ကချင်ပြည် မိုးမောက်မြို့နယ်ရှိ စစ်ရှောင်များ စားနပ်ရိက္ခာလိုအပ်နေပြီး၊လေကြောင်းဖြင့် ဗုံးကြဲတိုက်ခိုက်မှုကို စိုးရိမ်နေရကြောင်း စုံစမ်းသိရသည်။
ကချင်ပြည်နယ် ကျောက်စခန်းကျေးရွာ မှ မိုးမောက်မြို့သို့ ဧပြီလ ပထမပတ်တွင် ထွက်ပြေးတိမ်းရှောင်လာသည့် စစ်ဘေးရှောင် ၂၀၀ ကျော်သည် စားနပ်ရိက္ခာများ လိုအပ်နေပြီး၊ စစ်ကောင်စီမှ လေကြောင်းဖြင့် ဗုံးကြဲ တိုက်ခိုက်မှုကြောင့် စိုးရိမ်နေရကြောင်း စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ခုချိန်ထိတော့ စစ်ဘေးရှောင်လာလည်း စိုးရိမ်နေရတယ်။စစ်ကောင်စီတွေ လေယာဉ်နဲ့ ဗုံးလာကြဲမှာကိုလည်း ကြောက်နေရတယ်။ အခုက စားနပ်ရိက္ခာတွေ လိုအပ် နေတာပေါ့။ ရက်ပိုင်းလောက်ပဲ လောက်မယ်။ ဆန်တွေ ဆီတွေလည်း အများကြီးမပါလာဘူး။ ကူညီတဲ့ အဖွဲ့အစည်းတွေလည်းမရှိဘူးလေ။”ဟု စစ်ဘေးရှောင် အမျိုးသမီးတစ်ဦးက ပြောသည်။
ကျောက်စခန်းကျေးရွာတွင် ပိတ်မိသူများလည်းရှိနေပြီး မြို့သို့ ထွက်ပြေး တိမ်ရှောင်လာသူများကိုလည်း လမ်းပိုင်းတွင် ဖမ်းစီးမှုများရှိနေကြောင်း စစ်ရှောင်ကူညီသူတစ်ဦးက သျှမ်းသံတော်ဆင့်ကို ပြောသည်.
“တချို့ ရွာမှာ ကျန်နေတဲ့ ဟာတွေလည်း လာချင်တာရှိတယ်။လမ်းမှာ ဖမ်းတာတွေရှိနေတော့ ကျနော်တို့လည်း ကူညီလို့မရဘူး သွားခေါ်လို့လည်း မရဘူ။ခက်ခဲတာပေါ့။ အခုက ပြေးနေလည်း တယောက်တစ်ပေါက် ပြေးနေ ကြတာပေါ့။ကျနော်ရွာက လူကို ဖမ်းခံရတာလည်း ၅ ယောက်ရှိတယ်။”ဟု စစ်ဘေးရှောင် ကူညီသူ အမျိုးသားတစ်ဦးက ပြောသည်။
ကျောက်စခန်းကျေးရွာတွင် စစ်ကောင်စီ နှင့် ကချင်လွတ်လပ်ရေးတပ်မတော်(KIA)တို့ တိုက်ပွဲဖြစ်ပွားမှုကြောင့် ဧပြီလ ပထမပတ်တွင် မိုးမောက်မြို့ ရှိ မန္တလေးစာသက်တိုက်၊နမ့်တင်းဘုန်းကြီးကျောင်းနှင့် စာသင်တိုက်တို့တွင် လာရောက် စစ်ရှောင်နေကြပြီး စစ်ဘေးရှောင် စုစုပေါင်း ၂၀၀ ကျော်နေကြောင်း သိရသည်။
ပြီးခဲ့သည့် ဧပြီလ ၂၄ ရက်တွင် မိုးမောက်မြို့ရှိ မန္တလေးစားသင်တိုက်တွင် စစ်ကောင်စီမှ လေကြောင်း ဖြင့် ဗုံးကြဲတိုက်ခိုက်ခဲ့ကြောင်း သိရသည်။
တိုက်ပွဲများကြေင့် ဗန်းမော်မြို့တွင် ထွက်ပြေးတိမ်းရှောင်လာသည့် ကျေးရွာများသည် ကျောက်စခန်း ကျေးရွာ အပြင် ကြံခင်း ၊ခါနန် ၊အလင်းကောင် ရပ်ကွက် နဲ့ မံပုံ စသည့်ကျေးရွာများသည် လက်ရှိတွင် ဗန်းမော်မြို့ သို့ ယာယီခိုလှုံနေကြကြောင်း သိရသည်။
Leave a Comments