သျှမ်းပြည် မြောက်ပိုင်း  ကိုးကန့်တပ်ဖွဲ့ (MNDAA)ထိန်းချုပ်သည့် သန္နီမြို့နယ်တွင် စစ်အကြွင်းအကျန်ဗုံး ပေါက်ကွဲမှုဖြစ်ပွားပြီး ကလေး ၂ ဦးအပါအဝင် ၄ ဦး ထိခိုက်ဒဏ်ရာရရှိခဲ့ကြောင်း သတင်းရရှိသည်။

ယနေ့ (မေလ ၁၆ ရက်) မနက် ၈ နာရီကျော်အချိန် သိန္နီမြို့နယ် ပိန်းဆာကျေးရွာရှိ လယ်ယာတခုထဲတွင် “၁၀၂၇ စစ်ဆင်ရေး” ကာလအတွင်း ကျန်ရှိခဲ့သည့် စစ်လက်ကျန်ဗုံး ပေါက်ကွဲခဲ့သဖြင့် ကလေး နှစ်ဦး အပါအဝင် အမျိုးသား ၁ ဦး နှင့် အမျိုးသမီး ၁ ဦး စုစုပေါင်း ၄ ဦးထိခိုက်ဒဏ်ရာရရှိခဲ့ကြောင်း သိန္နီမြို့ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။ 

“ဗုံးကို လူကြီးတစ်ယောက်က သူတို့ရဲ့ လယ်ယာထဲကို ကောက်ယူလာခဲ့တာ။ ကလေးတွေက တွေ့ပြီး ဆော့ရာကနေ ‌ပေါက်ကွဲမှုဖြစ်သွားတာပါ။မိန်းကလေးငယ်တစ်ယောက်ကတော့ ပြင်းထန်တဲ့ ဒဏ်ရာရထားတယ်” ဟု သိန္နီမြို့ဒေသခံ အမျိုးသားတစ်ဦးက ပြောကြားခဲ့သည်။

အဆိုပါ ဗုံးပေါက်ကွဲမှုကြောင့် ထိခိုက်ဒဏ်ရာရရှိသူများသည်  သိန္နီမြို့ ပြည်သူ့ဆေးရုံတွင် ဆေးကုသမှုခံယူနေပြီး၊ ထိခိုက်ဒဏ်ရာပြင်းထန်သည့် ကလေးငယ်တစ်ဦးကို လောက်ကိုင်မြို့ ဆေးရုံသို့ ပို့ဆောင်ထားပြီး ခြေထောက်တစ်ဖက် ဆုံးရှုံးခဲ့ရကြောင်း သိရသည်။

ထိခိုက်သူများသည် အသက် ၄၁နှစ်အရွယ်ရှိ  ဦးကြာဝ၊ အသက် ၄၂နှစ်အရွယ်ရီိ ဒေါ်နာတီ နှင့် ကလေးဖြစ်သူ မသကိ ၇နှစ်အရွယ်ရှိ ဒေးဗစ် ဖြစ်ပြီး၊  ထိခိုက်မှုပြင်းထန်ပြီး ခြေထောက်ဖြတ်လိုက်ရသည့် သူသည် အသက် ၁၀နှစ်အရွယ်ရှိ  အက်စတာ ဖြစ်ကြောင်းသိရသည်။​

အလားတူ ပြီးခဲ့သည့် (မေလ ၁၁ ရက်)တွင်လည်း ကျောက်မဲမြို့နယ် ပန်ဟိုက်ကျေးရွာတွင် အမျိုးသားတစ်ဦး အာပီဂျီ အမျိုးအစား လက်နက်ကြီးကို ဝမ်ရေးအတွက် ပြန်လည်ရောင်းချရန် သယ်လာပြီး ဖြုတ်တပ် စမ်းသပ်ရာမှ ပေါက်ကွဲမှုဖြစ်ပွားကာ နေရာတွင်တင် ခြေထောက်နှစ်ဖက် နှင့် ဝမ်းဗိုက်ထိခိုက်ဒဏ်ရာ ပြင်းထန်ရရှိပြီး သေဆုံးသွားခဲ့ကြောင်း သိရသည်။

ထိုကြောင့် စစ်လက်နက်ကျန် ပစ္စည်းများနှင့် မြေမြှုပ်မိုင်းများတွေ့လျှင် မထိမကိုင်သင့်ကြောင်းနှင့် နေအိမ်သို့ မယူပြန်သင့်ကြောင်း အန္တရာယ်ရှိသဖြင့် သက်ဆိုင်ရာ တာဝန်ရှိသူ၏ သတိပေးချက်များကို လိုက်နာသင့်သည်။

သျှမ်းပြည်နယ်တွင် မြေမြှုပ်မိုင်းနှင့် စစ်လက်နက်ကျန် ပစ္စည်းများကြောင့် ၂၀၂၅ ခုနှစ်အတွင်း ထိခိုက်သေဆုံးသူ (၂၄၅)ဦးရှိခဲ့ပြီး တစ်နိုင်ငံလုံးအတိုင်းတာဖြင့် ၃၆ ရာခိုင်နူန်းရှိခဲ့ပြီး မြန်မာနိုင်ငံ၌ အများဆုံးထိခိုက်သေဆုံးသော ပြည်နည်တစ်ခုဖြစ်ကြောင်း UNICEF Myanmar မှထုတ်ပြန်ထားသည်။