သျှမ်းပြည် လောက်ကိုင်မြို့တွင် ကိုးကန့်တပ်ဖွဲ့ MNDAA က ပြစ်မှုကျူးလွန်သူ (၁၀) ဦးကို သေဒဏ်ပေးခဲ့ခြင်းနှင့် ပတ်သက်ပြီး ဥရောပသမဂ္ဂ (EU) က ဆန့်ကျင်ကန့်ကွက်ကြောင်း ထုတ်ပြန်လိုက်သည်။
ဧပြီလ ၂၄ ရက်တွင် လောက်ကိုင်မြို့၌ ပြစ်မှုကျူးလွန်သူ (၁၀) ဦးကို အများပြည်သူရှေ့မှောက် ကိုးကန့်တပ်ဖွဲ့ MNDAA က သေဒဏ်ချမှတ်ခဲ့ခြင်းကို ဥရောပသမဂ္ဂ က အပြင်းထန်ဆုံး ရှုတ်ချပြီး ဘယ်လိုအခြေအနေဖြစ်ဖြစ် သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံး (EU) က ဧပြီလ ၂၆ ရက်တွင် ထုတ်ပြန်သည်။
၎င်းထုတ်ပြန်ချက်ထဲတွင် သေဒဏ်သည် လူမဆန်သည့် ယုတ်ညံ့သော ပြစ်ဒဏ်ဖြစ်ပြီး လူ့ဂုဏ်သိက္ခာကို အဆုံးစွန်သော ငြင်းပယ်မှုကို ကိုယ်စားပြုကြောင်း ဖော်ပြထားပြီး ဖက်ဒရယ် ဒီမိုကရေစီ ရရှိရေးအတွက် နိုင်ငံတကာ စံနှုန်းများနှင့်အညီ တရားဥပဒေ စိုးမိုးရေးကို ထိန်းသိမ်းရန်လည်း ကိုးကန့်တပ်ဖွဲ့ MNDAA ကို တိုက်တွန်းထားသည်။
ထို့အပြင် “၁၀၂၇ စစ်ဆင်ရေး” ကာလအတွင်း တိုက်ပွဲပြင်းထန်နေသည့်ကြားက လောက်ကိုင်မြို့မှ ထွက်ပြေးလာရသည့် အရပ်သားများကို ကိုးကန့်တပ်ဖွဲ့ (MNDAA) က အဓမ္မ စစ်သားစုဆောင်းခြင်းသည် ဥပဒေနှင့်မညီသည့် လူ့အခွင့်အရေး ချိုးဖောက်မှုဖြစ်ကြောင်း နိုင်ငံတကာ လူ့အခွင့်အရေး စောင့်ကြည့်အဖွဲ့ HRW က ဒီဇင်ဘာ ၂၁ ရက်တွင် အစီရင်ခံစာ ထုတ်ပြန်ထားသည်။
အလားတူ ၂၀၂၂ ခုနှစ် ဇူလိုင်လ ၂၃ ရက်နေ့တွင် အာဏာသိမ်းစစ်ကောင်စီမှ ကိုဖြိုးဇေယျာသော်နှင့် ကိုဂျင်မီတို့ အပါအဝင် နိုင်ငံရေးအကျဉ်းသား (၄)ဦးကို မျက်ကွယ်သေဒဏ် ချမှတ်ခဲ့ပြီး ရက်စက်စွာ ကွပ်မျက်ခဲ့ခြင်းကြောင့် တရားဥပဒေစိုးမိုးရေးကို ပိုမိုပျက်ယွင်းစေခဲ့ကြောင်း ၂၀၂၂ ခုနှစ် အောက်တိုဘာ ၁၀ ရက်နေ့ကလည်း ဥရောပသမဂ္ဂရုံးမှ ထုတ်ပြန်ထားခဲ့သည်။
၂၀၂၁ ခုနှစ် ဖေဖော်ဝါရီ ၁ ရက် အာဏာသိမ်းပြီး နောက်ပိုင်းတွင် စစ်ခုံရုံးများမှ သေဒဏ်ချမှတ်ခံထားရသူ စုစုပေါင်း (၁၆၆) ဦး ရှိပြီး အကျဉ်းထောင်များတွင် ထိန်းသိမ်းခံနေရသူ (၁၂၃) ဦးနှင့် မျက်ကွယ်သေဒဏ် ချမှတ်ခံထားရသူ (၄၃) ဦးအထိ ရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ ဧပြီလ ၂၅ ရက် ထုတ်ပြန်ချက်အရ သိရသည်။
မြန်မာနိုင်ငံသည် ကမ္ဘာတဝှမ်းတွင် သေဒဏ်စီရင်မှု ပြုလုပ်သည့် နိုင်ငံပေါင်း (၁၈)နိုင်ငံအနက်မှ တစ်နိုင်ငံ ဖြစ်လာကြောင်း သိရသည်
