သျှမ်းပြည် နမ္မတူမြို့တွင် တအာင်းအမျိုးသမီးအဖွဲ့အစည်း (TWO)မှ ဦးဆောင်ပြီး ပထမအကြိမ် တအာင်းအမျိုးသမီးဖိုရမ်ကို ၂၀၂၄ ခုနှစ် မတ်လ ၂၈ နှင့် ၂၉ ရက် နှစ်ရက်တိုင်တိုင် နမ္မတူမြို့တော်ခန်းမတွင် ကျင်းပပြုလုပ်ခဲ့သည်။

တအာင်း(ပလောင်) အမျိုးသားလွတ်မြောက်ရေးတပ်မတော် TNLA သိမ်းပိုက်ထိန်းချုပ်ထားသော နမ္မတူမြို့တွင် ကျင်းပသည့် ၎င်းဖိုရမ်သို့ နမ့်ဆန်၊ မန်တုံ၊ ကွတ်ခိုင်၊ မူဆယ်၊ နမ့်ခမ်း၊ ကျောက်မဲ၊ နမ္မတူနှင့် မိုးမိတ်မြို့နယ်ရှိ တအာင်းအရပ်ဘက် အဖွဲ့အစည်းများ၊ တအာင်းစာပေနှင့် ယဉ်ကျေးမှု ကော်မတီဝင်များ၊ ကျေးရွာအကြမ်းဖက်မှု လျှော့ချရေးကော်မတီဝင်များမှ အမျိုးသမီး ကိုယ်စားလှယ် စုစုပေါင်း (၁၄၆)ဦး တက်ရောက်ခဲ့ကြောင်း သိရသည်။

ထို့အပြင် တအာင်းအမျိုးသမီးအဖွဲ့သည် အမျိုးသမီးထုအား ကိုယ်စားပြုပြီး နိုင်ငံရေး ဦးဆောင်မှုနှင့် ဆုံးဖြတ်ချက်ချသည့် အခန်းကဏ္ဍတွင် အမျိုးသမီး ကိုယ်စားပြုပါဝင်မှု လျစ်လျူရှုခံနေရခြင်းကို ကန့်ကွက်ရှုတ်ချပြီး ကျား-မ တန်းတူရေး ရရှိလာရန်အတွက် ဖိုဝါဒ ကြီးစိုးမှုကို တော်လှန်တိုက်ထုတ်သွားမည်ဟုလည်း မတ်လ ၃၁ ရက် ထုတ်ပြန်ကြေညာချက်တွင် ရေးသားထားသည်။

နမ္မတူမြို့တွင် နှစ်ရက်တာ ကျင်းပပြုလုပ်ခဲ့သည့် တအာင်းအမျိုးသမီးဖိုရမ် ပြုလုပ်ရခြင်း ရည်ရွယ်ချက်နှင့် စစ်ရေးပဋိပက္ခအတွင်း တအာင်းအမျိုးသမီးများ ရင်ဆိုင်နေရသည့် အခက်အခဲ စိန်ခေါ်မှုများကို သျှမ်းသံတော်ဆင့်မှ စိုင်းခွမ်မိန်းက တအာင်းအမျိုးသမီးအဖွဲ့အစည်း (TWO) ပြောရေးဆိုခွင့်ရှိသူထံသို့ ဆက်သွယ်မေးမြန်းထားသည်။

