သျှမ်းပြည်တောင်ပိုင်း၊ တောင်ကြီးမြို့ စိန်ပန်းရပ်ကွက်တွင် သက်လတ်ပိုင်းအရွယ် အမျိုးသားနှစ်ဦး အချင်းချင်းစကားများ ရန်ဖြစ်ရာမှ ဓားဖြင့်ထိုးသတ်မှုဖြစ်ပြီး အမျိုးသားတစ်ဦး သေဆုံးသွားကြောင်း သိရသည်။
ဖြစ်စဉ်မှာ ယမန်နေ့ ဇူလိုင်လ (၉)ရက်နေ့တွင် စိန်ပန်းရပ်ကွက် နှင်းဆီလမ်းထိပ် အရက်ဆိုင်တွင် သက်လတ်ပိုင်းအရွယ် ကိုထွန်းထွန်းနိုင်နှင့် ကိုထက်ပိုင်မှူး တို့ စကားများရန်ဖြစ်ကြပြီး ဓားဖြင့်ထိုးမှုကြောင့် ကိုထက်ပိုင်မှူး နေရာမှာတင် ပွဲချင်းပြီး သေဆုံးသွားကြောင်း သိရသည်။
“အရင်ကတည်းက အဲနှစ်ယောက်က သိပ်မတည့်ကြဘူး ဒါပေမဲ့ ခင်ကြတယ်၊ မနေ့က ဘယ်လို ဖြစ်ကြလဲ မသိဘူး ထက်ပိုင်မှူးက ဓားဒဏ်ရာ (၈)ချက်နဲ့ နေရာမှာတင် သေသွားတာ၊ တော်တော်ဆိုးတယ်။”ဟု ရပ်ကွက်နေ အမျိုးသားတစ်ဦးက ပြောသည်။
ယခုလက်ရှိတွင် ပြစ်မှုကျူးလွန်သူ ကိုထွန်းထွန်းနိုင်ကို တောင်ကြီးမြို့မ ရဲစခန်းတွင် ရာဇသတ်ကြီး ပုဒ်မ ၃၀၂ (လူသတ်မှု) ဖြင့် အမှုဖွင့် စစ်ဆေးနေကြောင်း ၎င်းအမျိုးသားက ဆက်ပြောသည်။
ထို့အပြင် တောင်ကြီးမြို့တွင် ပြန်ပေးဆွဲသတ်ဖြတ်မှုများနှင့် ခိုးဆိုးလုယက် လူကုန်ကူးမှုများ မကြာခဏ ကြားလာရသောကြောင့် မြို့ခံပြည်သူများနှင့် ခရီးသွားပြည်သူများ စိတ်လုံခြုံမှု ကင်းမဲ့ နေကြကြောင်း သိရသည်။
“တောင်ကြီးက အရင်လို မအေးချမ်းတော့ဘူး၊ လူသတ်မှုတွေလည်း မကြာခဏ ကြားလာရတယ် ခိုးဆိုးလုယက်မှုဆို မကြားချင်မှအဆုံး၊ ညဖက်တွေဆို အပြင်မထွက်ရဲဘူး လူပြတ်တဲ့လမ်းဆို မသွားရဲတော့ဘူး၊ စိတ်ရော လူရောမလုံခြုံတော့ဘူး၊ အရာရာသတိနဲ့ နေနေရတယ်။”ဟု မြို့ခံ အမျိုးသမီးတစ်ဦးက ပြောသည်။
ပြီးခဲ့သည့် ၂၀၂၅ ခုနှစ် ဒီဇင်ဘာလ (၂၄)ရက်နေ့တွင် တောင်ကြီးမြို့၊ ဘုရားဖြူရပ်ကွက်နေ၊ အထက (၄) တွင် Grade – 10 တက်ရောက်နေသည့် အသက် (၁၆)နှစ်အရွယ် မောင်အနဂ္ဂရဲထက် သည် နေအိမ်မှ ဆိုင်ကယ်ဖြင့် ထွက်သွားပြီးနောက် ပျောက်ဆုံးခဲ့ပြီး (၆)ရက်အကြာမှ အလောင်းပြန်တွေ့ရှိခဲ့သည်။
Leave a Comments