သျှမ်းပြည် မြောက်ပိုင်း လားရှိုးမြို့အတွင်း စစ်ကော်မရှင်တပ် ထိန်းချုပ်လာပြီးနောက်ပိုင်း ခိုးဆိုးလုယက်မှု နေ့စဉ်ဆက်တိုက်ဖြစ်လာပြီး၊ ဒေသခံများ ကိုယ်ထူကိုယ်ထ ဖမ်းဆီးနေရကြောင်း သတင်းရရှိသည်။

လက်ရှိတွင် လားရှိုးမြိုတွင် ခိုးဆိုးလုယက်မှုများ မကြာခဏ ဖြစ်ပွားနေသဖြင့် ဒေသခံများ အနေဖြင့် တယောက်ထဲ သွားလာရန် စိုးရိမ်နေရပြီး၊ ဒေသခံများကို ကိုယ်ထူကိုယ်ထ ဖမ်းဆီးမှုပြုလုပ်နေရကြောင်း လားရှိုးမြို့ အသက် ၅၀ ဝန်းကျင် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူခိုးရော လုယက်သူတွေရော အရမ်း များတယ်။ မိန်းကလေး တစ်ယောက်တည်း ဆိုင်ကယ်စီးမယ် ဆိုရင်တောင် အဝေးကြီး မသွားရဲဘူး။ အခုကသူခိုးတွေကိုလည်း ကိုယ့်ဟာကိုယ် ဖမ်းနေရတာ။ ဖမ်းမိရင်တောင် ရဲတွေက မရိုက်ရဘူးလို့ ပြောတယ်။ ရိုက်ရင်လည်း အရေးယူမယ်လို့လည်း ပြောနေတယ်။အွန်လိုင်းပေါ်လည်း မတင်နဲ့တဲ့”ဟု လားရှိုးမြို့ ဒေသခံအမျိုးသမီးတစ်ဦးက ပြောသည်။

လက်ရှိ သူခိုးများကို လူထုက ကိုယ်ထူကိုယ်ထ ဖမ်းဆီးလျှင်လည်း ဖမ်းဆီးခံရသူများအား ရိုက်နှက်ခြင်းမပြုရန် နှင့် ထိုသို့ပြုလုပ်ပါက အရေးယူမည်ဟု စစ်ကော်မရှင်လက်အောက်ခံ သက်ဆိုင်ရာ ရဲတပ်ဖွဲ့နှင့် အုပ်ချုပ်ရေးမှူးများက ပြောဆိုထားကြောင်း ဒေသခံများက ဆိုသည်။

ထို့အပြင် ဖြစ်စဉ်အကြောင်းအရာများကို၏ ဓာတ်ပုံနှင့် ဗီဒီယိုများကို အွန်လိုင်းပေါ်တွင် မဖြန့်ဝေရန်လည်း သက်ဆိုင်ရာ တာဝန်ရှိသူများက ပြောဆိုထားကြောင်း သိရသည်။

ထိုကဲ့သို့ သက်ဆိုင်ရာတာဝန်ရှိသူများ တားမြစ်ထားသော်လည်း မြို့တွင်း လုံခြုံရေးအခြေအနေများ အပေါ် ထိရောက်စွာ ကိုင်သွယ်ဖြေရှင်းနိုင်ခြင်းမရှိသည့် အတွက်ကြောင့် ဒေသခံများ စိုးရိမ်နေကြဆဲ ဖြစ်ကြောင်း ခိုးဆိုးလုယက်မှုများ လျော့နည်းစေရန် ထိရောက်သည့် လုံခြုံရေး ဆောင်ရွက်မှုများ လိုအပ်နေကြောင်း လားရှိုးမြို့ အသက် ၅၀ ဝန်းကျင် ဒေသခံ အမျိုးသမီးတစ်ဦးက ပြောသည်။

“မြို့ထဲကလည်း လုံခြုံရေးကို သေချာယူနိုင်လားဆို မယူနိုင်ဘူး။ သေသေချာချာ လုပ်နိုင်တာက ဦးထုပ်မဆောင်းတဲ့လူတွေကို ဖမ်းတာ အဲဒါပဲ ရှိတယ်။ အဲ့လို ဖမ်းတာတွေကို သေချာလုပ်သလို မြို့ထဲမှာ ခိုးဆိုး နေတာတွေကိုလည်း သေချာအရေးယူပေးရင် ကောင်းတာပေါ့” ဟု ၎င်းအမျိုးသမီးက ဆိုသည်။

ယမန်နေ့ (ဇူလိုင်လ ၃၀ ရက်) လားရှိုးမြို့ ရပ်ကွက် (၅) ၌ ပိုက်ဆံအိတ်ခိုးယူကာ ထွက်ပြေးသည့် အသက် ၃၀ ဝန်းကျင် အမျိုးသားတစ်ဦးကို ရပ်ကွက်နေပြည်သူများက ဝိုင်းဝန်းဖမ်းဆီးခဲ့ကြောင်း သိရသည်။

ထို့အပြင် ဇူလိုင်လ ၂၂ ရက်တွင် မူးယစ်ဆေး သုံးစွဲထားသည့် အမျိုးသားတဉီးသည် သေနတ်ဖြင့် လမ်းသွားလမ်းလာပြည်သူများကို ခြိမ်းခြောက်မှုများပြုလုပ်ခဲ့သည်။

လားရှိုးမြို့တွင် ခိုးဆိုးလုယက်မှုများ ဆက်လက်ဖြစ်ပွားနေသဖြင့် ဒေသခံများအနေဖြင့် မိမိတို့၏ လုံခြုံရေးကို ကိုယ်တိုင်ဂရုစိုက်နေရကြောင်းနှင့် မြို့တွင်း လုံခြုံရေးအခြေအနေ ပိုမိုကောင်းမွန်လာရန် မျှော်လင့်နေကြကြောင်း သိရသည်။