သျှမ်းပြည်မြောက်ပိုင်း မဘိမ်းမြို့ပေါ်နှင့် ဘဟဲကျေးရွာတို့ကို စစ်တပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် လူထိခိုက်မှုရှိကြောင်း စုံစမ်းသိရသည်။

ယနေ့ (ဇူလိုင်လ ၃၀ ရက်) ညနေ ၃ နာရီခွဲကျော်တွင် ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့ပေါ် ရဲစခန်း နေရာဟောင်းနှင့် ဘဟဲကျေးရွာတို့ကို စစ်တပ်က လေကြောင်းမှ Yak-130 ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ အမျိုးသမီးနှင့် ကလေးအပါအဝင် ၅ ဦးထက်မနည်း ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

“မဘိမ်းမြို့ပေါ်နဲ့ တောင်ဘက်က မြစ်ဆုံဘက်နားမှာ ဗုံးတစ်လုံးစီ ချသွားတယ်။ မြို့ပေါ်မှာက ရဲစခန်း နေရာဟောင်းနား ကျတယ်။ မြစ်ဆုံဘက်က ဘဟဲရွာနား ကျပြီးတော့ ၅ ယောက်လောက် ထိတယ်။ ကလေးတစ်ယောက်တော့ သိတယ်၊ ကျန်တာ အမျိုးသမီးလည်း ပါတယ်” ဟု မိုးမိတ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကချင်လွတ်လပ်ရေးတပ် KIA ထိန်းချုပ်ထားသည့် မဘိမ်းမြို့ပေါ်နှင့် အနီးဝန်းကျင် ကျေးရွာများသို့ စစ်တပ်က လေကြောင်းဗုံးကြဲ တိုက်ခိုက်ခဲ့ခြင်းနှင့် ပတ်သက်ပြီး KIA ပြောရေးဆိုခွင့်ရှိသူ ဗိုလ်မှူးကြီးနော်ဘူထံ သျှမ်းသံတော်ဆင့်မှ ဖုန်းဖြင့်ဆက်သွယ် မေးမြန်းခဲ့သော်လည်း လတ်တလောတွင် သတင်းပြန်ကြားရေး မလုပ်ကြောင်းသာ ပြန်လည်ဖြေကြားခဲ့သည်။

ပြီးခဲ့သည့် ဇူလိုင်လ ၂၈ ရက် နံနက်ပိုင်းကလည်း မဘိမ်းမြို့ပေါ် ရပ်ကွက်(၂) တိုက်ကုန်းရပ်ကွက်ရှိ ဆေးရုံနှင့် ရပ်ကွက်(၃) ကုန်းခါးရပ်ကွက်ရှိ ရဲစခန်း အနီးတဝိုက်ကို စစ်တပ်က လေကြောင်းဗုံးဖြင့် လေးကြိမ် ကြဲချတိုက်ခိုက်ခဲ့ရာ ပြည်သူ(၁၀) ဦးထက်မနည်း သေဆုံး ဒဏ်ရာရရှိခဲ့သည့်အပြင် နေအိမ်အများအပြားလည်း ထိခိုက်ပျက်စီးခဲ့ကြောင်း ဒေသခံများက ပြောသည်။

မဘိမ်းမြို့ပေါ် အဆိုပါ လေကြောင်းတိုက်ခိုက်မှုအတွင်း မိုးမိတ်ပြည်သူ့ကာကွယ်ရေး (ပကဖ) တပ်ဖွဲ့ဝင်နှစ်ဦးလည်း ကျဆုံးခဲ့ကြောင်း ဒေသခံများက ပြောဆိုသော်လည်း သျှမ်းသံတော်ဆင့်မှ သီးခြားအတည်ပြုနိုင်ရန် ဆက်လက်စုံစမ်းနေသည်။

မဘိမ်းမြို့နယ်ကို ကချင်လွတ်လပ်ရေးတပ် KIA မှ ၂၀၂၄ ခုနှစ်ကတည်းက ၂ နှစ်ကျော် ထိန်းချုပ်ထားပြီး စစ်တပ်ထံ TNLA ပြန်လွှဲအပ်ခဲ့သည့် မိုးမိတ်မြို့နယ်နှင့် ဆက်စပ်နေသည်။

လက်ရှိတွင် အတုအယောင် ရွေးကောက်ပွဲမှတဆင့် ဖွဲ့စည်းထားသည့် စစ်အစိုးရနှင့် သျှမ်းပြည်အတွင်းရှိ တိုင်းရင်းသား လက်နက်ကိုင် တော်လှန်ရေးတပ်များ နေပြည်တော်တွင် ခပ်စိပ်စိပ် တွေ့ဆုံဆွေးနွေးလာခြင်းကြောင့် စစ်တပ်နှင့် တိုက်ပွဲဆက်လက် ဖြစ်ပွားနေသည့် KIA ထိန်းချုပ်နယ်မြေများတွင် စစ်ရေးအရ ဖိအားပေး တိုက်ခိုက်လာနိုင်ကြောင်း နိုင်ငံရေး၊ စစ်ရေးလေ့လာသူများက သုံးသပ်ပြောဆိုသည်။