သျှမ်းပြည် မူဆယ်မြို့တွင် အွန်လိုင်းငွေလိမ် ကျားဖြန့်လုပ်ကိုင်သည့် တရုတ်နိုင်ငံသား (၁၇) ဦး အပါအဝင် (၅၅) ဦး ဖမ်းဆီးရမိခဲ့ကြောင်း သတင်းသိရသည်။
ယနေ့ (ဇူလိုင်လ ၂၅ ရက်) နံနက် ၁၀ နာရီခွဲခန့်တွင် မူဆယ်မြို့ စွမ်စော်ရပ်ကွက် စွမ်စော်(၂)လမ်းရှိ နေအိမ်(၂) လုံးကို စစ်တပ်လက်အောက်ခံ သက်ဆိုင်ရာပူးပေါင်းအဖွဲ့များ ဝင်ရောက်စစ်ဆေးခဲ့ရာ အွန်လိုင်းငွေလိမ် ကျားဖြန့်လုပ်ကိုင်နေသည့် တရုတ်နိုင်ငံသား အမျိုးသား (၁၇) ဦးနှင့် မြန်မာနိုင်ငံသားအပါအဝင် စုစုပေါင်း (၅၅) ဦးတို့ကို ဖမ်းဆီးရမိခဲ့ကြောင်း စစ်အစိုးရဘက်မှ ထုတ်ပြန်သည်။
“သတင်းရလို့ စစ်တပ်က ဝင်ဖမ်းတာ၊ အဲ့ထဲမှာ တရုတ်တွေလည်း ပါတယ်။ ကျားဖြန့်တွေက တည်းခိုခန်းလို နေရာမျိုးကို အပြတ်ငှားပြီး လုပ်နေကြတာ။ အခုဖမ်းခံရတာက ပြည်သူ့စစ်တွေကို အခွန်ရှောင်ချင်လို့ ရပ်ကွက်ထဲ အိမ်လိုက်ငှားပြီး လုပ်နေတဲ့ အဖွဲ့သေးသေးလေးတွေ၊ တကယ်တမ်း ဖမ်းချင်ရင် အဲ့လိုလုပ်နေတာ အများကြီး ရှိသေးတယ်” ဟု မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးခံရသူများထဲတွင် မြန်မာနိုင်ငံသား အမျိုးသား (၂၃) ဦးနှင့် အမျိုးသမီး (၁၅) ဦးတို့လည်း ပါဝင်ပြီး စစ်ဆေးမှုများ ဆောင်ရွက်ပြီးပါက တည်ဆဲဥပဒေများနှင့်အညီ အရေးယူသွားမည်ဖြစ်ပြီး ဖုန်း ၃၃ လုံး၊ ကွန်ပျူတာ ၆၀ ကျော်၊ Starlink စက် ၁ လုံးနှင့် ဆိုင်ကယ် ၈ စီးတို့ကိုလည်း ဖမ်းဆီးရမိခဲ့ကြောင်း စစ်အစိုးရထုတ်ပြန်ချက်တွင် ဖော်ပြထားသည်။
အလားတူ ပြီးခဲ့သည့် ဇွန်လ ၂၂ ရက်တွင်လည်း မူဆယ်မြို့ တော်ရွက်ရပ်ကွက်ရှိ အဆောက်အဦတစ်လုံးတွင် ကျားဖြန့်လုပ်ကိုင်နေသည့် တရုတ်နိုင်ငံသား ၂ ဦးနှင့် မြန်မာနိုင်ငံသား ၅၇ ဦး၊ စုစုပေါင် ၅၉ ဦးတို့ကို ဖမ်းဆီးရမိခဲ့သည်။
လက်ရှိတွင် အွန်လိုင်းငွေလိမ် ကျားဖြန့်လုပ်ငန်းများတွင် ပါဝင်ပတ်သက်သူများကို သေဒဏ်အထိ ချမှတ်နိုင်သည့် အွန်လိုင်းလိမ်လည်မှု တိုက်ဖျက်ရေးဆိုင်ရာ ဥပဒေကြမ်းကို စစ်အစိုးရလက်အောက်ခံ ပြည်ထဲရေးဝန်ကြီးဌာနက အတုအယောင်ရွေးကောက်ပွဲမှ ပေါ်ပေါက်လာသည့် အမျိုးသားလွှတ်တော်တွင် ဇွန်လ ၂ ရက်က တင်သွင်းခဲ့ပြီး ဆက်လက်ဆွေးနွေး အတည်ပြုရန် ရှိနေသည်။
အွန်လိုင်းငွေလိမ် ကျားဖြန့်လုပ်ငန်းသည် နိုင်ငံတော်လုံခြုံရေးကို ခြိမ်းခြောက်သည့် ရာဇဝတ်မှုများ ဖြစ်ခြင်းကြောင့် အိမ်နီးချင်းနှင့် ဒေသတွင်းနိုင်ငံများအပြင် နိုင်ငံတကာ အဖွဲ့အစည်းများနှင့်ပါ ပူးပေါင်းနှိမ်နင်းနေရကြောင်း စစ်အစိုးရဘက်က ပြောဆိုထားသည်
Leave a Comments