သျှမ်းပြည်မြောက်ပိုင်း မူဆယ်မြို့တွင် အွန်လိုင်းငွေလိမ် (ကျားဖြန့်) လုပ်ငန်းများ လုပ်ကိုင်နေသည့် တရုတ်နိုင်ငံသားတစ်ဦး အပါအဝင် လူ ၂၀ ဦးကို လုပ်ငန်းသုံးပစ္စည်းများနှင့်အတူ ဖမ်းဆီးရမိခဲ့ကြောင်း စစ်ကောင်စီက သတင်းထုတ်ပြန်သည်။

ယမန်နေ့ (ဩဂုတ်လ ၂၃ ရက်) တွင် မူဆယ်မြို့၊ ကောင်းမူးတုံရပ်ကွက်၊ ကောင်းမူးလွယ်နယ်မြေရှိ နေအိမ်တလုံးကို လုံခြုံရေးပူးပေါင်းအဖွဲ့များက ဝင်ရောက်စစ်ဆေးရာမှ ကျားဖြန့်လုပ်ငန်းများ လုပ်ကိုင်နေသည့် တရုတ်နိုင်ငံသား အမျိုးသားတဦး၊ မြန်မာနိုင်ငံသား အမျိုးသား ၁၇ ဦးနှင့် အမျိုးသမီး ၂ ဦးကို ဖမ်းဆီးရမိခဲ့ကြောင်း ထုတ်ပြန်ချက်တွင်ဖော်ပြထားသည်။

“အခုဖမ်းမိတာလည်း အဖွဲ့ သေးသေးလေးပါ။ဒီနောက်ပိုင်း ကျားဖြန့်တွေလည်း သိပ်မရှိတော့ဘူး။ ကျားဖြန့်တွေက လက်နက်ကိုင်အဖွဲ့တိုင်းနဲ့ ပတ်သက်မှုရှိတယ်။သက်ဆိုင်တွေနဲ့လည်း ဆက်ဆံရေးတွေက ရှိတယ်။ အဖွဲ့ကြီးတွေကတော့ ပိုက်ဆံပေးထားတာ ရှိမှာဆိုတော့ တခြားနေရာတွေ ရွှေ့ပြောင်းထားတာ ဖြစ်နိုင်ပါတယ်။ ဒီတိုင်းဖမ်းနေလည်း လုံးဝပျောက်သွားဖို့ မဖြစ်နိုင်သေးဘူး” ဟု မူဆယ်မြို့နယ်ဒေသခံ အမျိုးသားတစ်ဦက သျှမ်းသံတော်ဆင့်ကို ပြောသည်။

မူဆယ်မြို့တွင် ကျားဖြန့်လုပ်ငန်းများကို လုံခြုံရေးပူးပေါင်းအဖွဲ့များက ကားများဖြင့် မြို့တွင်း လှည့်လည် စစ်ဆေးဖမ်းဆီးမှုများ ပြုလုပ်နေသည်မှာ နှစ်လခန့်ရှိပြီဖြစ်ပြီး သက်ဆိုင်ရာတာဝန်ရှိသူများနှင့် ဆက်စပ်နေနိုင်သည့် ကျားဖြန့်လုပ်ငန်းများလည်း ရွှေ့ပြောင်းမှုများရှိနိုင်ကြောင်း ၎င်းက ပြောသည်။

အဆိုပါ ဖမ်းဆီးရာတွင် ဖုန်းအမျိုးမျိုး ၇၇ လုံး၊ All-in-One ကွန်ပျူတာ ၃ လုံး၊ Laptop ၁ လုံးနှင့် အခြားလုပ်ငန်းသုံး ဆက်စပ်ပစ္စည်းများကိုလည်း သိမ်းဆည်းရမိခဲ့ကြောင်း သိရသည်။

တရုတ်-မြန်မာနယ်စပ်ရှိ ကိုးကန့်နှင့် “ဝ” ဒေသများတွင်လည်း ကျားဖြန့် အွန်လိုင်း ငွေလိမ်လုပ်ငန်းများကို တရုတ်နိုင်ငံ၏ ဖိအားပေးမှုများနောက်ပိုင်း ဖမ်းဆီးရှင်းလင်းမှုများ ပြုလုပ်ခဲ့ပြီး အဆိုပါလုပ်ငန်းနှင့် ဆက်စပ်သူများကို တရုတ်အာဏာပိုင်များထံ လွှဲပြောင်းပေးမှုများ ရှိခဲ့သည်။ 

ထိုသို့ ကျားဖြန့်တိုက်ဖျက်ရေးလုပ်ငန်းများ ဆက်လက်လုပ်ဆောင်နေချိန်တွင် ဩဂုတ်လအတွင်း ကိုးကန့်တပ်ဖွဲ့ (MNDAA) နှင့် “ဝ”တပ်ဖွဲ့ (UWSA) တို့သည် ကိုးကန့်ဒေသ လောက်ကိုင်မြို့တွင် ကျားဖြန့်တိုက်ဖျက်ရေးအပါအဝင် တရားရေးရာ ပူးပေါင်းဆောင်ရွက်ရန် နားလည်မှုစာချွန်လွှာ (MOU) လက်မှတ်ရေးထိုးခဲ့ကြောင်း “ဝ”တပ်ဖွဲ့က ထုတ်ပြန်ထားသည်။

အဆိုပါ MOU တွင် ကျားဖြန့်နှင့် မူးယစ်ဆေးဝါးဆိုင်ရာ ရာဇဝတ်မှုများ တိုက်ဖျက်ရေး၊ သတင်းအချက်အလက် ဖလှယ်ရေးနှင့် အမှုနှင့်ပတ်သက်သူများအား အပြန်အလှန် စုံစမ်းဖမ်းဆီး၍ လွှဲပြောင်းပေးရေးတို့ ပူးပေါင်းဆောင်ရွက်ရန် ပါဝင်ကြောင်း သိရသည်။

ကိုးကန့်နှင့် “ဝ” ဒေသများတွင် ကျားဖြန့်လုပ်ငန်းများကို ဖမ်းဆီးရှင်းလင်းမှုများ ပြုလုပ်လာပြီးနောက် မြန်မာနိုင်ငံအတွင်း အခြားဒေသများတွင်လည်း အွန်လိုင်းလိမ်လည်မှုလုပ်ငန်းများနှင့် ဆက်စပ်သူများ ဖမ်းဆီးရမိသည့် ဖြစ်စဉ်များ ဆက်လက်ရှိနေသည်။