သျှမ်းပြည် မြောက်ပိုင်း မူဆယ်-နမ့်ခမ်း လမ်းမကြီးပေါ်ရှိ ကချင်လွတ်မြောက်ရေး တပ်မတော် (KIA) စစ်ဆေးရေးဂိတ်တွင် လုံခြုံရေး တာဝန်ယူထားသည့် တပ်သားတဉီးက ဒေသခံ အမျိုးသားတဦးကို သေနတ်ဖြင့် ပစ်ခဲ့ကြောင်း သတင်းရရှိသည်။ 

ယနေ့ (ဩဂုတ်လ ၁၈ ရက်) မနက် ၁၀ နာရီခွဲဝန်းကျင်တွင်  မူဆယ်-နမ့်ခမ်း လမ်းမကြီးပေါ် နမ့်လျှန်ကျေးရွာအနီးရှိ   (KIA) စစ်ဆေးရေးဂိတ် ရှေ့တွင် သဲကားမောင်းလာသည့် အသက် ၃၂နှစ်အရွယ် အမျိုးသားကို KIA တပ်သားက အကြောင်းမဲ့  သေနတ်ဖြင့် ပစ်ခဲ့ကြောင်း မျက်မြင်တွေ့ရှိသည့် ကျေးရွာ ဒေသခံ အမျိုးသားတဉီး ကသျှမ်းသံတော်ဆင့်ကိုပြောသည်။​

“သူက သဲတင်တဲ့ ကားကို မောင်းလာတာ။အဲ့ KIA စစ်ဆေးရေးဂိတ်မှာ အပစ်ခံရတာ။ ဘာကြောင့် ပစ်တာလဲဆိုတာတော့ သေချာမသိသေးဘူး။ ဘယ်ဖက်ပခုံးကို ကျည်ဝင်သွားတာ။တရုတ်ဘက်ကို ပို့လိုက်ရတယ်။ဒီဖက်မှာ ဆေးကုသခံယူဖို့ အဆင်မပြေလောက်လို့ ပိုရတာ” ဟု ၎င်းအမျိုးသားက ဆိုသည်။​

ထို အသက် ၃၂ နှစ်အရွယ်ရှိ နမ့်လျှန်ကျေးရွာ နေထိုင်သည့် အမျိုးသားတဉီး သေနတ်ဖြင့် ပစ်ခတ်ခံရပြီးနောက် ဒေသခံများစုကာ  အဆိုပါစစ်ဆေးရေးဂိတ် ကို သွားရောက်ဖယ်ရှားလိုက်ကြောင်း ၎င်ကဆိုပြန်သည်။ 

“ခုရွာက ဒေသခံတစ်ယောက်ပစ်ခံရပြီးနောက်တော့ ဒေသခံတွေ စုပြီး KIA ရဲ့ သက်ဆိုင်ရာနဲ့ စကားပြောပြီး ဂိတ်ကို ဖယ်ရှားလိုက်တယ်။သူတို့ပြီးခဲ့တာ ဇူလိုင်မှာ ဖြတ်သွား ဖြတ်လာကားတွေကိုလည်း ငွေကောက်ကတည်းက ဒေသခံတွေလည်း အဆင်မပြေဘူး။”ဟု မျက်မြင်တွေ့ရှိသည့် အမျိုးသားကပြောသည်။ 

အဆိုပါဖြစ်စဉ်နှင့် ပတ်သက်၍ ကချင်လွတ်မြောက်ရေးတပ်မတော် (KIA) ၏ ပြောရေးဆိုခွင့်ရှိသူ ဗိုလ်မှူးကြီးနော်ဘူ  သျှမ်းသံတော်ဆင့်က ဖုန်းဖြင့် ဆက်သွယ်ခဲ့သော်လည်း ပြန်လည်ဖြေကြားခြင်းမရှိပေ။

ပြီးခဲ့သည့် ဇူလိုင်လတွင် မူဆယ်-နမ့်ခမ်းလမ်းမကြီးပေါ်တွင် ဖွင့်လှစ်ထားသည့် (KIA) စစ်ဆေးရေးဂိတ်သည် အိမ်စီးကားများ အပြင် ကုန်တင်ကားကြီး၊ ကုန်တင်ကားငယ်များထံမှ ဘီးလိမ့်ခွန် ကောက်ခံနေသဖြင့် ဒေသခံများအကြား မကျေနပ်မှုများရှိခဲ့ကြောင်း သိရသည်။

မူဆယ်နှင့် နမ့်ခမ်းမြို့သည် မိုင် ၁၉ ခန့်သာ ကွာဝေးပြီး အဆိုပါလမ်းပိုင်းတွင် စစ်ကောင်စီ၏ စစ်ဆေးရေးဂိတ် ၂ ဂိတ်၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA)၏ စစ်ဆေးရေးဂိတ် ၂ ဂိတ်၊ကိုးကန့်တပ် (MNDAA) ၏ စစ်ဆေးရေးဂိတ် ၁ ဂိတ်၊ တအာင်းအမျိုးသားလွတ်မြောက်ရေးတပ်မတော် (TNLA) ၏ စစ်ဆေးရေးဂိတ် ၂ ဂိတ်နှင့် KIA ၏ စစ်ဆေးရေးဂိတ် ၁ ဂိတ် စုစုပေါင်း (၈) ဂိတ်ရှိကြောင်း သိရသည်။