သျှမ်းပြည်အတွင်းရှိ စစ်ကော်မရှင် အပါအဝင် တိုင်းရင်းသားလက်နက်ကိုင်ပေါင်းစုံတို့သည် အွန်လိုင် ငွေလိမ်လည်မှု (ကျားဖြန့် )တိုက်ဖျက်မှုကို ပြုလုပ်သွားမည်ဟု ကြွေးကြော်နေသော်လည်း လက်ရှိအချိန်ထိ ဆက်လက် ကြီးထွား နေသေးကြောင်း စုံစမ်းသိရသည်။

ယမန့်နေ့( သြဂုတ် ၄)ရက် တွင် သျှမ်းပြည် တောင်ပိုင်း နမ့်စန်မြို့နယ် နမ့်လစ်ကျေးရွာအုပ်စု နားရိုင်းရွာသစ် ကျေးရွာ၏ တောင်ဘက်တွင် တရုတ်နိုင်ငံသားများ ဉီးဆောင် ဖွင့်လှစ်ထားသည့် အွန်လိုင်ငွေလိမ်လည် သည့်နေရာတစ်ခုကို စစ်ကော်မရှင်တပ်က သွားရောက်ဖမ်းဆီးခဲ့သည်။

ထိုဖမ်းဆီးမှုတွင် တရုတ်နိုင်ငံသားများအပါအဝင် ကျားဖြန့်သမား ၄၉ဉီးနှင့် လက်နက်ခဲယမ်းများနှင့် လုပ်ငန်းသုံးပစ္စည်းများကိုလည်း သိမ်းဆည်းရမိကြောင်း စစ်ကော်မရှင်၏ ထုတ်ပြန်ချက်အရ သိရသည်။

“ကျားဖြန့်တွေက အဲ့ဘက်မှာ လှုပ်ရှားနေတာ ၃နှစ်ဝန်းကျင်လောက်ရှိပြီ။ အခုလည်း ဟန်ပြဖမ်းတာပါပဲ။ဖမ်းမိတာတောင် လက်နက်တွေပါတယ်လေ။လက်နက်ကိုင် တပ်ဖွဲ့နဲ့ချိတ်ဆက်ပြီး လုပ်နေတဲ့သဘောပဲ။အခုနမ့်စန်မှာဖမ်းမိတဲ့ နေရာဟာဆိုရင် နားရိုင်းပြည်သူ့စစ်တွေရဲ့ နယ်မြေပါ” ဟု နမ့်စန်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ဖမ်းဆီးမှုတွင် တရုတ်နိုင်ငံသား အမျိုးသား ၃၆ ဦးနှင့် အမျိုးသမီး ၂ ဦး၊ မြန်မာနိုင်ငံသား အမျိုးသား ၇ ဦးနှင့် အမျိုးသမီး ၄ ဦး စုစုပေါင်း ၄၉ ဦးကို ဖမ်းဆီးရမိခဲ့သည်။

ထို့အပြင် P-365 အမျိုးအစား ပစ္စတိုတစ်လက်၊ UZI အမျိုးအစား ပစ္စတိုတစ်လက်၊ AK-47 မောင်းပြန် ရိုင်ဖယ် နှစ်လက်၊ ကျည်အိမ်များနှင့် ကျည်ဆန်များအပြင် ဖုန်းမျိုးစုံ ၆၇ လုံး၊ All in One ကွန်ပျူတာ ၄ လုံး၊ CPU တစ်လုံးနှင့် Starlink စက် ၆ စုံတို့ကိုလည်း သိမ်းဆည်းရမိခဲ့ကြောင်း သိရသည်။

ယခု ဖမ်းဆီးရမိသည့် နမ့်စန်မြို့နယ် နားရိုင်းရွာသစ်ကျေးရွာသည် နားရိုင်း ပြည်သူ့စစ်နယ်မြေဖြစ်ပြီး စကျားဖြန့်တိုက်ဖျက်ရေး ကိစ္စနှင့်ပတ်သက်ပြီး စစ်ကော်မရှင်၏ လက်အောက်ခံပြည်သူ့စစ်များက တစ်စုံတရာ ထွက်ပေါ်ပြောဆိုခြင်း၊ ကျားဖြန့် တားဆီးမှုများပြုလုပ်ခြင်းမရှိကြပေ။

“ကျားဖြန့်တွေ အများစုက ပြည်သူ့စစ်ထိန်းချုပ်တဲ့နယ်မြေမှာလုပ်နေတာများတယ်။ ပြည်သူ့စစ်တွေက ကျားဖြန့်တိုက်ဖျက်မယ်ဆိုပြီး ပြောဆိုတာ မရှိဘူး။ပြည်သူ့စစ်အုပ်စုတွေကလည်း စစ်ကော်မရှင်ရဲ့လက်အောက်ခံ အဖွဲ့တွေပဲလေ။ဒါဆိုရင် ချိတ်ဆက်တာကြည့်လို့ရပါတယ်” ဟု နမ့်စန် ဒေသခံ အမျိုးသားက ဆိုသည်။

ပြီးခဲ့သည့် ၂၀၂၃ ခုနှစ်မှစတင်ကာ တရုတ်နယ်နိမိတ်အတွင်း လုပ်ကိုင်နေသည့် ကျားဖြန့်လုပ်ငန်းများကို တိုက်ဖျက်ရန် တရုတ်နိုင်ငံက ဖိအားပေးခဲ့သည်။

