သျှမ်းပြည် တောင်ပိုင်း တောင်ကြီးမြို့တွင် ယခုရက်ပိုင်း လိုင်စင်မဲ့ယာဉ်များကို ရှောင်တခင် ဖမ်းဆီးစစ်ဆေးမှုများ ပိုလုပ်လာကြောင်း သတင်းရရှိသည်။

ထို လိုင်စင်မဲ့ယာဉ်များကို ဖမ်းဆီးမှုကြောင့် မြို့နှင့်အနီးတဝိုက်ရှိ ကျေးရွာဒေသခံများအနေဖြင့် မြို့ပေါ်သို့ အခါကြီးရက်ကြီးများ နှင့် ဈေးနေ့များတွင် မြို့ပေါ်သို့ သွားလာခြင်း၊ အခြေခံစားသောက်ကုန်၊လူသုံးကုန်ပစ္စည်းများ ဝယ်ယူရာသူ အခက်အခဲများရှိနေကြောင်း ဟိုပုံးမြို့နယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ရွာမှာနေတဲ့လူတွေအတွက်တော့ အဖမ်းအဆီးများရင် သွားလာဖို့ ခက်ခဲတာပေါ့။အခါကြီးရက်ကြီးဆို မြို့ပေါ်တက်ပြီး ဈေးဝယ်တာ၊ ပစ္စည်းလာယူတာတွေ ရှိတယ်။တချို့ကလည်း ဆေးရုံရက်ချိန်းတို့ ၊ ဆေးခန်းတို့လာကြတာရှိတယ်လေ။ဖမ်းတာကလည်း လူသွားလာများတဲ့ရက်တွေဆိုတော့ တကယ်သွားဖို့ လိုတဲ့ လူတွေအတွက် အဆင်မပြေဘူး”ဟု ဟိုပုံးမြို့နယ် အမျိုးသားတစ်ဦးက ပြောသည်။

ထို့ပြင် ကျေးရွာများတွင် နေထိုင်သည့် ဒေသခံအများစုသည် တောင်ယာလုပ်ငန်းမှ ရရှိသည့် ဝင်ငွေဖြင့် သွားလာရေး အဆင်ပြေစေရန် လိုင်စင်မဲ့ယာဉ်များ ဝယ်ယူအသုံးပြုထားသူများ ရှိသော်လည်း ဖမ်းဆီးမှုများကြောင့် ယာဉ်သိမ်းဆည်းခံရခြင်း နှင့် ဒဏ်ငွေပေးဆောင်ရခြင်းများ ကြုံတွေ့ရမည်ကို စိုးရိမ်နေရကြောင်း ၎င်းက ဆက်ပြောသည်။

“တချို့က တောင်ယာလုပ်ပြီး ရတဲ့ပိုက်ဆံလေးနဲ့ အသွားအလာအဆင်ပြေအောင် စုပြီးဝယ်ထားတာ။ ဖမ်းဆီးကြမ်းရင် ဖမ်းထဲကနေ မထုတ်ကြတော့ဘူး သိမ်းထားကြတယ်။တချို့ရွာကလူတွေဆိုတော့ သိတဲ့အတိုင်းပဲလေ ယာဉ်စည်းကမ်း၊ လမ်းစည်းကမ်းကို သေချာမသိတာတွေလည်း ရှိတာကတော့ ရှိတာပေါ့”ဟု ဟိုပုံးမြို့နယ် ဒေသခံအမျိုးသားတစ်ဦးက ဆိုသည်။

လိုင်စင်မဲ့ယာဉ် ရောင်းချသူများကို သက်ဆိုင်ရာ ရဲအဖွဲ့အစည်းများက အရေးယူမှုများ ရှိနေသော်လည်း နောက်ဆုံးတွင် ထိခိုက်မှု အများဆုံးမှာ ပြည်သူ၊ ကျေးရွာဒေသခံများသာ ဖြစ်နေကြောင်း တောင်ကြီးမြို့ ဒေသခံအမျိုးသားတစ်ဦးက ထပ်မံထောက်ပြသည်။

“ရောင်းတဲ့လူလည်း ဖမ်းနေတာပဲ၊ ဖမ်းတဲ့လူကလည်း စီးနေတာပဲ။ တကယ်တော့ ရွာကလူတွေက ပိုခံရတာ။ဝယ်တုန်းကလည်း ငွေကုန်တယ်။ဝယ်ပြီးစီးတော့လည်း ရဲကို ဒဏ်ငွေပေးရတာတွေ ရှိတယ်။ အခုဆို သွားရင်လည်း သတိနဲ့သွား၊ လာရင်လည်း သတိနဲ့လာနေရတယ်။ ဖမ်းခံရရင် ကားသိမ်းတာ၊ မသိမ်းရင်လည်း ဒဏ်ငွေရိုက်တာတွေကို ကြောက်နေရတယ်” ဟု တောင်ကြီးမြို့ ဒေသခံအမျိုးသားတစ်ဦးက ပြောသည်။

လိုင်စင်မဲ့ယာဉ်များ နှင့် ပတ်သက်၍ ဥပဒေအရ အရေးယူဆောင်ရွက်ခြင်းကို နားလည်သော်လည်း နေ့စဉ် အသက်မွေးဝမ်းကျောင်း နှင့် မဖြစ်မနေသွားလာရသည့် ကျေးရွာဒေသခံများ၏ အခြေအနေကိုလည်း ထည့်သွင်းစဉ်းစားပေးစေလိုကြောင်း ၎င်းက ပြောသည်။

ပြီးခ့သည့် ဇွန်လ ၉ ရက် သျှမ်းပြည် လွှတ်တော် ဒုတိယပုံမှန်အစည်းအဝေးတွင် သျှမ်းပြည်အတွင်းရှိ လိုင်စင်မဲ့ မော်တော်ယာဉ် နှင့် မော်တော်ဆိုင်ကယ်များကို တရားဝင် မှတ်ပုံတင်ဆောင်ရွက်ပေးရန် မဖြစ်နိုင်ကြောင်း သျှမ်းပြည်အစိုးရအဖွဲ့ဝင် လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေး ဝန်ကြီးက ပြောကြားထားသည်။

ကုန်းလမ်း ပို့ဆောင်ရေးညွှန်ကြားမှုဦးစီးဌာနအနေဖြင့် တရားဝင်ခွင့်ပြုချက်ဖြင့် တင်သွင်းလာသည့် ယာဉ်များကိုသာ မှတ်ပုံတင်ဆောင်ရွက်ပေးနိုင်ပြီး တရားမဝင်ဝင်ရောက်လာသည့် လိုင်စင်မဲ့ယာဉ်များကို မှတ်ပုံတင်ပေး၍ မရကြောင်း ၎င်းက ရှင်းလင်းဖြေကြားခဲ့သည်။

ထို့ပြင် တရားမဝင် မော်တော်ယာဉ်နှင့် မော်တော်ဆိုင်ကယ်များ ဝင်ရောက်မှုကို ထိန်းချုပ်နိုင်ရန် ၂၀၂၃ ခုနှစ်မှ စတင်၍ လိုင်စင်မဲ့ မော်တော်ဆိုင်ကယ်များအား မှတ်ပုံတင်ဆောင်ရွက်ပေးခြင်းကို ရပ်ဆိုင်းထားကြောင်းလည်း သိရသည်။