စစ်ကော်မရှင်တပ်ဖွဲ့ဝင်များသည် ယခုရက်ပိုင်း လူမြင်ကွင်းတွင် ပေါ်တင် ပေါ်တာဆွဲမှု ပြုလုပ်လာသဖြင့် သျှမ်းပြည်တောင်ပိုင်း လူငယ်များလည်း အသွားအလာ သတိရှိရှိ နေရကြောင်း သတင်းရရှိသည်။

ယခုရက်ပိုင်း အောင်ပန်းမြို့တွင် ပေါ်တာဆွဲမှုများရှိနေသဖြင့် လူငယ်များသည် နေ့လည်ပိုင်းတွင် အပြင်ကို သတိဖြင့်သွားလာရပြီး ညနေပိုင်းတွင် အပြင်ထွက်ရန်ပင် စိုးရိမ်နေကြကြောင်း အသက် ၂၅ ဝန်းကျင်ရှိ အောင်ပန်းမြို့တွင်နေထိုင်သည့် လူငယ်တဉီးက သျှမ်းသံတော်ဆင့်ကို ပြောသည်။

“အခု ညနေလောက်ဆိုရင် အပြင်သွားရင် သတိနဲ့သွားနေရတယ်။ညဆိုရင်လည်း သိပ်မထွက်ရဲဘူး။ ပေါ်တာဆွဲတာက ပေါ်တင်ဖြစ်နေတယ်။အိမ်ပတ်ဝန်းကျင်လောက်ပဲသွားတော့တယ်။ ညဆိုရင် အဝေးကြီးသွားတာ ဆိုင်ထိုင်တာ မလုပ်ရဲဘူး” ဟု ၎င်းလူငယ်က ဆိုသည်။

ယခုရက်ပိုင်း မြို့ကြီးများတွင် နေ့ခင်း လူသွားလာများသည့် နေရာများတွင်လည်း အရပ်ဝတ်ဖြင့် ပေါ်တာဆွဲနေခြင်းရှိသကဲ့သို့ အချို့လည်း စစ်ကော်မရှင် တပ်သားဟန်ဆောင်ပြီး လူငယ်များကို ဖမ်းဆီးခြင်းပြုလုပ်နေကြောင်း တောင်ကြီးမြို့ ပေါ်တွင်နေထိုင်သည့် လူငယ်များကပြောသည်။

“ရန်ကုန်လို မြို့ကြီးမှာတောင် နေ့လယ်ပိုင်း လူမြင်ကွင်းမှာ အရပ်ဝတ်နဲ့ ပေါ်တင်ဖမ်းနေတာ၊ နောက် တာချီလိတ်ဘက်မှာလည်း အရပ်ဝတ်နဲ့ စစ်သားဟန်ဆောင်ဖမ်းတာရှိတယ်လေ။ ဒီသတင်းတွေကြောင်း အခု အပြင်သွားရမှာ ခပ်လန့်လန့်ပဲ” ဟု တောင်ကြီးမြို့နေ လူငယ်တဉီးက သျှမ်းသံတော်ဆင့်ကိုပြောသည်။

ထို့ကြောင့် ယခုနောက်ပိုင်း လူငယ်များကို ပေါ်တာဆွဲ ဖမ်းဆီးခြင်းကိစ္စသည် ကြိုတင် မသိရှိနိုင်ကြောင်း၊ အသွားအလာသတိရှိရန်နှင့် ကျောင်းသားများကိုလည်း ဖမ်းဆီးနေသည့်အတွက် လူငယ်များ ကျောင်းသွားရမည်ကို ကြောက်နေရကြောင်း ၎င်းက ဆိုပြန်သည်။

“ပေါ်တာဆွဲတာက ဘယ်လိုဆွဲမလဲ၊ ဘယ်လိုလာဖမ်းမလဲဆိုတာ မသိနိုင်တော့ သွားအလာ သတိနဲ့ပဲ နေနေရတာ။ကျောင်းသားမကလို့ ဘာပဲဖြစ်နေဖြစ်နေ ပေါ်တာက ဆွဲတာပဲ၊အရပ်ဝတ်နဲ့ ဆွဲတာမျိုးလည်း ရှိတယ်” ဟု ၎င်းက ဆိုသည်။

ယခုကဲ့သို့ ပေါ်တာဆွဲခံရမည်ကို စိုးရိမ်မှုများကြောင့် လူငယ်များအနေဖြင့် ညဘက်သွားလာမှုကို ကန့်သတ်လာကြပြီး မြို့တွင်းလူသွားလူလာများလည်း လျော့နည်းလာကြောင်း တောင်ကြီးမြို့နေ ဒေသခံများက ပြောသည်။

စစ်ကော်မရှင်တပ်သည် လက်ရှိ စစ်မှုထမ်းသင်တန်းအပတ်စဉ်တခုလျှင် လူငယ် ၅,၀၀၀ ခန့် ခေါ်ယူကြောင်း သိရသည်။

ဇူလိုင်လအတွင်း ဖွင့်လှစ်ရန် စီစဉ်ထားသည့် စစ်မှုထမ်းအပတ်စဉ် (၂၇) အတွက် လူအင်အား အချိန်မီ မစုဆောင်းနိုင်သဖြင့် သင်တန်းဖွင့်လှစ်ရက် နောက်ဆုတ်ခဲ့ရပြီး ဩဂုတ်လ ၃ ရက်မှသာ သင်တန်း ဖွင့်လှစ်နိုင်ခဲ့ကြောင်း သိရသည်။

ထို့ကြောင့် စစ်မှုထမ်းအပတ်စဉ် (၂၈) အတွက် လူအင်အားကို ကြိုတင်စုဆောင်းထားရန် နေပြည်တော် စစ်မှုထမ်းဆင့်ခေါ်ရေး ဗဟိုအဖွဲ့က သက်ဆိုင်ရာ ပြည်နယ်နှင့်တိုင်း၊ ခရိုင်၊ မြို့နယ် စစ်မှုထမ်းဆင့်ခေါ်ရေးအဖွဲ့များထံ ညွှန်ကြားထားပြီး ညွှန်ကြားချက်ကို မလိုက်နာပါက အရေးယူဆောင်ရွက်ရန်လည်း ညွှန်ကြားခဲ့ကြောင်း သိရသည်။

ပြည်သူ့စစ်မှုထမ်းသင်တန်း အမှတ်စဉ် (၂၈) သင်တန်းဖွင့်ပွဲများကို တိုင်းစစ်ဌာနချုပ်အသီးသီးရှိ သင်တန်းကျောင်းများတွင် ယမန်နေ့ (စက်တင်ဘာ ၇ ရက်က) ကျင်းပခဲ့ကြောင်း သိရသည်။