‘ဝ’ပြည်သွေးစည်းညီညွတ်ရေးတပ်မတော် (UWSP/UWSA) ဒုဥက္ကဋ္ဌ ဦးဆောင်သည့် ကိုယ်စားလှယ်အဖွဲ့နှင့် စစ်အစိုးရ၏ NSPNC ကိုယ်စားလှယ်တို့ မူးယစ်ဆေးဝါးနှင့် ကျားဖြန့်တိုက်ဖျက်ရေးအတွက် ဒုတိယအကြိမ် တွေ့ဆုံဆွေးနွေးခဲ့ကြကြောင်း စုံစမ်းသိရသည်။

ယမန်နေ့ (ဩဂုတ်လ ၃ ရက်) နှင့် ယနေ့ (ဩဂုတ်လ ၄ ရက်) တို့တွင် နေပြည်တော်ရှိ Horizon Lake View ဟိုတယ်၌ ‘ဝ’တပ်ဖွဲ့ UWSA ထိပ်ပိုင်းခေါင်းဆောင်များနှင့် စစ်အစိုးရလက်အောက်ခံ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC ကိုယ်စားလှယ်တို့ နှစ်ရက်တာ ထပ်မံ တွေ့ဆုံဆွေးနွေးခဲ့ကြသည်။

“ဟုတ်ပါတယ် မနေ့က NSPNC နဲ့ ကျနော်တို့ တွေ့ဆုံဆွေးနွေးမှုတွေ လုပ်ခဲ့ပါတယ်။ ၃ ရက်နေ့နဲ့ ၄ ရက်နေ့ ဒီကနေ့တော့ ပြီးပါပြီ” ဟု နှစ်ရက်တာ တွေ့ဆုံဆွေးနွေးမှုအတွင်း ပါဝင်ခဲ့သည့် UWSA လားရှိုးဆက်ဆံရေးရုံး တာဝန်ခံ ဦးညီရန်းက သျှမ်းသံတော်ဆင့်ကို ပြောသည်။

အဆိုပါ တွေ့ဆုံပွဲသို့ စစ်အစိုးရ လက်အောက်ခံ NSPNC ဥက္ကဋ္ဌ ဒုဗိုလ်ချုပ်ကြီး ရာပြည့်၊ အတွင်းရေးမှူး ဒုဗိုလ်ချုပ်ကြီး မင်းနိုင်နှင့် ညှိနှိုင်းရေးကော်မတီဝင်များ တက်ရောက်ခဲ့ကြပြီး ဒုတိယအကြိမ် တွေ့ဆုံဆွေးနွေးပွဲတွင် UWSP နှင့် ပိုမိုကောင်းမွန်သည့် နိုင်ငံရေး အခင်းအကျင်းများ ရရှိလာရေး အသေးစိတ် ဆက်ဆွေးနွေးစေလိုကြောင်း ဒုဗိုလ်ချုပ်ကြီး ရာပြည့်က ပြောကြားခဲ့သည်။

အလားတူ UWSP ဘက်မှ ဒုဥက္ကဋ္ဌ ဦးကျောက်ကော်အန်း၊ ဒုအထွေထွေအတွင်းရေးမှူးချုပ် ပေါက်အိုက်ခမ်း၊ ၁၇၁ စစ်ဒေသ နိုင်ငံရေးမှူး ဦးထင်ဆမ်ရုန်း၊ တပ်မဟာ ၄၈၅ တပ်မဟာမှူး ဦးပေါက်ကျွင်းလုံ၊ တပ်မဟာ ၄၆၈ နိုင်ငံရေးမှူး ဦးကျောက်ရှောက်ဖူ၊ လားရှိုးဆက်ဆံရေးရုံး တာဝန်ခံ ဦးကျောက်ညီရန်းတို့ ပါဝင်သည့် ကိုယ်စားလှယ်များ တက်ရောက်ခဲ့သည်။

“အဓိကတော့ ကျနော်တို့ ယုံကြည်မှု ပိုမိုတည်ဆောက်ရေးရယ်၊ ဒေသတွင်း ကျန်းမာရေး၊ ပညာရေး၊ စိုက်ပျိုးမွေးမြူရေး၊ လမ်းပန်းဆက်သွယ်ရေးတွေအတွက် ဆွေးနွေးခဲ့တာ ရှိပါတယ်။ နောက်ပြီး ဒေသအတွင်းမှာ ရှိနေတဲ့ မူးယစ်ဆေးဝါး ပြီးတော့ အွန်လိုင်းလိမ်လည်မှုတွေ တိုက်ဖျက်ဖို့ အဲ့တာတွေလည်း အဓိက ဆွေးနွေးဖြစ်ပါတယ်” ဟု UWSA လားရှိုးဆက်ဆံရေးရုံး တာဝန်ခံ ဦးညီရန်းက သျှမ်းသံတော်ဆင့်ကို ဆက်ပြောသည်။

NSPNC နှင့် တွေ့ဆုံမှုအတွင်း UWSP ဒုဥက္ကဋ္ဌ ဦးကျောက်ကော်အန်းက အာဏာသိမ်းစစ်ခေါင်းဆောင် မင်းအောင်လှိုင် သမ္မတရာထူး တာဝန်ထမ်းဆောင်ခြင်းကို ဂုဏ်ပြုကြောင်း၊ ပြည်ထောင်စုမပြိုကွဲရေးကို စောင့်ထိန်းကာ ငြိမ်းချမ်းရေးနှင့် ဖွံ့ဖြိုးတိုးတက်ရေးအပေါ် ပူးပေါင်းဆောင်ရွက်နေကြောင်း ပြောကြားခဲ့သည်ဟု ယနေ့ထုတ် စစ်အစိုးရ မြန်မာ့အလင်း သတင်းစာတွင် ဖော်ပြသည်။

