သျှမ်းပြည်တောင်ပိုင်း ကျေးသီးမြို့နယ်အတွင်း အွန်လိုင်းငွေလိမ် ကျားဖြန့် လုပ်ငန်းများ လုပ်ကိုင်နေသည့် တရုတ်နိုင်ငံသား ၂၃ ဦးကို လုပ်ငန်းသုံးပစ္စည်းများနှင့်အတူ ဖမ်းဆီးရမိခဲ့ကြောင်း သိရသည်။

ယမန်နေ့ (ဩဂုတ်လ ၂၀ ရက်) တွင် စစ်ကောင်စီတပ် စစ်ကြောင်းများက ကျေးသီးမြို့နယ်အတွင်း ရှာဖွေဖော်ထုတ်ရာမှ ကျေးသီးမြို့၊ ဝမ်ဖွန်းကျေးရွာ၏ မြောက်ဘက် နှင့် ပုံလုံကျေးရွာ၏ အရှေ့မြောက်ဘက်တွင် ယာယီတဲများ ဆောက်လုပ်ကာ ကျားဖြန့်လုပ်ငန်းကိုင်နေသည့် တရုတ်နိုင်ငံသား ၁၀ ဦးကို ဦးစွာ ဖမ်းဆီးရမိခဲ့ကြောင်း စစ်ကော်မရှင်က ထုတ်ပြန်ထားသည်။ 

ဆက်လက်ရှာဖွေရာတွင် ပုံလုံကျေးရွာ၏ အနောက်မြောက်ဘက်ဘက်မှ တရုတ်နိုင်ငံသား ၆ ဦးနှင့် မြောက်ဘက်တွင် တရုတ်နိုင်ငံသား ၇ ဦးကို ထပ်မံဖမ်းဆီးရမိခဲ့သဖြင့် စုစုပေါင်း ၂၃ ဦး ဖမ်းဆီးရမိခဲ့ကြောင်း သိရသည်။

“မနေ့က ထပ်ပြီး‌ ကျေးသီးမြို့နယ်ထဲမှာ ဖမ်းမိတဘ်။သူတို့ကြည့်ရတာ အဲ့ကျားဖြန့် သူတို့လုပ်ကိုင်တဲ့ ပုံစံတွေ ပြောင်းလဲလာတယ်။အရင်လို လူအမျိုးကြီး မစုနေတော့ဘူး။တစ်နေရာကို နည်းနည်းနဲ့ ခွဲနေကြတာ။”ဟု ကျေးသီးမြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် Starlink စက် ၄ လုံး ၊ ဖုန်း ၂၆ လုံး၊ Tablet ၂ လုံး၊ Laptop ၁ လုံး၊ Network လိုင်းခွဲ Box ၈ ခု၊ Wi-Fi စက် ၁၂ ခု၊ ငွေဖြတ်စက် ၄ လုံးနှင့် မီးစက်၊ ရေခဲသေတ္တာများအပါအဝင် လုပ်ငန်းသုံးပစ္စည်းများကို သိမ်းဆည်းရမိခဲ့ကြောင်း ထုတ်ပြန်ချက်တွင် ဖော်ပြထားသည်။

ယခုဖမ်းဆီးရမိထားသည့် တရုတ်နိုင်ငံသား ၂၃ ဦးအား တည်ဆဲဥပဒေများနှင့်အညီ အရေးယူနိုင်ရေး စစ်ဆေးမှုများ ဆက်လက်ပြုလုပ်နေပြီး သိမ်းဆည်းရမိသည့် လုပ်ငန်းသုံးပစ္စည်းများကိုလည်း လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း စစ်ကောင်စီက ထုတ်ပြန်ထားသည်။

“ အခု ကျားဖြန့်တွေ ကျေးသီးမြို့နယ်ထိရောက်လာတာက လက်နက်ကိုင်တပ်ဖွဲ့တွေမပါရင် မရောက်ဘူး။ ဘယ်အဖွဲ့က ခေါ်လာလဲဆိုတာ သိမှာပါ။” ဟု ကျေးသီး ဒေသခံတဉီးက သျှမ်းသံတော်ဆင့်ကိုပြောသည်။​

ကျေးသီးမြို့နယ်အတွင်း တွင် စစ်ကော်မရှင်တပ်၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော်(SSPP/SSA) ထိန်းချုပ်သည့်ဒေသဖြစ်သည်။

“ကျနော်တို့ SSPP မှာက ကျားဖြန့်ကို လုံခြုံရေးပေးရင် ပြစ်ဒဏ်ပေးပါတယ်။ SSPP အောက်ခြေကလူတွေ လုပ်ခဲ့တာရှိပါတယ်။ အခုက ကျားဖြန့်နဲ့ပတ်သက်ပြီး ပြစ်ဒဏ်ကြီးတော့ မလုပ်ကြတော့ဘူး။ ပြည်သူစစ်တွေလည်းခေါ်လာတာရှိတယ်” ဟု SSPP နှင့် နီးစပ်သူတဉီးက သျှမ်းသံတော်ဆင့်ကိုပြောသည်။ 

ယခုနောက်ပိုင်း SSPP ထိန်းချုပ်သည့်နယ်မြေအတွင်း ကျားဖြန့် လုပ်ကိုင်သူများကို ဖမ်းဆီးရမိခဲ့လျှင် သက်ဆိုင်ရာ အာဏာပိုင်များက ခေါ်ယူစစ်ဆေးခြင်း၊ ကြီးလေးသည့် ပြစ်ဒဏ်ပေးခြင်းတို့ကို လုပ်ဆောင်ကြောင်းလည်း ၎င်းက ပြောပြသည်။ 

ယခု သြဂုတ်လ အတွင်း သျှမ်းပြည်တွင် ပျံ့နှံနေသည့်  ကျားဖြန့်လုပ်ငန်း လုပ်ကိုင်သူများကို လဲချားမြို့နယ်၊ ကျေးသီးမြို့နယ်၊ နမ့်စန်မြို့နယ် နှင့် တာချီလိတ်မြို့နယ်တို့တွင် ဖမ်းဆီးရမိခဲ့ကြောင်း သိရသည်။