သျှမ်းပြည် တောင်ပိုင်း မိုင်းရှူးမြို့နယ် စစ်ကော်မရှင်တပ်က အရပ်သား (၄)ဉီးကို ပေါ်တာဆွဲ ဖမ်းဆီဂသွားကြောင်း သတင်းရရှိသည်။
ယမန်နေ့ (ဇူလိုင်လ ၂၈ ရက်) မနက်ပိုင်းတွင် မိုင်းရှူးမြို့နယ် ပန်စွဲကျေးရွာအထွက် လမ်းပိုင်း၌ သွားလာနေသည့် အမျိုးသားအချို့ကို စစ်ကော်မရှင်၏ တပ်သားများက တားဆီးစစ်ဆေးပြီး ဖမ်းဆီးခေါ်ဆောင်သွားကြောင်း မိုင်းရှူးမြို့နေ ဖြစ်စဉ်ကို သိရှိသည့် လူငယ်တဉီးက သျှမ်းသံတော်ဆင့်ကိုပြောသည်။
“ကျနော် အသိတစ်ယောက်လည်း ပါသွားတယ်။သူ့က အသက် ၃၀ ဝန်းကျင်လောက်ပါ။ တွေ့သမျှအကုန် ဆွဲတာမျိုးတော့ မဟုတ်ဘူး။ လမ်းသွားနေတဲ့ လူတွေကို တားပြီးတော့ ဆွဲတာ။ ရုတ်ရုတ်သဲသဲကြီး မဖြစ်တော့ တချို့လည်း သိတောင် မသိလိုက်ဘူး။ အခု ပေါ်တာဆွဲဖမ်းဆီးမှုမှာ စစ်သား၊ ရဲနဲ့ ထွေအုပ်တွေလည်း ပါတယ်” ဟု ၎င်းဖြစ်စဉ်ကိုသိရှိသည့် အသက် ၂၀ အရွယ်ရှိ လူငယ်ကဆိုသည်။
ထို စစ်ကော်မရှင်၏ စစ်တပ်ဖမ်းဆီးသည့် ဉီးရေသည် အတိအကျ မသိရှိရသော်လည်း မျက်မြင်တွေ့ရှိသည့် စာရင်းအရ အမျိုးသား (၄)ဉီးရှိကြောင်း၊ ထိုသူများကို မည်သည့်နေရာသို့ ခေါ်ဆောင်သွားသည်ကို မသိရှိကြောင်း ၎င်းကပြောသည်။
“လက်ရှိ သိရသလောက်တော့ ၄ ယောက်ပါ။ခုထိတော့ ပြန်ရွေးပြီး လွတ်လာတယ်ဆိုတာမျိုးလည်း မကြားရသေးဘူး။ ညှိလို့မရတာလား ဘယ်လိုဖြစ်လဲ ဘယ်မှာဖမ်းဆီးထားလည်းဆိုတာကိုတော့ အတိအကျမသိရသေးဘူး”ဟု အထက်ပါ လူငယ်က ထပ်လောင်းပြောသည်။
ဒေသခံများ၏ ပြောကြားချက်အရ ယခုဖြစ်စဉ်သည် လမ်းသွားလာနေသူများကို တားဆီးစစ်ဆေးပြီး ဖမ်းဆီးခေါ်ဆောင်သွားခြင်းဖြစ်သဖြင့် ပြည်သူများအကြား သွားလာရေးနှင့် လုံခြုံရေးအပေါ် စိုးရိမ်မှုများ မြင့်တက်လာနေကြောင်း သိရသည်။
မိုင်းရှူးမြို့နယ်တွင် လွန်ခဲ့သည့် ၂ လခန့်မှစတင်၍ ပြည်သူ့စစ်မှုထမ်းရန် ရည်ရွယ်သည့် ပေါ်တာဆွဲဖမ်းဆီးမှုများ ဆက်တိုက်ရှိနေကြောင်း သိရသည်။
ထို့ပြင် (ဇူလိုင်လ ၂၂ ရက်)တွင် ဖမ်းဆီးထိန်းသိမ်းခံထားရသည့် လူငယ်အချို့ ထွက်ပြေးလွတ်မြောက်ခဲ့ပြီးနောက် ထပ်မံဖမ်းဆီးမှုများ ပြုလုပ်နေသည်ဟုလည်း ဒေသခံများက ဆိုသည်။
စစ်ကော်မရှင်တပ်သည်၂၀၂၄ ခုနှစ် ဖေဖော်ဝါရီလတွင် ပြည်သူ့စစ်မှုထမ်းဥပဒေကို အသက်သွင်းပြီးနောက် မြန်မာနိုင်ငံ ဒေသအချို့တွင် စစ်မှုထမ်းရန် ခေါ်ယူမှုများနှင့် ပေါ်တာဆွဲဖမ်းဆီးမှုများ ရှိနေကြောင်း သိရသည်။
Leave a Comments