သျှမ်းပြည်တောင်ပိုင်း ရွာငံမြို့နယ် ကျောက်ငှက်ကျေးရွာတွင် စစ်ကော်မရှင်တပ်က ဒေသခံများကို တွေ့သမျှ ဖမ်းဆီးရိုက်နှက်မှုပြုလုပ်သဖြင့် ထွက်ပြေးတိမ်းရှောင်နေရကြောင်း သတင်းရရှိသည်။

ပြီးခဲ့သည့် ဇူလိုင်လ (၂၂) ရက် နေ့လည်ပိုင်းတွင် ရွာငံမြို့နယ် ကျောက်ငှက်ကျေးရွာ အုပ်စု ဆင်ဆာပြားကျေးရွာ အနီးတွင် စစ်ကော်မရှင်တပ်နှင့် ဓနုပြည်သူ့ လွတ်မြောက်ရေးတပ်တော် (DPLA) တို့ကြား တိုက်ပွဲဖြစ်ပွားခဲ့သည်။

ထိုသို့ တိုက်ပွဲ ဖြစ်ပွားပြီးနောက် ဇူလိုင်လ (၂၄) ရက် မှ စပြီး ယနေ့ ဇူလိုင်လ ( ၂၇ ) နေ့အထိ စစ်ကော်မရှင်တပ်က အင်အားအလုံးရင်းဖြင့် ကျောက်ငှက်ကျေးရွာနှင့် ဆင်ဆာပြားကျေးရွာသို့ ဝင်ရောက် တပ်စွဲနေထိုင်နေကြသည်။

ထို့ပြင် ကျောက်ငှက်ကျေးရွာမှ ရွာသားများကို ဖမ်းဆီးရိုက်နှက်၍ ဘုန်းကြီးကျောင်းအတွင်းသို့ ပိတ်လှောင်ထား ရကြောင်း ထွက်ပြေးလာသည့် ဒေသခံ အမျိုးသမီး ကသျှမ်းသံတော်ဆင့်ကိုပြောသည်။

“ရွာသားတချို့က ထွက်ပြေးကုန်တယ်၊ ဖမ်းမိတဲ့ ရွာသားတွေကိုတော့ ရိုက်နှက်ပြီး ဘုန်းကြီးကျောင်း သိမ်ထဲမှာ ပိတ်လှောင်ထားတယ်၊ တချို့ကိုတော့ ဘယ်ခေါ်သွားလဲ မသိဘူး၊တရွာလုံး က ယောကျာ်းလေး အကုန်ပြေး လူငယ်တွေကို အကုန်ဖမ်း၊ အမျိုးသမီးတွေလည်း ဖမ်းပြီး ရိုက်နှက်ခံနေရတယ်၊ ရွာအခြေနေမကောင်းဘူး။”ဟု ၎င်းကပြောသည်။

စစ်ကော်မရှင်တပ် စစ်ကြောင်းသည် အင်အား (၃၀၀) နီးပါးဖြင့် ကျောက်ငှက်ကျေးရွာနှင့် ဆင်ဆာပြား ကျေးရွာသို့ ဝင်ရောက် စီးနင်းနေသောကြောင့် ဒေသခံများသည် ဘေးလွတ်ရာသို့ ထွက်ပြေးတိမ်းရှောင်နေရကြောင်း ၎င်းအမျိုးသမီး ပြောသည်။

အလားတူ ဆင်ဆာပြားကျေးရွာတွင်လည်း စစ်ကော်မရှင်တပ်က ရွာသူ၊ရွာသား များ နေအိမ်သို့ ဝင်ရောက် စီးနင်း ရှာဖွေခြင်း၊ ဖမ်းဆီးခြင်းများ ပြုလုပ်နေသောကြောင့် လုံခြုံမှု မရှိတော့ကြောင်း ဒေသခံများ၏ ပြောပြချက်အရ သိရသည။

ဆက်လက်ပြီး စစ်ကော်မရှင်တပ်နှင့် တော်လှန်ရေးတပ်တို့ကြား အပြန်အလှန် စစ်ရေးတင်းမာမှု ဖြစ်နေသဖြင့် တိုက်ပွဲများ ထပ်မံဖြစ်မည်ကို စိုးရိမ်သောကြောင့် အချို့ဒေသခံများလည်း ဘေးလွတ်ရာသို့ တိမ်းရှောင်နေကြသည်။

“ကြိုရှောင်ထားရင် ပိုပြီး အန္တရာယ်ကင်းမယ် ထင်လို့ ဘာမှမယူဘဲ ကလေးတွေခေါ်ပြီး ထွက်ပြေးလာခဲ့တယ်၊ စစ်သားတွေ ရွာထဲရောက်မှ ထွက်ရင် မရတော့ဘူး သူတို့က ပေးထွက်မှာ မဟုတ်လောက်ဘူး၊ နေစရာကတော့ အမျိုးအိမ်မှာ ခဏ နေတယ်။ ဒီလို အခြေနေ အချိန်ကြာကြီး ဖြစ်ရင် ဘယ်မှာ ရှောင်တိမ်းရမလဲတောင် မသိဘူး။” ဟု စစ်ဘေးရှောင်လာသူ အသက် (၄၀) ဝန်းကျင် အမျိုးသမီးက ပြောသည်။

စစ်ကော်မရှင်တပ်သားများက ကျောက်ငှက်ကျေးရွာနှင့် အုတ်တွင်းကျေးရွာမှ လူငယ်များကို ပေါ်တာဆွဲ ဖမ်းဆီးမှုများ ပြုလုပ်နေပြီး အချို့သော ရွာသားများကို စစ်ကြောင်းထဲသို့ ခေါ်၍ လူသားဒိုင်းအဖြစ် အသုံးပြုနေမှုများလည်း ရှိကြောင်း ၎င်းအမျိုးသမီးက ဆက်ပြောသည်။

ပြီးခဲ့သည့် ဇူလိုင်လ ၁၈ ရက် ညနေ (၃)နာရီအချိန်တွင် စစ်ကော်မရှင်တပ်သည် ကျောက်ငှက်ကျေးရွာ ဘက်သို့ စစ်ကြောင်းထိုးရာမှ တော်လှန်ရေးတပ်ဖွဲ့များနှင့် ထိတွေ့တိုက်ပွဲဖြစ်ပွားခဲ့သည်။

ထိုသို့ တိုက်ပွဲဖြစ်ပွားခဲ့ပြီးနောက် ဇူလိုင်လ (၁၉) ရက်နေ့တွင် စစ်ကော်မရှင်တပ်က အုတ်တွင်းကျေးရွာမှ ဒေသခံ (၈)ဦးခန့် ဖမ်းဆီးသွားခဲ့သည်။

ရွာငံမြို့နယ်အတွင် စစ်ကော်မရှင်တပ် ၊ စစ်ကော်မရှင်တပ် လက်အောက်ခံ ပျူစောထီးတပ်၊ ပအိုဝ်းပြည်သူ့စစ် (PNO) တပ်၊ဓနုအမျိုးသားလွတ်မြောက်ရေးတပ်ဦး DPLA/DPLF နှင့် ဓနုပြည်နယ် အမျိုးသားလွတ်မြောက်ရေးတပ်မတော် (DSNDA) တို့ သွားလာလှုပ်ရှားမှုရှိကြောင်း သိရသည်။