စပ်ရှိ ကျားဖြန့်နေရာများကို ဦးဆောင်လုပ်ကိုင်နေသော ယခင် စစ်တပ်လက်အောက်ခံ BGF နယ်ခြားစောင့်တပ် အသွင်ပြောင်း KNA ခေါင်းဆောင် ဗိုလ်မှူး စောမုတ်သုန်ကို ထိုင်းတရားရုံးတစ်ခုက ကျားဖြန့်လူကုန်ကူးမှု၊ နိုင်ငံဖြတ်ကျော် ရာဇဝတ်မှုများဖြင့် ဇူလိုင်လ (၂၇) ရက်တွင် ဖမ်း၀ရမ်းထုတ်လိုက်ကြောင်း ထိုင်းနိုင်ငံ အထူးစုံစမ်းစစ်ဆေးရေးဌာန (DSI) က အတည်ပြုသည်။