သျှမ်းပြည်တောင်ပိုင်း တောင်ကြီးမြို့တွင် အိမ်မွေးခွေးနှင့် လမ်းဘေးခွေးများကို ပစ်မှတ်ထားပြီး အစာအဆိပ်ခတ် နေသည့် အုပ်စုများရှိနေကြောင်း စုံစမ်းသိရသည်။

တောင်ကြီးမြို့တွင် အိမ်မွေးခွေးနှင့် လမ်းဘေးခွေးများကို ပစ်မှတ်ထားပြီး ထမင်းကဲ့သို့သော အစားအစာများဖြင့် အဆိပ်ခတ်သည့် ဖြစ်စဉ်သည် နေ့စဉ်နှင့်အမျှ ဖြစ်လာကြောင်း၊ ထိုအဆိပ်ခတ်နေသည့် ပုံစံသည် တူညီမှုများရှိနေသဖြင့် ခွေးများကို ဉီးတည်ပြီး သတ်နေသည့် အုပ်စုများရှိနေသည်ဟု အိမ်မွေးခွေး ပိုင်ရှင်များက ပြောသည်။

“ဒီတောင်ကြီးမှာက အများအားဖြင့် ထမင်းနဲ့ အဆိပ်ခတ်တာများတယ်။ပြီးခဲ့တဲ့ နှစ်တွေကလည်း ဖြစ်တယ်။အိမ်မွေးခွေးတွေရော၊လမ်းဘေးခွေးတွေရော သေတာ။ ကျနော်အထင်တော့ သူခိုးတွေပါပဲ” ဟု ၎င်းက ဆိုသည်။

အိမ်မွေးခွေးနှင့် လမ်းဘေးခွေးများကြောင့် နေအိမ်ဝင်ရောက်ပြီးခိုးယူမည့်သူများက အစားအဆိပ်ခတ်ခြင်း ဖြစ်နိုင်ကြောင်း ၎င်းကပြောသည်။

ပြီးခဲ့သည့် တစ်ပတ်အတွင်းလည်း တောင်ကြီးမြို့ ၆ မိုင် အနီးနှင့် တောင်ကြီးမြို့ပေါ်ရှိ အိမ်မွေးခွေးများ အစာအဆိပ်ခတ်ခံရပြီး သေဆုံးသည့် ဖြစ်စဉ်များရှိခဲ့သည်။

ခွေးများသည် ညအချိန်တွင် မသင်္ကာဖွယ် လှုပ်ရှားမှုများရှိလျှင် ဟောင်လေ့ရှိသဖြင့် ခွေးများကို အဆိပ်ခတ်သတ်ဖြတ်မှုများသည် အိမ်ခြံဖောက်ထွင်းမှုများနှင့် ဆက်စပ်နိုင်ခြေရှိသည်ဟု ၎င်းက ပြောသည်။

“ ခွေးတွေတောင် မလုံခြုံတော့တဲ့ဘဝပါပဲ။ ခွေးတွေက ဟောင်တော့ သူခိုးတွေကလည်း မခိုးရ၊ နေအိမ်ဖောက်ထွင်းတာ မလုပ်ရတော့ အစာနဲ့အဆိပ်ခတ်လိုက်တာပဲ” ဟု တောင်ကြီးမြို့ ဒေသခံ အမျိုးသားတဉီးက ပြောသည်။

လက်ရှိတွင် အဆိုပါ ခွေးများ အဆိပ်ခတ်ခံရမှုနှင့် ဆက်စပ်ပြီး အိမ်ဖောက်ထွင်းမှု ဖြစ်စဉ်များကို အတည်ပြုနိုင်ခြင်း မရှိသေးသော်လည်း ခြံစောင့်ခွေးများ အဆိပ်ခတ်သတ်ဖြတ်ခံရမှုများကြောင့် အိမ်နှင့်ခြံဝင်းလုံခြုံရေးအတွက် စိုးရိမ်မှုများ ရှိလာကြောင်း သိရသည်။