သျှမ်းပြည်မြောက်ပိုင်း မူဆယ်မြို့နယ်အတွင်း အခြေစိုက်သည့် အွန်လိုင်းငွေလိမ်လည်မှု (ကျားဖြန့်) ဝန်းတစ်ခုကို သျှမ်းပြည်တိုးတက်ရေးပါတီ (SSPP) က ဝင်ရောက်စီးနင်းခဲ့ကြောင်း ဒေသခံများထံမှ သိရသည်။

ပြီးခဲ့သည့် ဩဂုတ်လ ၁၃ ရက်နေ့တွင် မူဆယ်မြို့နယ် မော်တောင်းကျေးရွာအုပ်စုရှိ ခိုတိန်ရွာ ကျားဖြန့်ဝန်းကို SSPP က ဝင်ရောက်စီးနင်းခဲ့ခြင်းဖြစ်ပြီး အဆိုပါစီးနင်းမှုအတွင်း သျှမ်း၊ ဗမာနှင့် တရုတ်နိုင်ငံသား အများအပြား ဖမ်းဆီးခံခဲ့ရကြောင်း မူဆယ်မြို့ဒေသခံ အမျိုးသားတစ်ဦးက ပြောသည်။

“SSPP က တကယ်သွားဖမ်းတာတော့ ဟုတ်တယ်။ အဲ့မှာ အလုပ်လုပ်နေတဲ့ သျှမ်းတွေရော၊ ဗမာတွေရော၊ တရုတ်တွေရော ဖမ်းထားတယ်။ အဓိကတော့ တရုတ်တွေကို ဖမ်းထားတာ များတယ်။ ဒါပေမဲ့ ဘယ်နှစ်ယောက် ဖမ်းထားလဲဆိုတာတော့ အတိအကျ မသိရဘူး” ဟု ၎င်းက သျှမ်းသံတော်ဆင့်ကို ပြောသည်။

အဆိုပါ ကျားဖြန့်ဝန်းကို စစ်တပ်နှင့် တရုတ်ရဲတပ်ဖွဲ့တို့ ပူးပေါင်းဖမ်းဆီးခြင်းဖြစ်သည်ဆိုသည့် သတင်းများ ထွက်ပေါ်နေသော်လည်း ယင်းမှာ မဟုတ်မမှန်ကြောင်း ၎င်းက အတည်ပြုသည်။

စီးနင်းခံရသည့် နေရာသည် “၁၀၂၇ စစ်ဆင်ရေး” မတိုင်မီကတည်းက ကျောင်းကြီးတစ်ကျောင်းစာခန့် ကျယ်ဝန်းသော ခြံဝင်းအတွင်း နှစ်ထပ်ဆောင်များနှင့် ဂိုထောင်အများအပြားဖြင့် တိုးချဲ့တည်ဆောက်ထားသည့် ကျားဖြန့်ဝန်းကြီး တစ်ခုဖြစ်ကြောင်း သိရသည်။

ယခင်က အဆိုပါကျားဖြန့်ဝန်းကို SSPP တပ်ဖွဲ့ဝင်များကပင် လုံခြုံရေးယူပေးထားခဲ့ခြင်းဖြစ်ပြီး၊ ယခုအခါ တရုတ်နိုင်ငံ၏ ဖိအားကြောင့်သာ စီးနင်းမှုပြုလုပ်ခဲ့ခြင်းဖြစ်နိုင်ကြောင်း ဒေသခံများက ပြောကြသည်။

သို့သော်လည်း အရေးပါသည့် ကျားဖြန့်သမားများနှင့် လူများကို ကြိုတင်ရွှေ့ပြောင်းပေးခဲ့ပြီးမှ ဝင်ရောက်စီးနင်းခဲ့ခြင်း ဖြစ်သဖြင့် ဟန်ပြစီးနင်းမှုသာဖြစ်သည်ဟု ဝေဖန်မှုများလည်း ရှိနေသည်။

ဩဂုတ်လ ၁၅ ရက်နေ့တွင် SSPP ဘက်မှ လုံခြုံရေး ပြန်လည်ရုပ်သိမ်းသွားပြီးနောက် ကျားဖြန့်ဝန်းအတွင်း ကျန်ရှိနေသည့် အိမ်သုံးပစ္စည်းများ၊ လျှပ်စစ်ပစ္စည်းများနှင့် ဆောက်လုပ်ရေးပစ္စည်းများကို ဒေသခံများက အလုံးအရင်းဖြင့် ဝင်ရောက်ယူဆောင်ခဲ့ကြသည်။

“အခု မူဆယ်မြို့ပေါ်မှာလည်း ကျားဖြန့်တွေ အရင်လို အကြီးအကျယ် မရှိတော့ဘူး။ တရုတ်ဖိအားရော၊ စစ်တပ်က ဖမ်းတာရောကြောင့် ၁၀ ယောက်၊ အယောက် ၂၀ လောက်ပဲ စုလုပ်နေကြတဲ့ အဖွဲ့ငယ်လေးတွေပဲ ရှိတော့တယ်” ဟု မူဆယ်မြို့ခံတစ်ဦးကလည်း ပြောသည်။

ကျားဖြန့်လုပ်ငန်းများကြောင့် ဒေသခံအချို့မှာ ထမင်းချက်၊ အဝယ်တော်နှင့် ဘာသာပြန်အလုပ်များဖြင့် ဝင်ငွေရရှိမှုရှိသော်လည်း ရပ်ရွာအတွက် အကျိုးပြုသည့် လုပ်ငန်းများမဟုတ်ကြောင်း ဒေသခံများက ဆိုသည်။

ခိုတိန်ရွာတည်ရှိရာ ဒေသသည် ညီနောင်မဟာမိတ်တပ်ဖွဲ့များ၏ အုပ်ချုပ်ရေးနယ်မြေအတွင်း ပါဝင်သော်လည်း KIA နှင့် SSPP တို့က သီးခြားစိုးမိုးထားသဖြင့် အုပ်ချုပ်ရေးရှုပ်ထွေးသည့် ဒေသဖြစ်သည်။

သို့သော် ဒေသပတ်ပတ်လည်တွင် ရက္ခိုင့်တပ်တော် (AA) နှင့် ကိုးကန့်တပ် (MNDAA) တို့က အထိုင်နေရာယူထားကြသဖြင့် စစ်ကော်မရှင်တပ် လုံးဝဝင်ရောက်နိုင်ခြင်းမရှိဘဲ SSPP စိုးမိုးနယ်မြေသာ ဖြစ်သည်။

ယခုဖြစ်စဉ်နှင့် ပတ်သက်၍ SSPP တာဝန်ရှိသူများထံသို့ အတည်ပြုနိုင်ရန် သျှမ်းသံတော်ဆင့်မှ ဆက်သွယ်မေးမြန်းခဲ့ သော်လည်း အကြောင်းပြန်ကြားခြင်း မရှိသေး သကဲ့သို့ စစ်ကော်မရှင် ဝါဒဖြန့် မီဒီယာများတွင်လည်း ဖော်ပြထားခြင်း မရှိပေ။