သျှမ်းပြည်အရှေ့ပိုင်း ကျိုင်းတုံ-ပန်ဝိုင်-ဝိုင်လီဒေသရှိ လားဟူတိုင်းရင်းသားများ လူမှုစီးပွားဘဝ ဖွံ့ဖြိုးတိုးတက်ရေးနှင့် အာရေးဗီးကား ကော်ဖီစိုက်ပျိုးရေးတို့ကို ကူညီပံ့ပိုးပေးရန် NSPNC နှင့် လားဟူဒီမိုကရက်တစ်အစည်းအရုံး LDU ကိုယ်စားလှယ်တို့ တွေ့ဆုံဆွေးနွေးခဲ့ကြောင်း သတင်းသိရသည်။

ဇူလိုင်လ ၂၄ ရက် နံနက်ပိုင်းတွင် နေပြည်တော်ရှိ သင်္ဂဟဟိုတယ်၌ စစ်အစိုးရလက်အောက်ခံ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ NSPNC နှင့် NCA လက်မှတ်ရေးထိုးထားသည့် လားဟူဒီမိုကရက်တစ်အစည်းအရုံး LDU ကိုယ်စားလှယ်များ တွေ့ဆုံဆွေးနွေးခဲ့ကြသည်။

အဆိုပါ တွေ့ဆုံဆွေးနွေးပွဲသို့ NSPNC ဥက္ကဋ္ဌ ဒုဗိုလ်ချုပ်ကြီး ရာပြည့်၊ အတွင်းရေးမှူး ဒုဗိုလ်ချုပ်ကြီး မင်းနိုင် ဦးဆောင်သည့် ညှိနှိုင်းရေးကော်မတီဝင်များနှင့် LDU ဥက္ကဋ္ဌ ကျာဆော်လမွန်၊ ဒုဥက္ကဋ္ဌ ကျာဖူး၊ အထွေထွေအတွင်းရေးမှူး ကျာယာကုတ်၊ တွဲဖက်အတွင်းရေးမှူး ဖြစ်ကြသည့် နာဒေါရှာနှင့် နာမေသဇင်ဦးတို့ တက်ရောက်ခဲ့ကြောင်း သိရသည်။

LDU တပ်ဖွဲ့သည် 7 EAO Alliance မဟာမိတ်အဖွဲ့ဝင် ဖြစ်ခြင်းကြောင့် စုပေါင်းဆွေးနွေးပွဲများတွင်လည်း ဆွေးနွေးခဲ့ဖူးကြောင်း၊ တစ်ဖွဲ့ချင်း လိုလားချက်နှင့် အခက်အခဲများကို ဖြေရှင်းနိုင်ရန် ငြိမ်းချမ်းရေးအတွက် Bilateral ထပ်မံဆွေးနွေးခြင်းဖြစ်ကြောင်း၊ တိုင်းရင်းသားလက်နက်ကိုင် အဖွဲ့အစည်းများအနေဖြင့် NCA အပြင် မည်သည့်လမ်းကြောင်းနှင့်မဆို ထိတွေ့၍ ငြိမ်းချမ်းရေးလမ်းကို လျှောက်လှမ်း၍ရကြောင်း ဒုဗိုလ်ချုပ်ကြီး ရာပြည့်က ပြောကြားသည်။

LDU ဥက္ကဋ္ဌ ကျာဆော်လမွန်က စစ်အစိုးရ၏ လွတ်လပ်ပြီး ကြိုတင်ကန့်သတ်ချက် မထားသည့် ငြိမ်းချမ်းရေး ဖိတ်ခေါ်မှုကို ကြိုဆိုပါကြောင်း၊ ကြိုတင်ကန့်သတ်ချက် မထားသည့် ဆွေးနွေးပွဲများတွင် ဒေသလိုအပ်ချက်များကို ပွင့်ပွင့်လင်းလင်း ဆွေးနွေးမည်ဖြစ်ကြောင်း ပြောကြားခဲ့သည်ဟု စစ်အစိုးရလက်အောက်ခံ သတင်းစာများတွင် ဖော်ပြသည်။

NSPNC နှင့် LDU နှစ်ဘက်တွေ့ဆုံ ဆွေးနွေးမှုအတွင်း ကျိုင်းတုံ-ပန်ဝိုင်-ဝိုင်လီဒေသရှိ လားဟူတိုင်းရင်းသားများ၏ လူမှုစီးပွားဘဝဖွံ့ဖြိုးတိုးတက်ရေး၊ အာရေးဗီးကား ကော်ဖီစိုက်ပျိုးရေး၊ ကော်ဖီနည်းပညာ ပံ့ပိုးပေးမှုနှင့် မျိုးစေ့၊ သွင်းအားစုရရှိရေး၊ လမ်းပန်းဆက်သွယ်မှု အဆင်ပြေစေရေးနှင့် လျှပ်စစ်မီး၊ ရေရရှိရေး၊ မူးယစ်ဆေးဝါးနှင့် အွန်လိုင်းငွေလိမ် ကျားဖြန့်လုပ်ငန်းများတွင် ပါဝင်ပတ်သက်မှု မရှိစေရေး ကိစ္စရပ်များကို အပြန်အလှန် ဆွေးနွေးခဲ့ကြောင်း စစ်အစိုးရဘက်က ထုတ်ပြန်သည်။

ထို့အပြင် NSPNC အတွင်းရေးမှူး ဒုဗိုလ်ချုပ်ကြီး မင်းနိုင် က ဒေသဖွံ့ဖြိုးရေး၊ ပညာရေး၊ စိုက်ပျိုးရေးဆိုင်ရာ လုပ်ငန်းများနှင့် အဖွဲ့အစည်းဆိုင်ရာ ဆက်ဆံရေးရုံးအတွက် ဆွေးနွေးတင်ပြချက်များကို ပြန်လည်ရှင်းလင်းခဲ့ပြီး နှစ်ဖက်ဆွေးနွေးချက်များကို မှတ်တမ်းတင် လက်မှတ်ရေးထိုးခဲ့ကြောင်း သိရသည်။

လက်ရှိတွင် စစ်အစိုးရနှင့် ငြိမ်းချမ်းရေး တွေ့ဆုံဆွေးနွေးနေသည့် ကျာဆော်လမွန်၊ ကျာဖူးနှင့် ကျာယာကုပ် တို့ကို LDU ဗဟိုကော်မတီမှ ၂ဝ၂၂ ခုနှစ် ဇူလိုင်လ ၈ ရက်နေ့ကတည်းက လုပ်ငန်းတာဝန်နှင့် ရာထူးများမှ ရပ်စဲထားကြောင်း သိရသည်။

သို့သော် LDU အဖွဲ့အစည်းအမည်ကို ဆက်လက်သုံးစွဲကာ သီးခြားလုပ်ရှားမှုများ၊ စစ်ကောင်စီအသွင်ပြောင်း စစ်အစိုးရနှင့် အစည်းအဝေးများ တက်ရောက်ခြင်း၊ NCA ဆက်လက်စွဲကိုင်ထားသည့် အပစ်ရပ်အဖွဲ့များနှင့် အစည်းအဝေး တက်ရောက်ခြင်းတို့ကြောင့် LDU အဖွဲ့အဝင်း တရားဝင်မှုနှင့် ပတ်သက်၍ လားဟူခေါင်းဆောင်များနှင့် ပြည်သူများအကြား အငြင်းပွားမှု ဆက်ရှိနေသည်။