မေး။ ။ တအာင်းအမျိုးသမီး ဖိုရမ် ကျင်းပရတဲ့ အဓိက ရည်ရွယ်ချက်ကို ပြောပြပေးပါ။

ဖြေ။ ။ ဖိုရမ်ပြုလုပ်ရခြင်း ရည်ရွယ်ချက်ကတော့ (၁) နိုင်ငံရေး အခန်းကဏ္ဍ အပါအဝင် ဆုံးဖြတ်ချက်ချတဲ့ အခန်းကဏ္ဍတိုင်းတွင် အမျိုးသမီးပါဝင်မှု ပိုမိုမြင့်မားလာစေရန်၊ (၂) တအာင်းဒေသ အသီးသီးမှာရှိတဲ့ အမျိုးသမီးတွေအပေါ် အန္တရာယ်ဖြစ်စေသည့် ဓလေ့ထုံးတမ်းများ ဖော်ထုတ်နိုင်ရန်နှင့် လျှော့ချနိုင်မည့် နည်းလမ်းများ ရှာဖွေနိုင်ရန်၊ (၃) တအာင်းဒေသ အသီးသီးရှိ အမျိုးသမီး အချင်းချင်းကြား ကွန်ရက်တည်ဆောက်နိုင်စေရန်
(၄) ဖိုရမ်ရလဒ်အပေါ် အခြေခံပြီး ကျား-မ ရေးရာ မူဝါဒ ရေးဆွဲသွားရန် ဒီဟာတွေ ဖြစ်ပါတယ်။

မေး။ ။ လက်ရှိနိုင်ငံရေး အခြေအနေအပေါ် အမျိုးသမီးတွေအတွက် စိန်ခေါ်မှုက ဘာတွေရှိမလဲ။

ဖြေ။ ။ လက်ရှိနိုင်ငံရေး အခြေအနေအရ အမျိုးသမီးများအတွက် လုံခြုံမှု မရှိနေခြင်း၊ အကြမ်းဖက်မှုများ ပိုမို ဖြစ်ပွားလာစေခြင်း ဒီဟာတွေ ဖြစ်လာပါတယ်။ အမျိုးသမီး အကြမ်းဖက်ခံရမှုများ ရှိနေသော်လည်း တိုင်ကြားရန်နေရာ အခက်အခဲ ရှိနေခြင်း၊ ခေတ္တနားခိုရာ စင်တာ လိုမျိုး ထားရှိပေးဖို့ အခက်အခဲရှိနေခြင်း ဒီလိုမျိုးတွေ ကြုံလာရပါတယ်။

တအာင်းအမျိုးသမီးများအပေါ် အန္တရာယ်ရှိနေတဲ့ ဓလေ့ထုံးတမ်းတွေ၊ ဥပမာ – အိမ်ထောင်မကျသေးဘဲ ကိုယ်ဝန်ရသည့် အမျိုးသမီးများကို ရွာပြင်ထုတ်ခြင်း၊ ခွဲခြားဆက်ဆံနေခြင်း စသဖြင့် များစွာ ရှိနေပါတယ်။

မေး။ ။ အခုဆိုရင် တအာင်းအမျိုးသမီးအဖွဲ့အနေနဲ့ တိုက်ပွဲကြားမှာ နေထိုင်ပြီး မြေပြင်က အချက်အလက်တွေကို ကောက်ယူစုဆောင်းနေတာ တွေ့ရတယ်။ ပြီးခဲ့တဲ့ ရက်ပိုင်းအတွင်းမှာပဲ နမ္မတူမြို့မှာ တအာင်းအမျိုးသမီးဖိုရမ်ကို ကျင်းပနိုင်ခဲ့တယ်၊ ဒီအပေါ်မှာ တအာင်းအမျိုးသမီးတွေ အနေနဲ့ ဘယ်လိုမျိုး အခက်အခဲတွေ၊ စိန်ခေါ်မှုတွေ ရှိနေလဲ။

ဖြေ။ ။ လုပ်ငန်းအကောင်အထည်ဖော်ရာမှာ စိန်ခေါ်မှု များစွာရှိတယ်။ ကွင်းဆင်းတဲ့အခါမှာ မြေမြှုပ်မိုင်းပေါက်ကွဲမှုတွေ၊ စစ်လက်နက် အကြွင်းအကျန်တွေကို စိုးရိမ်နေရတာတွေ ရှိမယ်။ လုံခြုံရေးအတွက် စိုးရိမ်နေရခြင်း၊ လမ်းပန်းဆက်သွယ်ရေး အပိုင်းမှာဆိုရင် သွားလာရေး အခက်အခဲ ရှိနေခြင်း၊ အင်တာနက် ဖုန်းလိုင်း ပျက်တောက်မှု မကြာခဏ ကြုံတွေ့နေရတာတွေ ဖြစ်တာပေါ့။

