သျှမ်းပြည် သိန္နီမြို့နယ်တွင် ကိုးကန့်တပ်ဖွဲ့ MNDAA ဘက်မှ တပ်ဆုတ်ခွာမည်ဟု သတင်းထွက်ပေါ်နေကြောင်း စုံစမ်းသိရသည်။

ဇူလိုင်လ (၁၀) ရက် နံနက် (၁၁) နာရီခန့်တွင် သိန္နီမြို့ပေါ်နှင့် ပန်လော့ကျေးရွာဘက် တပ်စွဲထားသည့် MNDAA ကိုးကန့်တပ်သားများသည် သိန္နီ-လောက်ကိုင် လမ်းမကြီးပေါ်ရှိ စယ်အူကျေးရွာအုပ်စုဘက်သို့ အင်အားအလုံးအရင်းဖြင့် စစ်ရေးလှုပ်ရှားမှု ပြုလုပ်ခဲ့ခြင်းကြောင့် တပ်ဆုတ်ခွာမည်ဟု သတင်းထွက်ပေါ်နေကြောင်း သိန္နီဒေသခံများက ပြောသည်။

“၁၀ ရက်နေ့က ကိုးကန့်စစ်သားတွေ သေနတ်ပြင်ပြီး စယ်အူ စာသင်ကျောင်းမှာ သွားစုကြတာ။ အဲ့တာပြီးတော့ သိန္နီမြို့ပေါ်ကနေ MNDAA တဖြည်းဖြည်း တပ်ဆုတ်သွားမယ်၊ ပြီးရင် စစ်တပ် ပြန်ဝင်လာမယ်လို့ သတင်းထွက်လာတာ။ တချို့ကလည်း လားရှိုးမြို့ထဲ ရှော့တိုက်ဒုံး ကျကွဲပြီးတော့ သိန္နီက ရုံးတွေထဲမှာ မနေရဲလို့ မြို့ပြင်ဘက် ခနရှောင်နေတယ် ပြောတယ်” ဟု သိန္နီဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

MNDAA ဘက်မှ သိန္နီမြို့နယ်အတွင်း ဇူလိုင်လ (၁၀) ရက် တစ်ရက်တည်းတွင် ထိုသို့ စစ်ရေးလှုပ်ရှားခဲ့ပြီး ၎င်းနောက်ပိုင်းတွင် မူလအတိုင်း မြို့ပေါ်နေရာများ၌ ပြန်လည်နေရာယူ တပ်စွဲထားကြောင်း ဒေသခံများထံမှ သိရသည်။

ထို့အပြင် ဇူလိုင်လ ဒုတိယပတ်အတွင်း သိန္နီဒေသခံများကို အစည်းအဝေးခေါ်ယူပြီး MNDAA ဘက်မှ နှစ်ဝက်ရှင်းတမ်း ပြောကြားခဲ့ပြီး သိန္နီမြို့ကို နှစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA ဘက်မှ အုပ်ချုပ်ရေးလုပ်ငန်းများကို ပြည်သူထံ ပြန်လည်လွှဲအပ်ပြီး ၎င်းတို့က နောက်ကွယ်မှ စီမံခန့်ခွဲမည်ဟု ဒေသခံများကို စည်းရုံးနေကြောင်း ဆိုသည်။

“ကိုးကန့်စစ်သားကတော့ တပ်မဆုတ်ဘူးလို့ ပြောတာပေါ့၊ မြို့ပေါ်က အုပ်ချုပ်ရေးလုပ်ငန်းကို ပြည်သူဆီ လွှဲပေးပြီး သူတို့က အနောက်က ကူညီထောက်ပံ့ပေးမယ်လို့ ပြောတယ်။ မြို့ပေါ်က ရပ်ကွက်ရုံးတွေကို ပြည်သူတွေဆီ အပ်ပေးပြီး အုပ်ချုပ်ရေး ပြန်လည်ပတ်ခိုင်းမယ်။ အရင်နေ့ကတောင် အစည်းအဝေး ခေါ်ပြီး နှစ်ဝက်ရှင်းတမ်း လုပ်သေးတယ်၊ နောက်နှစ်ဝက်လည်း ဘာဆက်လုပ်မယ် ပြောသေးတယ်” ဟု အဆိုပါ သိန္နီဒေသခံ အမျိုးသားက ဆက်ပြောသည်။

သိန္နီမြို့ကို “၁၀၂၇ စစ်ဆင်ရေး” ပထမပိုင်း စတင်ခဲ့ချိန် ၂၀၂၃ စက်တင်ဘာလကုန်တွင် ကိုးကန့်တပ်ဖွဲ့ MNDAA က ချင်းရွှေဟော်မြို့နည်းတူ ပထမဆုံး ထိန်းချုပ်နိုင်ခဲ့သည့် မြို့ဖြစ်ပြီး မြို့ပေါ်ရပ်ကွက်များကို မူလ (၄) ရပ်ကွက်မှ (၆) ရပ်ကွက်အဖြစ် ပြောင်းလဲသတ်မှတ်ပြီး အုပ်ချုပ်ရေးယန္တရား လည်ပတ်နေသည်။

“လားရှိုးမြို့ထဲ ရှော့တိုက်ဒုံး ပစ်ခံရတာနဲ့ သိန္နီက ကိုးကန့် တပ်ဆုတ်မယ်လို့ သတင်းထွက်တာကလည်း အဲ့နယ်မြေကို ဘယ်သူ ထိန်းချုပ်ထားလဲဆိုတာ ပြချင်တာပဲ။ တရုတ်ကတော့ ဘယ်နည်းနဲ့ရရ စီးပွားရေး ပြန်စလို့ရအောင် လုပ်လာမယ်လို့ မြင်တယ်၊ အဓိကတော့ စစ်တပ်က တရုတ်နဲ့ ကုန်သွယ်ရေးလမ်းကြောင်းပေါ်က မြို့တွေကို ပြန်လိုချင်နေတာ” ဟု လားရှိုးမြို့နေ နိုင်ငံရေးလေ့လာသုံးသပ်သူတစ်ဦးက ပြောဆိုသည်။

လက်ရှိ သိန္နီမြို့နယ်တွင် ဇူလိုင်လဆန်းပိုင်းမှ စတင်ပြီး MNDAA လက်အောက်ရှိ အထူးဒေသ(၁) ရေပေးဝေရေးနှင့် လျှပ်စစ်စွမ်းအားကုမ္ပဏီမှ လျှပ်စစ်မီး (၂၄) နာရီ ဖြန့်ဖြူးပေးနေပြီး တရုတ်ရင်းနှီးမြှုပ်နှံသူများကို ဖိတ်ခေါ်ရန်နှင့် ကုန်ထုတ်လုပ်မှု လုပ်ငန်းများ လည်ပတ်နိုင်ရန် ရည်ရွယ်ကြောင်း ကိုးကန့်သတင်းကွန်ရက်မှ ထုတ်ပြန်ထားသည်။