ထိုင်းနိုင်ငံမြောက်ပိုင်း ချင်းရိုင်းခရိုင်တွင် နာမည်ကျော်ကြားသော ကျောင်းထိုင်ဆရာတော်တစ်ပါးထံ Call Center ငွေလိမ်ဂိုဏ်းတခုက ငွေ ဘတ် ၉သန်း နီးပါး လိမ်လည်သွားကြောင်း ချင်းရိုင်းသတင်းတွင် ဖော်ပြထားသည်။

ထိုငွေများသည့် ကျောင်းတိုက်၏ ဘဏ်အကောင့်ရှိ ငွေကြေးများဖြစ်ပြီး၊ ကျောင်းတိုက်၏ ဘဏ်အကောင့်များအတွင်းရှိ ငွေကြေးအားလုံးနီးပါး ဆုံးရှုံးခဲ့ရသဖြင့် ကျောင်းထိုင်ဆရာတော်အဖြစ်မှ နုတ်ထွက်ရကြောင်း သိရသည်။

ယခုဖြစ်စဉ်သည် ချင်ရိုင်းခရိုင်၊ မယ့်ချန်းမြို့နယ်ရှိ Wat Mae Kham ကျောင်းတိုက်တွင် ဖြစ်ပွားခဲ့ပြီး သက်တော် ၆၄ နှစ်ရှိ ကျောင်းထိုင်ဆရာတော် Phra Maha Norkaew Inthapanyo ထံသို့ ရာဇဝတ်မှုများကို စုံစမ်းစစ်ဆေးနေသည့် ရဲအရာရှိများအဖြစ်ဟန်ဆောင်ဖုန်းဆက်ပြီးနောက် လိမ်လည်မှုများဖြစ်ပွားခဲ့ခြင်းဖြစ်သည်။

လိမ်လည်သူများမှ ဘုန်းကြီးကျောင်းတိုက်၏ ဘဏ်အကောင့်များသည် တရားမဝင် ငွေကြေး ကွန်ရက်တခုနှင့် ဆက်စပ်နေသည်ဟု ယုံကြည်အောင် ပြောဆိုခဲ့ပြီး၊ ငွေလိမ်ဂိုဏ်းများနှင့် ဆက်စပ်မှုမရှိကြောင်း၊ အပြစ်မရှိကြောင်း သက်သေပြရန်နှင့် အစိုးရ၏ စစ်ဆေးမှုကို ခံယူရန်အတွက် ထိုကျောင်းတိုက်ရန်ပုံငွေများကို လျှို့ဝှက်ပေးပို့ရန် စေခိုင်းခဲ့သည်။

ဆရာတော်သည် ၂၀၂၅ ခုနှစ် အစောပိုင်းမှ ၂၀၂၆ ခုနှစ် ဇူလိုင်လအထိ ၁ နှစ်ကျော်ကာလအတွင်း ၎င်း၏ ကိုယ်ပိုင်စုငွေနှင့် ကျောင်းတိုက်၏ တရားဝင် ဘဏ်အကောင့်များအတွင်းမှ ငွေများကို ဘဏ်မှတစ်ဆင့် အကြိမ်ပေါင်း ၂၀၇ ကြိမ်တိတိ လွှဲပြောင်းပေးခဲ့မိသည်။

MGR Online သတင်းဌာန၏ ဖော်ပြချက်အရ ခိုးယူခံလိုက်ရသည့် စုစုပေါင်း ငွေပမာဏသည် ထိုင်းဘတ်ငွေ ၈,၇၄၅,၁၈၇ (ဘတ် ၈ သန်း ၇ သိန်းကျော်) အထိ ရှိခဲ့သည်။

လိမ်လည်ခံရကြောင်း သိပြီးနောက်တွင် ဘတ်ငွေ ၉ သန်းနီးပါးမှာ လုံးဝ ပျောက်ကွယ်သွားခဲ့ပြီဖြစ်ပြီး၊ ဒေသတွင်း သံဃာ့နာယက အဖွဲ့က ကျောင်းတိုက်၏ ဂုဏ်သိက္ခာနှင့် ပိုင်ဆိုင်မှုများကို ပိုမိုထိခိုက် ပျက်စီးမည်ကို တားဆီးရန်အတွက် ၎င်းကျောင်းထိုင်ဆရာတော်အား သာသနာရေးဆိုင်ရာ တာဝန်အရပ်ရပ်မှ ဆိုင်းငံ့ကြောင်း တရားဝင် အမိန့်ထုတ်ပြန်ခဲ့သည်။

လက်ရှိတွင် ရဲအရာရှိများမှ အဆိုပါ ဒုစရိုက်ကွန်ရက်ကို စုံစမ်းဖော်ထုတ်ရန် သက်သေအထောက်အထားများ စုဆောင်းနေပြီး၊ အာဏာပိုင်များကလည်း အစိုးရအရာရှိအဖြစ် ဟန်ဆောင်ခေါ်ဆိုသည့် သံသယဖြစ်ဖွယ် ဖုန်းများကို ရဲစခန်းသို့ တိုက်ရိုက် စိစစ်အတည်ပြုကြရန်နှင့် မသိရှိသော ဘဏ်အကောင့်များသို့ ငွေလွှဲပြောင်းခြင်း လုံးဝ မပြုလုပ်ကြရန် ပြည်သူများကို သတိပေးထားသည်။

ကိုးကား – Chiang Rai Times