သျှမ်းပြည် ဆီဆိုင်မြို့နယ် နမ့်တောင်းရွာတွင် တိုက်ပွဲဖြစ်ပွားခြင်းမရှိဘဲ စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်သဖြင့် စစ်ရှောင် ၃ဦး ထိခိုက်ဓစ်ရာရ ဒေသခံများထံမှ သိရသည်။

ဆီဆိုင်မြို့နယ် နမ့်တောင်းရွာထဲကို ယမန်နေ့ (ဧပြီလ ၂၅) ရက် ညနေပိုင်း ၄ နာရီဝန်းကျင်တွင် ဆီဆိုင်မြို့ စစ်ကောင်စီ ၏ ခြေမြန်တပ်ရင်း ခမရ ၄၂၃ တပ်ရင်းမှနေ၍ လက်နက်ကြီးဖြင့် ရမ်းသမ်းပစ်ခတ်ခဲ့သောကြောင့် စစ်ရှောင် ၃ ဦး ထိခိုက်ဒဏ်ရာရပြီး နေအိမ် ၂ လုံးအပါအဝင် ကား ၁ စီးနှင့် ထော်လာဂျီ ၁ စီး ထိခိုက်ပျက်စီးသွားကြောင်း နမ့်တောင်းရွာခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“မနေ့ညသူတို့လက်နက်ကြီးနဲ့ ပစ်လာတာ အိမ်ကော၊ အိမ်ခြံဝန်းထဲက ကားကော၊ ထော်လာဂျီကောထိတယ်။ အိမ်ထဲကလူတွေကတော့ ထိခိုက်ဒဏ်ရာရတာမရှိဘူး။ ဒါပေမဲ့ ရွာဘေးက ခြံလုပ်နေတဲ့ စစ်ဘေးရှောင်တွေတော့ ၃ ယောက်ထိတယ်။ အဲ့ထဲကလေး တစ်ယောက်ပါတယ်ပြောတယ်။ အခုသူတို့တွေကို တောင်ကြီးဆေးရုံပို့ ထားတယ်” ဟု ၎င်းကပြောသည်။

အလားတူ ဧပြီလ ၂၄ ရက်တွင်လည်း စစ်ကောင်စီ လက်နက်ကြီးဖြင့် ရမ်းသမ်းပစ်ခတ်ခဲ့သောကြောင့် နောင်ကျောကျေးရွာအုပ်စုအတွင်း နေထိုင်သူ အသက် ၆၆ နှစ်အရွယ် မွိုးကဲ့အား တောင်ယာသွားနေစဉ် လက်နက်ကြီးထိမှန်၍ ဒဏ်ရာအပြင်းအထန်ရရှိခဲ့သည်။

ဆီဆိုင်မြို့ကို မတ်လ ၂၅ ရက်မှစ၍ စစ်ကောင်စီက ပြန်လည်ထိန်းချုပ်ပြီးနောက် ဌာနဆိုင်ရာရုံးများ ပြန်လည်ပတ်နိုင်ရန်အတွက် ဧပြီလ ၂၄ ရက်က ဌာနဆိုင်ရာဝန်းထမ်းများအား နေရပ်ပြန်ခိုင်းခဲ့သည်ဟု သိရသည်။

ထို့နောက် အခြားကျေးရွာများတွင် ထွက်ပြေးတိမ်းရှောင်နေကြသည့် စစ်ဘေးရှောင်များကို ပြန်ခိုင်းမည်ဟု ဆီဆိုင်မြို့ဌာနဆိုင်ရာရုံးအဖွဲ့ဝင် တစ်ဦးကပြောသည်။

“ဌာနဆိုင်ရာတွေတော့ ပြန်ကိုပြန်ရတယ်။ ထူထောင်ရေးလုပ်ငန်းတွေ လုပ်ရဖို့။ ရေရရှိရေး၊ မီးလင်းရေး လုပ်ငန်းတွေ၊ ပျက်စီးသွားတဲ့အိမ်ခြေဦးရေ စာရင်းတွေကောက်ဖို့။ တောင်ကြီးကအင်ဂျင်နီယာတွေလည်း ပါတယ်။ ထူထောင်ရေးလုပ်ငန်းတွေ လုပ်ကြမယ်လို့ပြောတယ်” ဟု ဆီဆိုင်မြို့ဌာနဆိုင်ရာရုံးအဖွဲ့ဝင် တစ်ဦးကပြောသည်။

သို့သော် ဆီဆိုင်မြို့သည် စစ်ဇုန်ဖြစ်နေသည့်အပြင် တိုက်ပွဲကြား စစ်လက်နက်အကြွန်း အကျန်များလည်း ရှိနေသကဲ့သို့ ယခုလိုစစ်ကောင်စီမှလက်နက်ကြီးဖြင့် ရမ်းသမ်းပစ်ခတ်မှုပြုလုပ်နေသေးသောကြောင့် စစ်ဘေးရှောင်များအနေဖြင့် နေရပ်မပြန်သေးကြောင်း ဒေသခံများကပြောသည်။