သျှမ်းပြည် တောင်ပိုင်း မိုင်းရှူးမြို့တွင် စစ်ကော်မရှင်တပ်က ပြည်သူ့စစ်မှုထမ်းရန် ပေါ်တာဆွဲခံနေရဆိုသည့် သတင်းကြောင့် ဒေသခံများ စိုးရိမ်နေကြကြောင်း သတင်းရရှိသည်။
လက်ရှိ ဇူလိုင်လ နောက်ဆုံးပတ်အတွင်း မိုင်းရှူးမြို့တွင် စစ်ကော်မရှင်တပ်၏ ပြည်သူ့စစ်မှုထမ်း ကိစ္စနှင့် ပတ်သက်၍ အမည်စာရင်းတွင် ပါဝင်နေသူများအနေဖြင့် ပေါ်တာဆွဲ ဖမ်းဆီးခံနေရသည်ဆိုသည့် သတင်းကြောင့် ဒေသခံများ စိုးရိမ်နေကြရကြောင်း မိုင်းရှူးမြို့ဒေသခံ အသက် ၂၅ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ကျနော်လည်း အရင်ကတည်းက နာမည်စာရင်းတွေ ပါထားတော့ အနေအထိုင်၊ အသွားအလာ ကတော့ သတိထားရတယ်။သူတို့ ဆွဲတာ၊ မဆွဲဘူးဆိုတာမျိုးက ပြောလို့မရဘူး။ပေါ်တာဆွဲခံရရင် နောက်မှ ဖြေရှင်းဖို့ ဆိုတာမျိုးက မလွယ်ဘူးလေ။ဒီရက်ပိုင်း ပေါ်တာဆွဲမယ်တွေလည်း ကြားနေတော့ နည်းနည်းတော့ စိုးရိမ်ရတာပေါ့”ဟု မိုင်းရှူးမြို့ ဒေသခံ အသက် ၂၅ ဝန်းကျင် အမျိုးသားတစ်ဦးက ပြောသည်။
လက်ရှိတွင် မိုင်းရှူးမြို့၌ ပြည်သူ့စစ်မှုထမ်းရန် အမည်စာရင်းပါဝင်သူများကို စစ်ကော်မရှင်တပ်က ပေါ်တာဆွဲ ဖမ်းဆီးမှုများ ပြုလုပ်နေခြင်း မရှိသေးသော်လည်း အမည်စာရင်းပါဝင်သူများအကြား ပေါ်တာဆွဲခံရမည်ကို စိုးရိမ်မှုများ ရှိနေကြောင်း ၎င်းက ဆက်ပြောသည်။
စစ်တပ် အာဏာသိမ်းပြီးနောက် ပြည်သူ့စစ်မှုထမ်းဥပဒေကို ၂၀၂၄ ခုနှစ် ဖေဖော်ဝါရီလ ၁ ရက် တွင် အသက်သွင်းကာ သျှမ်းပြည်တောင်ပိုင်း အပါအဝင် မြန်မာတစ်နိုင်ငံလုံးတွင် ခရီးသွားလူငယ်များကို ပေါ်တာဆွဲခြင်း၊ နေအိမ်အတွင်း ဧည့်စာရင်းစစ်ကာ ဖမ်းဆီးခြင်း၊ စစ်မှုထမ်းရန် မဲနှိုက်ရွေးချယ်ခြင်း စသည့် အကြောင်းအမျိုးမျိုးပြကာ ပေါ်တာဆွဲဖမ်းဆီးခြင်းများ ရှိနေသည်။
လက်ရှိ မိုင်းရှူးမြို့နယ်တွင် စစ်ကော်မရှင်တပ်အပြင် ရှမ်းပြည် တိုးတက်ရေးပါတီ/ ရှမ်းပြည်တပ်မတော် (SSPP/SSA) တပ်ဖွဲ့တို့ သွားလာလှုပ်ရှားမှုရှိသည်။
Leave a Comments