တစ်ဘက်မှာလည်း စစ်ကောင်စီက နမ့်ဆန်၊ မန်တုံနဲ့ နမ္မတူမြို့နယ်တွေကို စစ်အုပ်ချုပ်ရေး ကြေငြာတော့ မြေပြင်ဒေသ အခြေအနေက လုံးဝ လုံခြုံစိတ်ချရတဲ့ ပုံစံမျိုး မဟုတ်သေးတော့ သတိထားပြီး လုပ်ဆောင်နေရပါတယ်။

မေး။ ။ ဒေသအတွင်းမှာ ရှိတဲ့ အတူနေတိုင်းရင်းသားတွေ ငြိမ်းချမ်းစွာ အတူယှဉ်တွဲ နေထိုင်ရေးနဲ့ ပတ်သက်ပြီး တအာင်းအမျိုးသမီး အဖွဲ့အစည်းအနေနဲ့ ဘယ်လိုမျိုး လုပ်ဆောင်နေလဲ။

ဖြေ။ ။ တိုင်းရင်းသား အမျိုးသမီးအဖွဲ့အစည်းတွေနဲ့ ကွန်ယက်ချိတ်ဆက်ပြီး အတူတကွ ပူးပေါင်းဆောင်ရွက်မှု အပိုင်းတွေ လုပ်တာရှိသလို ဒေသအတွင်းမှာလည်း သင်တန်းတွေပေးတယ်။ ဒီသင်တန်းတွေကို လူမျိုးတိုင်း မည်သူမဆို တက်ရောက်ခွင့်ပေးထားတယ်။

မေး။ ။ လက်ရှိမှာ “၁၀၂၇ စစ်ဆင်ရေး”အတွင်း TNLA တပ်ဖွဲ့က မြို့တွေကို သိမ်းပိုက်လာနိုင်တယ်။ ဒီလိုမျိုး သိမ်းပိုက်နိုင်ခဲ့ပေမယ့် ဒီနေရာတွေမှာ လက်ရှိအချိန်ထိ အရပ်သားဦးဆောင်တဲ့ အုပ်ချုပ်မှုပုံစံမျိုး မလုပ်နိုင်သေးတာ၊ ဥပမာ- ကရင်နီမှာဆိုရင် IEC လိုမျိုးပေါ့။ အရပ်သားအစိုးရပုံစံ မကူးပြောင်းနိုင်သေးတဲ့ အပေါ်မှာ လက်ရှိနိုင်ငံရေးအပေါ် အရပ်သားအုပ်ချုပ်မှုပုံစံ ကူးပြောင်းနိုင်အောင် ဘယ်လိုမျိုး ဖိအားပေးသွားဖို့ရှိလဲ။

ဖြေ။ ။ ကျမတို့လည်း စောင့်ကြည့်နေဆဲ ဖြစ်ပါတယ်။ ကရင်နီနဲ့ သျှမ်းပြည်က မတူညီတာတွေ များတယ်။ သျှမ်းပြည်မှာ တိုင်းရင်းသား လက်နက်ကိုင် တော်လှန်ရေး အဖွဲ့အစည်း ERO လည်း များသလို တစ်ဘက်မှာလည်း စစ်ကောင်စီက စစ်အုပ်ချုပ်ရေး ပြန်ကြေငြာထားတော့ လုံခြုံရေး အခြေအနေက ဘယ်လိုရှိမလဲဆိုတာကို သေချာ မသိနိုင်သေးတော့ တိတိကျကျ အဖြေပေးရခက်ပါတယ်။ သို့သော်ငြားလည်း အရပ်သားဦးဆောင်တဲ့ အုပ်ချုပ်မှု အစိုးရပုံစံ ဖြစ်ပေါ်လာဖို့ ကျမတို့ တိုက်တွန်းသွားဖို့ ရှိနေပါတယ်။

မေး။ ။ အခုလို အချိန်ပေးပြီး ဖြေကြားပေးတဲ့အတွက် ကျေးဇူးတင်ပါတယ်။

ဖြေ။ ။ ဟုတ်ကဲ့။