သျှမ်းပြည်တောင်ပိုင်း တောင်ကြီးမြို့တွင် Kpay ပြေစာအတုပြပြီး ‌ငွေလိမ်လည်ထုတ်ယူသူ များလာသဖြင့် ဈေးဆိုင်အချို့ အခက်တွေ့နေရကြောင်း သိရသည်။

ဖြစ်စဉ်မှာ ပြီးခဲ့သည့် ဇူလိုင်လ ၇ရက်တွင် တောင်ကြီးမြို့ ဘုရားဖြူရပ်ကွက်မှ ဈေးဆိုင်တွင် လူရှုပ်နေချိန်ကို အခွင့်ကောင်းယူကာ ငွေသွင်းပြေစာအတုများကို ဆိုင်ရှင်အားပြ၍ ငွေကျပ် သိန်း(၃၀) ထုတ်ယူသွားခဲ့ကြောင်းကိုယ်တိုင်ကြုံတွေ့ရသည့် ကုန်စုံဆိုင်ပိုင်ရှင်တစ်ဉီးက သျှမ်းသံတော်ဆင့်ကိုပြောသည်။

ထိုသို့ Kpay ပြေစာအတုများ အသုံးပြုလာသူ များလာသည်နှင့် ဆိုင်ရှင်များအနေဖြင့် ငွေအဝင်သေချာ ကြည့်ပြီးမှသာ လက်ခံသင့်ကြောင်းနှင့် ပြေစာအတုအစစ်များကို သေချာစီစစ်သင့်ကြောင့် ဆိုင်ရှင်အမျိုးသမီးတစ်ဦးက အကြံပြုထားသည်။

“ညနေဘက်ဆို ဆိုင်က လူတအားရှုပ်တာ၊ အဲချိန်ဆို ငွေထုတ်တဲ့သူတွေလာတယ် လူကရှုပ်နေတော့ အမရေ လွှဲလိုက်ပြီနော်ဆိုပြီး ပြေစာပြတော့ ကိုယ်လည်း မစစ်မိလိုက်ဘူး၊ အဲ့ဒါနဲ့ ငွေသား ကျပ်သိန်း (၃၀) ထုတ်ပေးလိုက်တာ၊ လူရှင်းပြီး စာရင်းပြစစ်တော့ ငွေက မရောက်နေဘူး၊ အရမ်းပြယာခတ်သွားတာ ဘာလုပ်လို့ ဘာကိုင်ရမှန်း မသိတော့ဘူး သင်ခန်းစာရတာပေါ့လေ။”ဟု ၎င်းကဆိုသည်။

အဆိုပါ Kpay ပြေစာအတုများကို AI နည်းပညာ အသုံးပြုပြီး လုပ်ယူ၍ ရကြောင်းနှင့် Kpay ကျားဖြန့်များ ပေါများလာသည့်အတွက် သေချာစီစစ်သင့်ကြောင်း ၎င်းအမျိုးသမီးက ထပ်လောင်း အသိပေးထားသည်။

အလားတူ ပင်းတယမြို့တွင်လည်း Kpay ပြေစာအတုဖြင့် လိမ်လည် ငွေထုတ်ယူခံရသောကြောင့် ငွေကျပ် ဆယ်သိန်း လိမ်လည်ခံရကြောင်း သိရသည်။

“သူတို့က ငွေလွှဲကြောင်း ပြေစာပြတယ်၊ ကိုယ့်ဘက်က ငွေက မဝင်လာသေးဘူး ကိုယ့်ဘက်က လိုင်းမကောင်းလို့ပဲ ထင်တာ သူတို့ကလည်း အရမ်းကြာတယ်။ ဘာညာနဲ့ ရန်လုပ်လာတော့ ပြေစာလည်း ပြပြီးဆိုတော့ ငွေထုတ်ပေးလိုက်တာ။ အဲဒါနဲ့ သေချာ ပြန်စစ်ကြည့်တော့ ငွေကမရောက်လာဘူး။ ဆယ်သိန်းအလိမ်ခံရမှန်း သိသွားတာ။”ဟု ပင်းတယမြို့ ဈေးသည် အမျိုးသမီးတစ်ဦးက ပြောသည်။

ထို့အပြင် ပစ္စည်းများဝယ်ယူရာတွင်လည်း ငွေပေးချေမှု မှတ်တမ်း ပြေစာအတုများ ပြ၍ ပစ္စည်းများလည်း လိမ်လည်ခံရဖူးကြောင်း အဆိုပါ အမျိုးသမီးတစ်ဦးက ပြောသည်။

Kpay ပြေစာအတုများသည် အစစ်နီးပါး တူအောင် ပြုလုပ်လာနေသောကြောင့် အထူးဂရုပြုသင့်ပြီး သက်ဆိုင်ရာ Kpay စင်တာများတွင်လည်း လေ့လာထားသင့်ကြောင်း ၎င်းအမျိုးသမီးက အကြံပြုထားသည်။

ယခုလက်ရှိ Kpay အက်ပလီကေးရှင်းမှာ အပြာရောင်နှင့် အနီရောင်ဟူ၍ နှစ်မျိုးရှိပြီး အပြာရောင် အက်ပလီကေးရှင်းမှာ မည်သူမဆို နေ့စဉ်အသုံးပြုလို့ရပြီး အနီရောင် အက်ပလီကေးရှင်းမှာ ငွေသွင်း ငွေထုတ်လုပ်သည့် ပွဲစားများသာ အသုံးပြုလို့ရကြောင်း သိရှိရသည်။