သို့သော် ကျားဖြန့်လုပ်ငန်းများသည် “ဝ” တပ်ဖွဲ့ နှင့် ကိုးကန့်တပ်ဖွဲ့ ထိန်းချုပ်နယ်မြေများမှ သံလွင်မြစ် အနောက်ဘက်ခြမ်းသို့ ရွှေ့ပြောင်းလာကာ သျှမ်းပြည်အပါအဝင် မြန်မာနိုင်ငံတဝှိမ်းကို ဆက်လက် ပျံ့နှံ့လာကြောင်း သျှမ်းပြည် နိုင်ငံရေးလေ့လာသုံးသပ်သူတဉီး သျှမ်းသံတော်ဆင့်ကို ပြောသည်။

“အခုဆိုရင် ကျားဖြန့်လုပ်ငန်းက သျှမ်းပြည်ကနေ ရန်ကုန်၊ မန္တလေး၊ ကရင်နဲ့ တနင်္သာရီတိုင်းအထိ လှုပ်ရှားနေကြတယ်လေ” ဟု ၎င်းက ပြောသည်။

ကျားဖြန့်လုပ်ငန်းများကို တစ်ဖက်တွင် တိုက်ဖျက်နေသည်ဟု ပြောဆိုနေသော်လည်း အခြားတစ်ဖက်တွင် သက်ဆိုင်ရာ အာဏာရှိ လက်နက်ကိုင်အဖွဲ့အစည်းများက လက်ခံကာ အကာအကွယ်ပေးနေခြင်းနှင့် အကျိုးစီးပွားဆက်နွယ်မှုများရှိနေခြင်းကြောင့် ယင်းလုပ်ငန်းများ အမြစ်ပြတ်ပပျောက်ခြင်း မရှိသေးကြောင်း သျှမ်းပြည် နိုင်ငံရေး လေ့လာသုံးသပ်သူက ထောက်ပြပြောဆိုသည်။

“လက်တွေ့ကျတော့ ကျားဖြန့်တိုက်ဖျက်နေတယ်လို့ ပြောပေမယ့် တစ်ဖက်ကလည်း ကူညီဖေးမ နေတယ်လို့ မြင်မိတယ်။အာဏာရှိတဲ့ လက်နက်ကိုင်အဖွဲ့အစည်းအားလုံးက တနည်းတဖုံနဲ့ ကျားဖြန့်လုပ်ငန်းတွေကို လက်ခံထားတဲ့ အနေအထားကြောင့် ပျောက်ကွယ်မသွားတာပါ။ ဒီလိုနည်းနဲ့ ဆက်သွားရင် ကျားဖြန့်က ဘယ်လိုမှ အမြစ်ပြတ်ပပျောက်သွားနိုင်မှာ မဟုတ်ဘူး” ဟု ၎င်းကဆိုသည်။

စစ်ကော်မရှင်လက်အောက်ခံ ပြည်သူ့စစ်အဖွဲ့များသည် စစ်တပ်လက်အောက်ခံ လက်နက်ကိုင်အဖွဲ့များ ဖြစ်ပြီး နိုင်ငံရေးရပ်တည်ချက်ထက် စီးပွားရေးအကျိုးစီးပွားအတွက် လက်နက်ကိုင်ထားသည့် အဖွဲ့များဖြစ်ကြောင်း၊ စစ်တပ်က ထိရောက်စွာ ကိုင်တွယ်ဖြေရှင်းလိုစိတ်ရှိလျှင် ပြည်သူ့စစ်ထိန်းချုပ်နယ်မြေများအတွင်းရှိ ကျားဖြန့်လုပ်ငန်းများကိုလည်း ဖယ်ရှားနိုင်မည်ဖြစ်ကြောင်း ၎င်းက ဆက်ပြောသည်။

ထို့အပြင် တိုင်းရင်းသားလက်နက်ကိုင်အဖွဲ့အစည်းများအနေဖြင့်လည်း ကျားဖြန့်လုပ်ငန်းများကို တိုက်ဖျက်မည်ဟု ပြောဆိုနေသော်လည်း တစ်ဖက်တွင် ယင်းလုပ်ငန်းများကို လက်ခံထားကာ ငွေကြေးအကျိုးအမြတ်များ ရယူနေကြောင်း သိရသည်။

သျှမ်းပြည်မြောက်ပိုင်း အတွင်း ၂၀၂၃ခုနစ် အောက်တိုဘာ ၂၇ တွင် ဖြစ်ပွားခဲ့သည့် “၁၀၂၇ စစ်ဆင်ရေး”သည်လည်း ကျားဖြန့်အမြစ်ဖြတ် တိုက်ဖျက်မည်ဆိုသည် အချက်တခုအပါအဝင် ညီနောင်မဟာမိတ် ကိုးကန့်တပ်ဖွဲ့ (MNDAA) ၊ တအာင်း(ပလောင်) အမျိုးသားလွတ်မြောက်ရေးတပ် (TNLA)နှင့် ရက္ခိုင့်တပ်တော် (AA)တို့က စစ်ကော်မရှင်တပ်ကို တိုက်ခိုက်ခဲ့သည်။

ထို့ပြင် တိုင်းရင်းသားလက်နက်ကိုင် တပ်ဖွဲ့ ဖြစ်သည် ’ဝ’ပြည် သွေးစည်းညီညွတ်ရေးတပ်မတော် (UWSP/UWSA) ထိပ်ပိုင်းခေါင်းဆောင်များနှင့် အခြား လက်နက်ကိုင်များသည့် စစ်ကော်မရှင် အစိုးရနှင့် နေပြည်တော်တွင် သွားရောက်တွေ့ဆုံရာတွင်လည်း အွန်လိုင်း လိမ်လည်မှု (ကျားဖြန့်)လုပ်ငန်း၊ မူးယစ်ဆေးဝါး တိုက်ဖျက်ရေးကို ပူးပေါင်းလုပ်ဆောင်မည်ဟု ပြောဆိုဆွေးနွေးခဲ့ပြန်သည်။
3m