ထို့အပြင် စစ်အစိုးရ ရှေ့ဆက် ဆောင်ရွက်မည့် ငြိမ်းချမ်းရေး လုပ်ငန်းစဉ်ကို UWSA ဘက်က ထောက်ခံပြီး သဘောထားကွဲလွဲမှုများကို ဖြေရှင်းနိုင်ရန် လိုက်နာကျင့်သုံးနေကြောင်း၊ မူးယစ်ဆေးဝါးနှင့် အွန်လိုင်းလိမ်လည်မှု စသည့် ပြစ်မှုအမျိုးမျိုးကို ပြင်းပြင်းထန်ထန် တိုက်ဖျက်နှိမ်နှင်းသွားမည်ဖြစ်ကြောင်း ဆိုသည်။

UWSP ၏ နိုင်ငံရေးလိုလားချက်နှင့် ပတ်သက်၍ ၂၀၀၈ ဖွဲ့စည်းပုံအခြေခံဥပဒေပါ ပြဋ္ဌာန်းချက်များနှင့်အညီ ဆောင်ရွက်နိုင်မည့် အစီအမံများကို ဆွေးနွေးခဲ့ကြောင်း စစ်အစိုးရဘက်မှ ထုတ်ပြန်ခဲ့သော်လည်း အသေးစိတ်ကို ဖော်ပြခြင်း မရှိပေ။

နေပြည်တော်ရှိ စစ်အစိုးရထံ ‘ဝ’ပြည်နယ် ဖွဲ့စည်းပေးရန် UWSA တောင်းဆိုမှုကို နှစ်ဘက် ထပ်မံဆွေးနွေးခဲ့ခြင်းနှင့် ပတ်သက်ပြီး သျှမ်းသံတော်ဆင့်မှ UWSA လားရှိုးဆက်ဆံရေးရုံး တာဝန်ခံ ဦးညီရန်းထံ သဘောထား မှတ်ချက်ပေးနိုင်ရန် ဆက်လက်မေးမြန်းခဲ့သော်လည်း ပြန်လည်ဖြေကြားခြင်း မရှိခဲ့ပေ။

NSPNC နှင့် UWSP ကြား အမျိုးသားပြန်လည်သင့်မြတ်ရေး လုပ်ငန်းစဉ်တွင် ပိုမိုပါဝင်နိုင်သည့် ငြိမ်းချမ်းရေး လုပ်ငန်းစဉ်ဆိုင်ရာ မူဘောင်ကို ရှင်းပြပြီး ကျန်းမာရေး၊ ပညာရေး၊ စိုက်ပျိုးမွေးမြူရေးနှင့် ဒေသဖွံ့ဖြိုးရေး ကိစ္စများကို အပြန်အလှန် ဆွေးနွေးခဲ့ကြောင်း သိရသည်။

ပြီးခဲ့သည့် ဇွန်လ ၁၈ ရက်တွင် UWSA ထိန်းချုပ် ပန်ဆန်းမြို့သို့ NSPNC ကိုယ်စားလှယ်များ သွားရောက်ပြီး UWSP ထိပ်ပိုင်းခေါင်းဆောင်များနှင့် တွေ့ဆုံဆွေးနွေးမှုမှတဆင့် နေပြည်တော်သို့ UWSP ခေါင်းဆောင်များ သွားရောက် ဆွေးနွေးမှုအဆင့်ထိ ရောက်ရှိလာခဲ့သည်။

ထို့အပြင် ယနေ့(ဩဂုတ်လ ၄ ရက်)တွင် အာဏာသိမ်းသမ္မတ ဦးမင်းအောင်လှိုင်နှင့် UWSA ခေါင်းဆောင်များ တွေ့ဆုံခဲ့ပြီး UWSA ဘက်မှ ဒုဥက္ကဋ္ဌ ဦးကျောက်ကော်အန်း၊ ဒုအထွေထွေအတွင်းရေးမှူးချုပ် ဦးပေါက် အိုက်ခမ်း၊ ၁၇၁ စစ်ဒေသ နိုင်ငံရေးမှူး ဦးထင်ဆမ်ရုန်း(ခ)အားဖူ၊ တပ်မဟာ ၄၈၅ တပ်မဟာမှူး ဦးပေါက်ကျွင်းလုံ၊ တပ်မဟာ ၄၆၈ နိုင်ငံရေးမှူး ဦးကျောက်ရှောက်ဖူနှင့် စစ်အစိုးရဘက်မှ NSPNC ဥက္ကဋ္ဌ ဒုဗိုလ်ချုပ်ကြီးရာပြည့်၊ အတွင်းရေးမှူး ဒုဗိုလ်ချုပ်ကြီးမင်းနိုင်၊ စစ်ဘက်ဆိုင်ရာလုံခြုံရေးအရာရှိချုပ် ဒုဗိုလ်ချုပ်ကြီးကျော်ကိုထိုက်တို့ တက်ရောက်ခဲ့ကြောင်း သိရသည်။