သျှမ်းပြည်မြောက်ပိုင်း မူဆယ်မြို့တွင် အွန်လိုင်းငွေလိမ်(ကျားဖြန့်)လုပ်ငန်းများ လုပ်ကိုင်နေသည့် တရုတ်နိုင်ငံသား ၁၈ ဦးအပါအဝင် စုစုပေါင်း ၃၁ ဦး ဖမ်းဆီးရမိခဲ့ကြောင်း စစ်ကောင်စီက ထုတ်ပြန်ထားသည်။
ယမန်နေ့ (ဩဂုတ်လ ၂၇ ရက်) မနက် ၁၀ နာရီဝန်းကျင် မူဆယ်မြို့ ကောင်းမူတုံရပ်ကွက်ရှိ နေအိမ်တအိမ်ကို စစ်ကောင်စီတပ်က ဝင်ရောက်စီးနင်းခဲ့ရာ တရုတ်နိုင်ငံသား ၁၈ ဦး၊ မြန်မာအမျိုးသား ၅ ဦးနှင့် မြန်မာအမျိုးသမီး ၈ ဦး စုစုပေါင်း ၃၁ ဦးတို့ကို ဖမ်းဆီးရမိခဲ့ကြောင်း ထုန်ပြန်ချက်တွင် ဖော်ပြထားသည်။
“ဒီနောက်ပိုင်း ကျားဖြန့်တွေက အရင်လို တိုက်ကြီးတွေမှာ ဝင်ဖမ်းတာသိပ်မတွေ့ရဘူး။အခု ဝင်ဖမ်းလိုက်ရင် ရပ်ကွက်ထဲက နေအိမ်တွေမှာပါပဲ။ ကျားဖြန့်တွေကလည်း ခွဲနေပြီး အလုပ်လုပ်ကြတာမျိုးလို့ ပြောလို့ရပါတယ်။”ဟု မူဆယ်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဖမ်းဆီးရာတွင် အွန်လိုင်းငွေလိမ်လုပ်ငန်းတွင် အသုံးပြုသည့် ဖုန်း ၄၂၂ လုံး၊ ကွန်ပျူတာ ၂၀ လုံး၊ Starlink စက် ၂ လုံး၊ Wi-Fi စက် ၂ လုံးနှင့် အခြားဆက်စပ်ပစ္စည်းများကိုလည်း သိမ်းဆည်းရမိခဲ့ကြောင်း သိရသည်။
ပြီးခဲ့သည့် (ဩဂုတ်လ ၂၃ ရက်) မူဆယ်မြို့ ကောင်းမူတုံရပ်ကွက်ရှိ နေအိမ်တစ်အိမ်ကို စစ်ကောင်စီတပ်က ဝင်ရောက်စီးနင်းရာ တရုတ်နိုင်ငံသား ၁ ဦးအပါအဝင် စုစုပေါင်း ၂၀ ဦးကို ဖမ်းဆီးရမိခဲ့ကြောင်း သိရသည်။
Leave a Comments