သျှမ်းပြည်မြောက်ပိုင်း မူဆယ်မြို့ ဟိုနားနယ်မြေအတွင်းရှိ ငါးပစ်ဂိမ်းဆိုင်တခုတွင် ယနေ့ (ဇူလိုင် ၃၀)ရက် မနက် ၁၁နာရီဝန်းကျင်တွင် ပစ်ခတ်မှုဖြစ်ပွားခဲ့ပြီး အမျိုးသားတစ်ဦး သေဆုံးခဲ့ကြောင်း စုံစမ်းသိရသည်။
အဆိုပါ ဖြစ်စဉ်သည် ယနေ့ (ဇူလိုင်လ ၃၀ ရက်) မနက် ၁၁ နာရီဝန်းကျင် မူဆယ်မြို့ ဟိုနားနယ်မြေ ကောင်းမူတုံရပ်ကွက်ရှိ ငါးပစ်ဂိမ်းဆိုင် လာဆော့သည့် အမျိုးသားတဉီးသည် လုံခြုံရေးအစောင့်ထံမှ သေနတ်လုယူကာ ဂိမ်းဆိုင်အတွင်းရှိ ငါးပစ်ဂိမ်းကစားနေသည့် အခြားအမျိုးသားတစ်ဦးကို ပစ်ခတ်ခဲ့ခြင်းဖြစ်ကြောင်း မူဆယ်မြို့ ဒေသခံ အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ငါးခုံမှာ လာဆော့တဲ့ လူတစ်ယောက်က အစောင့်ဆီကနေ သေနတ်လုပြီးတော့ အဲ့ဒီငါးပစ်ဂိမ်းမှာ ထိုင်ဆော့နေတဲ့ လူကို ပစ်လိုက်တာ။ဘာကြောင့် ပစ်လဲဆိုတာတော့ မသိရသေးဘူး။ ရဲတွေတော့ ပစ်တဲ့လူကို ဖမ်းသွားတယ်” ဟု မူဆယ်မြို့ ဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။
ထိုသေနတ်ပစ်ခတ်ခံရသည့် အမျိုးသားသည် အခင်းဖြစ်ပွားရာနေရာတွင် သေဆုံးခဲ့ပြီး သေဆုံးသူ၏ အမည်၊ အသက်နှင့် နေရပ်လိပ်စာတို့ကို သီးခြားအတည်ပြုနိုင်ခြင်း မရှိသေးပေ။
လက်ရှိတွင် ပစ်ခတ်မှုကျူးလွန်သူ ကိုမင်းခန့်ကို ရဲတပ်ဖွဲ့က ဖမ်းဆီးခေါ်ဆောင်သွား ခဲ့ကြောင်းသိရသည်။
အဆိုပါ ငါးပစ်ဂိမ်ဆိုင်တွင် လုံခြုံရေးယူပေးထားသည့် အစောင့်များသည် မူဆယ်မြို့မ (၂) ပြည်သူ့စစ်အဖွဲ့မှ အဖွဲ့ဝင်းများဖြစ်ကြောင်း ဒေသခံများက ပြောသည်။
မူဆယ်မြို့အနီးတဝှိက်တွင် တိုင်းရင်းသားလက်နက်ကိုင်တပ်ဖွဲ့များ လှုပ်ရှားလျက်ရှိသကဲ့သို့ မြို့အတွင်း၌လည်း စစ်ကော်မရှင်တပ်ဖွဲ့များနှင့် ၎င်း လက်အောက်ခံ ပြည်သူ့စစ်အဖွဲ့ ၁၅ ဖွဲ့ထက်မနည်းလှုပ်ရှားနေကြောင်း သိရသည်။
Leave a Comments