သျှမ်းပြည် မူဆယ်မြို့နယ် ၁၀၅ မိုင်ရှိ ညီနောင်မဟာမိတ်တပ် စစ်ဆေးရေးဂိတ်တွင် ကားရပ်မပေးသည့် ယာဉ်မောင်းအမျိုးသားတစ်ဦး သေနတ်ပစ်ခတ်ခံရ၍ ပွဲချင်းပြီး သေဆုံးသွားခဲ့ကြောင်း စုံစမ်းသိရသည်။

ယမန်နေ့ (ဩဂုတ်လ ၂၉ ရက်) နေ့လယ် ၁ နာရီကျော်တွင် မူဆယ်မြို့နှင့် ၁၀၅ မိုင် နယ်စပ်ကုန်သွယ်ရေးဇုန်ကြား နမ့်ပန်းရွာအနီးရှိ ညီနောင်မဟာမိတ်တပ် စစ်ဆေးရေးဂိတ်တွင် ရပ်မပေးသည့် ကားတစ်စီးကို ကိုးကန့်တပ်ဖွဲ့ MNDAA နှင့် အာရက္ခတပ်တော် AA တပ်သားများက သေနတ်ဖြင့် လိုက်လံပစ်ခတ်ခဲ့ရာ ယာဉ်မောင်းအမျိုးသားကို ကျည်ဆံထိမှန်ကာ ပွဲချင်းပြီး သေဆုံးသွားခဲ့ကြောင်း ဖြစ်စဉ်သိရှိသူများက ပြောသည်။

“ကားသမားက ဂိတ်မှာ မရပ်ပေးလို့ ညီနောင်တွေဘက်က သေနတ်နဲ့ လိုက်ပစ်တယ်လို့ ကြားတယ်။ တချို့ကလည်း အဲ့ကားသမားက ဂိတ်ကို ဝင်တိုက်သွားပြီး ထွက်ပြေးလို့ လိုက်ပစ်ခံရတယ်လို့ ပြောတယ်၊ နမ့်ပန်းလမ်းခွဲက MNDAA နဲ့ AA စောင့်တဲ့ဂိတ်မှာ ဖြစ်တာ။ ပစ်ခံရတဲ့ ကားသမားက တရုတ်၊ နာမည်က အားလီလို့ခေါ်တယ်” ဟု မူဆယ်-လားရှိုး ခရီးစဉ်ပြေးဆွဲနေသည့် ယာဉ်မောင်းတစ်ဦးက ပြောသည်။

ထိုသို့ သေနတ်ပစ်ခတ်ခံရပြီး သေဆုံးသွားသည့် ယာဉ်မောင်းအမျိုးသားသည် တရုတ်လူမျိုးဖြစ်ကြောင်း ဒေသခံများက ပြောဆိုသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ခြင်း မရှိသေးဘဲ ညီနောင်မဟာမိတ်တပ်ဘက်မှ ယခုဖြစ်ရပ်အပေါ် မည်သို့ အရေးယူဆောင်ရွက်မည်ကို ဆက်လက်စုံစမ်းနေသည်။

မူဆယ်မြို့နယ်အတွင်း ကုန်သွယ်ရေးအရ အရေးပါသည့် ပြည်ထောင်စုလမ်းမကြီး တလျှောက်တွင် ကိုးကန့်တပ်ဖွဲ့ MNDAA၊ အာရက္ခတပ်တော် AA၊ တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ နေရာယူ တပ်စွဲထားပြီး စစ်ဆေးရေးဂိတ်များ ဖွင့်လှစ်ထားကြောင်း ခရီးသွားများထံမှ သိရသည်။

အလားတူ ဩဂုတ်လ ၁၈ ရက်ကလည်း မူဆယ်-နမ့်ခမ်း လမ်းမကြီးပေါ် နမ့်လျှန်ကျေးရွာအနီးရှိ ကချင်လွတ်လပ်ရေးတပ် KIA စစ်ဆေးရေးဂိတ် ရှေ့တွင် သဲကားမောင်းလာသည့် အသက် ၃၂ နှစ်အရွယ် အမျိုးသားကို KIA တပ်သားက အကြောင်းမဲ့ သေနတ်ဖြင့် ပစ်ခတ်ခဲ့ကြောင်း မျက်မြင်တွေ့ရှိသည့် ကျေးရွာ ဒေသခံများက သျှမ်းသံတော်ဆင့်ကို ပြောသည်။

အဆိုပါ ပစ်ခတ်မှု ဖြစ်ပွားခဲ့ပြီးနောက် ထိခိုက်ဒဏ်ရာရသူမှာ မူဆယ်မြို့ရှိ ရွှေမူဆယ် ဆေးရုံတွင် သွားရောက်ဆေးကုသခဲ့ရပြီး ဒေသခံများက KIA စစ်ဆေးရေးဂိတ်ကို သွားရောက်ဖယ်ရှားခဲ့သော်လည်း ရက်ပိုင်းအကြာတွင် KIA ဘက်မှ မူလစစ်ဆေးရေးဂိတ် နေရာတွင် ပြန်လည်နေရာယူ တပ်စွဲထားကြောင်း သိရသည်။