သျှမ်းပြည်တောင်ပိုင်း၊ ရွာငံမြို့နယ် မင်းပလောင်ကျေးရွာမှ နေရပ်ပြန် စစ်ဘေးရှောင်များသည် နေအိမ်များ ပြန်လည်မဆောက်နိုင်သေးပဲ မိုးကာတဲများဖြင့် နေထိုင်နေရကြောင်း သတင်းရရှိသည်။

မင်းပလောင်ကျေးရွာကို ပြီးခဲ့သည့် ၂၀၂၄ ခုနှစ် ဒီဇင်ဘာလ (၂၂)ရက်တွင် စစ်ကောင်စီမှ စစ်ကြောင်း ထိုးဝင်ရောက်ပြီး ရွာလုံးကျွတ်နေအိမ်များကို မီးရှို့ဖျက်ဆီးခဲ့သည်။

ထိုသို့ မီးရှို့ခံရသောကြောင့် မင်းပလောင် ကျေးရွာမှ စစ်ဘေးရှောင် (၅၀၀) ကျော် နီးစပ်ရာ ကျေးရွာများနှင့် တောတောင်ထဲသို့ ထွက်ပြေးတိမ်းရှောင်ခဲ့ရသည်မှာ တစ်နှစ်ကျော် ကြာမြင့်ခဲ့ပြီးနောက် ပြီးခဲ့သည့် ၂၀၂၆ ခုနှစ် မတ်လတွင် နေရပ်သို့ ပြန်လည် နေထိုင်ခဲ့ကြသည်။

“စစ်ဘေးရှောင်ရတာလဲ မလွယ်ဘူး သူများအိမ်မှာဆို ကြာရင် အိမ်ရှင်မျက်နှာကြည့်လာရတယ်၊ တောထဲမှာ ရှောင်ရင်လည်း အစားစာတွေ ခက်ခဲတယ် ဘာဖြစ်ဖြစ်ဆိုပြီး ရွာပဲ ပြန်လာနေလိုက်တယ်၊ ရွာက အိမ်တွေ မီးရှို့ခံရတော့ အိမ်တွေလည်း ပြန်မဆောက်နိုင်သေးဘူး မိုးကာတဲနဲ့ပဲ နေရတယ်။”ဟု မင်းပလောင်ဒေသခံ အမျိုးသမီးတစ်ဦးက ပြောသည်။

ကုန်ဈေးနှုန်းမြင့်တက်မှုနှင့် လမ်းပန်းဆက်သွယ်ရေး ခက်ခဲမှုကြောင့် နေအိမ်များ ပြန်လည်မပြုပြင်နိုင်သေးကြောင်းနှင့် နယ်မြေဒေသ တည်ငြိမ်မှုမရှိသောကြောင့် မီးထပ်ရှို့ခံရမည်ကို စိုးရိမ်သဖြင့် ပြန်လည် မဆောက်နိုင်သေးကြောင်း အဆိုပါ အမျိုးသမီးတစ်ဦးက ပြောသည်။

ထို့အပြင် စစ်ကော်မရှင်တပ်သည် ရနဲ ကျေးရွာအုပ်စုဘက်တွင် အင်အားအလုံးရင်းဖြင့် တပ်စွဲထားပြီး ဒေသခံများကို ဘုန်းကြီးကျောင်းအတွင်း စုဝေးခိုင်းပြီး စစ်ဆေးမေးမြန်းမှုများ လုပ်ဆောင်နေကြောင်း သိရသည်။

ဆက်လက်ပြီး မင်းပလောင်ကျေးရွာမှ စစ်ဘေးရှောင်ကလေးများသည် ယားနာရောဂါများ ဖြစ်ပွားနေသောကြောင့် ဆေးဝါးများ အကူညီလိုအပ်နေသည်ဟု ဒေသခံ အမျိုးသမီးတစ်ဦးက ပြောသည်။

“ကလေးတွေလည်း ယားနာရောဂါ ဖြစ်ပွားနေတာ ဆေးကလည်းမရှိဘူး တစ်ယောက်နဲ့ တစ်ယောက် ကူးစက်ပြီး အခုဆို ယားနာရောဂါက ဖြစ်တဲ့သူ များလာတယ်၊ နယ်မြေ မတည်ငြိမ်တော့ ကျန်းမာရေး ဆရာမလည်း မလာကြဘူး၊ ဆေးလည်း မရှိဘူး ၊ ဖြစ်နိုင်ရင် ဆေးဝါးတွေ ကူညီပေးစေချင်တယ်။”ဟု ဒေသခံ အမျိုးသမီးတစ်ဦးက ပြောသည်။

စစ်ကော်မရှင်တပ်သည် မင်းပလောင်ကျေးရွာဘက်တွင် နေ့စဉ် စစ်ကြောင်းထိုးမှုများ ပြုလုပ်နေပြီး တော်လှန်ရေးအင်အားစုတပ်နှင့် အခြေနေတင်းမာမှု ဖြစ်နေ၍ ကျောင်းဆရာ၊ ဆရာမ များလည်း မရောက်လာ၍ ကျောင်းပိတ်ထားရသည်ဟု အဆိုပါ အမျိုးသမီးက ပြောသည်။

ယခုလက်ရှိ ရွာငံမြို့နယ်တွင် စစ်ကော်မရှင်တပ်က အင်အားအလုံးရင်းဖြင့် ကျေးရွာများအတွင်း တပ်စွဲထားပြီး စစ်ကြောင်းထိုးမှုများ နေ့စဉ်ပြုလုပ်နေလျှက် ရှိသည်။

ပြီးခဲ့သည့် ဇူလိုင်လ နောက်ဆုံးပတ်မှစပြီး စစ်ကော်မရှင်တပ်သည် ရွာငံမြို့နယ် မြောက်ဘက်ပိုင်းတွင် စစ်အင်အား အလုံးအရင်းဖြင့်နေစဉ် စစ်ကြောင်းထိုးပြီး၊ ဓနုပြည်သူ့ လွတ်မြောက်ရေးတပ်တော် (DPLA)နှင့် ထိတွေ့တိုက်ပွဲ ဖြစ်ပွားခဲ့သည်။

ထို့နောက် ရွာငံမြို့ မြောက်ဘက်ကျေးရွာရှိ ဒေသခံ အမျိုးသား ၁၀ဉီး ကျော်ကို သြဂုတ် ၂ရက်တွင် စစ်တပ်က ဖမ်းဆီးခဲ့ပြီး တိုက်ပွဲရှေ့တန်း စစ်ကြောင်းသို့ ပို့ဆောင်ခြင်းနှင့် တပ်စွဲထားသည့် နေရာသို့ ခေါ်ဆောင်သွားခြင်းတို့ကို ပြုလုပ်ခဲ့သည်