မြန်မာ-တရုတ်နယ်စပ် မူဆယ်မြို့ နှင့် နမ့်ခမ်းမြို့ ရွှေလီမြစ်ဘေးနေထိုင်သည့် ပြည်သူများ၏ နေအိမ်နှင့် လယ်ယာများ ရေမြှုပ်နေကြောင်း သတင်းရရှိသည်။​

ဇူလိုင်လ တတိယပတ်အတွင်း သျှမ်းပြည် မြောက်ပိုင်း နှင့် တရုတ်နိုင်ငံအတွင်း မိုးအဆက်မပြတ်ရွာ သွန်းမှုအပြင် တရုတ်နိုင်ငံမှ ရေကာတာ ရေထုတ်လွှတ်မှုကြောင့် ရွှေလီမြစ်ရေမှာ ရက်ပိုင်း ရေမြင့်တက်လာခြင်းဖြစ်ကြောင်း မူဆယ်မြို့ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အခု ရွှေလီမြစ်က နှစ်ရက်ဆက်တိုက် ရေတွေတက်နေတာ။တောင်ကျရေးကြောင့်လည်းပါတယ်။ တရုတ်ဘက်ကလည်း ရေကာတာဖွင့်တာကြောင့်လည်းပါတယ်။ရေက ၇ ပေ လောက်ကို တက်လာတာ။ မူဆယ်မှာ မြေနိမ့်ပိုင်းအချို့ နှင့် လယ်ယာမြေအချို့ ရေနှစ်မြှုပ်နေကြောင်း” ဟု မူဆယ်မြို့ဒေသခံအမျိုးသားတစ်ဦးက ပြောသည်။

ရွှေလီမြစ်၏ မြစ်လက်တက်ဖြစ်သည့် လောင်းကျန်းမြစ်ပေါ်ရှိ ရေကာတာများမှ ရေထုတ်လွှတ်မည့် အခြေအနေကို တရုတ်အစိုးရဘက်က ပြီးခဲ့သည့် (ဇူလိုင် ၈ ရက်)တွင် တစ်ကြိမ် သတိပေးထုတ်ပြန် ခဲ့ပြီး လက်ရှိတွင်  ထပ်မံသတိပေးထုတ်ပြန်ခြင်း မရှိသေးကြောင်း နမ့်ခမ်းမြို့ဒေသခံ အမျိုးသားတစ်ဦးက ပြောသည်။

“ဒီကြားရက်ထဲ ထပ်သတိပေးတာမရှိဘူး။အခုက မိုးရွာတာကြောင့်ကော၊ ရေကာတာဖွင့်တာကြောင့် ရွာက ပြောင်းခြံတွေ၊ကြံခင်းတွေ၊စပါးခင်းတွေကစ ရေမြှုပ်သွားတယ်။ဘယ်လောက် ဧကရှိလဲဆိုတာ အတိအကျ မပြောနိုင်သေးဘူး။စာရင်းတွေလည်း ကောက်နေပါတယ်။မြစ်ဘေးက ကျေးရွာတွေလည်း ရေမြုပ်ပါတယ်” ဟု ၎င်းကဆိုသည်။ 

လက်ရှိတွင် မြစ်ရေမြင့်တက်လာမှုကြောင့် မူဆယ်မြို့ – နမ့်ခမ်းမြို့ရှိ ရပ်ကွက် နှင့် ကျေးရွာများအပြင် လယ်ယာမြေများ၊ စိုက်ပျိုးရေးခြံများ၏ အခြေအနေကို စာရင်းအတိကျရယူရန်ခက်ခဲနေကြောင်း ၎င်းက ဆက်ပြောသည်။

ပြီးခဲ့သည့် ၂၀၂၅ ခုနှစ် ဇူလိုင်လ ပထမပတ်အတွင်းတွင်လည်း  တရုတ်နိုင်ငံအတွင်း မိုးသည်းထန်စွာ ရွာသွန်းမှုကြောင့် ဆည်များ၏ ရေပိုလွှဲများ ဖောက်ချနေသည့် အကျိုးဆက်သည် ရွှေလီမြစ်ကမ်းဘေး တစ်ကြောရှိ စိုက်ပျိုးမြေများ ရေလွှမ်းမိုးခံရနေပြီး ဧကပေါင်း (၄,၀၀၀) ထပ်မနည်း ရေနှစ်မြုပ် ခဲ့ရသည်။