သျှမ်းပြည် တောင်ပိုင်း မိုးဗြဲမြို့အနီးတွင် စစ်ကော်မရှင်တပ် နှင့် ၎င်း လက်အောက်ခံ ပအိုဝ်းပြည်သူ့စစ် PNO တို့က ကရင်နီတော်လှန်ရေးတပ်ပေါင်းစုရှိရာနေရာသို့ မြေပြင်ထိုးစစ်ဆင်မှုပြုလုပ်သဖြင့် တိုက်ပွဲ ပြင်းထန်နေကြောင်း သတင်းရရှိသည်။
ယခု ရက်တပတ်အတွင်း မိုးဗြဲမြို့ နှင့် နန်းမယ်ခုံမြို့ကြားတွင် စစ်ကော်မရှင်တပ်က မြေပြင် ထိုးစစ်ဆင်မှုကြောင့် ကရင်နီတော်လှန်ရေးတပ်ပေါင်းစုများ နှင့် နေ့စဉ်နီးပါး ထိတွေ့ တိုက်ပွဲများဖြစ်ပွားနေကြောင်း စစ်မြေပြင်တွင်လှုပ်ရှားနေသည့် သတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“နန်းမယ်ခုံဘက်မှာ တိုက်ပွဲတွေ ပြန်ဖြစ်နေတယ်။ အရင်ပတ်ကတည်းကဖြစ်တာပါ။ လက်နက်ကြီးတွေနဲ့ ရော လေကြောင်းတိုက်ခိုက်မှုတွေရော ရှိပါတယ်။ မနေ့ညကလည်း လေကြောင်း တိုက်ခိုက်မှုတွေရှိခဲ့တယ်။”ဟု ၎င်းက ဆိုသည်။
မိုးဗြဲမြို့ နှင့် နန်းမယ်ခုံမြို့သည် မိုင် ၂၀ ဝန်းကျင်ခန့်သာဝေးပြီး၊ မိုးဗြဲဒေသအတွင်းတွင် အမှတ်( ၁) အယ်လ်ဖာစစ်ဒေသ (မိုးဗြဲနယ်)၊ သျှမ်းပြည်တောင်ပိုင်း အမျိုးသားများ ကာကွယ်ရေးတပ် ( SSNDF /KNDF)၊ မိုးဗြဲပြည်သူ့ကာကွယ်ရေးတပ် (MBPDF) စသည့် တပ်ဖွဲ့များ လှုပ်ရှားလျက်ရှိသည်။
ယမန်နေ့ ( ဇွန်လ ၁၅ ရက်) ည ၁၁ နာရီဝန်းကျင်တွင် မိုးဗြဲမြို့ အရှေ့ခြမ်း ကောင်ဝှက်ကျေးရွာ အနီးကို စစ်ကောင်စီက လေကြောင်းဗုံးကြဲတိုက်ခိုက်ခဲ့ကြောင်း ၎င်းကပြောသည်။
မိုးဗြဲမြို့ နှင့် ဖယ်ခုံမြို့ကို စစ်ကော်မရှင်တပ်တို့က ပြန်လည်ထိန်းချုပ်ထားသော်လည်း အုပ်ချုပ်ရေး ယန္တရား လည်ပတ်နိုင်ခြင်း မရှိသည့်အပြင် မြို့အပြင်ရှိ ကျေးရွာအချို့နှင့် စစ်ရေးအရအရေးပါသည့် လမ်းပိုင်းကို ကရင်နီတော်လှန်ရေးတပ်ဖွဲ့တို့က ထိန်းချုပ်ထားသည်။
ထို့ကြောင့် စစ်ကောင်စီတပ်သည် ၎င်းတို့အတွက် အရေးပါသည့် မိုးဗြဲ-ဖယ်ခုံ လမ်းပိုင်းကို အပြည့်အဝ ပြန်လည် ထိန်းချုပ်နိုင်ရန်ဖိအားပေး ထိုးစစ်ဆင်တိုက်ခိုက်မှုများ ပြုလုပ်နေကြောင်း သိရသည်။ ။
ပြီးခဲ့သည့် မေလ အတွင်းကလည်း မိုးဗြဲမြို့ကို နေရပ်ပြန်လာသည့် စစ်ရှောင်များကို စစ်ကော်မရှင်တပ်က ရပ်ကွက်အတွင်းတွင် နေထိုင်ခွင့်မပြုဘဲ စစ်ကော်မရှင် သတ်မှတ်ထားသည့် ဘုန်ကြီးကျောင်း အတွင်းသာ နေထိုင်းစေပြီ သွားလာခွင့်များကို ကန့်သတ်ထားကြောင်း သိရသည်။
Leave a Comments