သျှမ်းပြည်မြောက်ပိုင်းရှိ ကိုးကန့်တပ်ဖွဲ့ (MNDAA) သည် ၎င်းတို့၏ အုပ်ချုပ်ရေးနယ်မြေအတွင်း ကျေးရွာများအထိ ကွင်းဆင်း၍ မှတ်ပုံတင်ပြုလုပ်ပေးသည့် လုပ်ငန်းများကို အောင်မြင်စွာ ဆောင်ရွက်နိုင်ခဲ့ကြောင်း MNDAA သတင်းများကို ဖော်ပြနေသော The Kokang က ထုတ်ပြန်သည်။

ကိုးကန့်ခရိုင် အုပ်ချုပ်ရေးအဖွဲ့၏ ထုတ်ပြန်ချက်အရ ပြီးခဲ့သည့် လများအတွင်း ဒေသခံပြည်သူ ၆၂,၆၃၀ ဦးအား နိုင်ငံသားစိစစ်ရေးကတ် (မှတ်ပုံတင်) များနှင့် အိမ်ထောင်စုစာရင်း ၁၈,၃၅၆ အုပ်ကို ပြည်သူ့အကျိုးပြုလုပ်ငန်း တစ်ရပ်အဖြစ် ထုတ်ပေးနိုင်ခဲ့ကြောင်း သိရသည်။

သို့သော် လက်တွေ့မြေပြင်တွင် အဆိုပါ အချက်အလက်များကို အသုံးပြု၍ တပ်သားသစ်များ အတင်းအဓမ္မ စုဆောင်းနေကြောင်း ဒေသခံများက ပြောသည်။

MNDAA သည် ၎င်းတို့ ကောက်ယူထားသော အိမ်ထောင်စုစာရင်း အချက်အလက်များကို အခြေခံ၍ စနစ်တကျ လူစုဆောင်းနေခြင်းဖြစ်ပြီး အိမ်ထောင်စုတစုတွင် အမျိုးသား ၂ ဦးရှိလျှင် ၁ ဦး၊ အမျိုးသမီး ၂ ဦးရှိလျှင် ၁ ဦးနှုန်းဖြင့် မဖြစ်မနေ စစ်မှုထမ်းရန် ဖိအားပေးနေခြင်းဖြစ်ကြောင်း ပန်ဆိုင်းမြို့ခံ အမျိုးသားတစ်ဦးက ပြောသည်။

“စစ်သားမလုပ်ချင်လို့ ထွက်ပြေးတဲ့ မိသားစုတွေရှိတယ်။ ကျနော်ကိုယ်တိုင် မျက်မြင်တွေ့ခဲ့တာကတော့ ထွက်ပြေးသွားတဲ့သူတွေရဲ့ အိမ်တွေကို ကိုးကန့်တပ်က ချိတ်ပိတ်လိုက်တာပဲ” ဟု ၎င်းက သျှမ်းသံတော်ဆင့်ကို ပြောသည်။

ကျေးရွာအချို့တွင် လူငယ်အများစုမှာ အခြားသော တိုင်းရင်းသားလက်နက်ကိုင်အဖွဲ့များတွင် စစ်မှုထမ်းနေကြသဖြင့် အိမ်တွင် လူကြီးပိုင်းများသာ ကျန်ရှိတော့ကြောင်း ကျေးရွာသူကြီးများက ညှိနှိုင်းရလေ့ရှိသည်ဟု ဆိုသည်။

ပန်ဆိုင်းနှင့် မုံးကိုးဒေသများတွင် စစ်သားမလုပ်လိုလျှင် ဆယ်အိမ်မှူး၊ ရာအိမ်မှူး လုပ်ရသကဲ့သို့ မီးသတ်နှင့် စည်ပင်ဝန်ထမ်းကဲ့သို့သော အုပ်ချုပ်ရေးပိုင်းဆိုင်ရာ လုပ်ငန်းများတွင် မဖြစ်မနေ တာဝန်ထမ်းဆောင်ရကြောင်း ဒေသခံများက ပြောသည်။

အလားတူ မိုင်းရယ်မြို့နယ်အတွင်းရှိ ဟိုယ၊ လွယ်ငင်းနှင့် ကောင်းမောင် အပါအဝင် ကျေးရွာအုပ်စု ၂၀ ကျော်တွင် MNDAA က ကောက်ယူထားသည့် အိမ်ထောင်စုစာရင်းအတိုင်း တရွာလျှင် အနည်းဆုံး တဦး တပ်သားသစ်ပေးရန် MNDAA က ပြီးခဲ့သည့် မေလအတွင်း အမိန့်ထုတ်ပြန်ထားသည်။

သတ်မှတ်ရက်အတွင်း လူမပေးနိုင်သည့် ကျေးရွာအုပ်ချုပ်ရေးမှူးအချို့ကို ရိုက်နှက်ဖမ်းဆီးခြင်း ခံခဲ့ရသည်ဟု ဒေသခံများက ပြောသည်။

လက်ရှိတွင် MNDAA ထုတ်ပေးသော မှတ်ပုံတင်ရှိလျှင် တရုတ်နိုင်ငံ ဝမ်တိန်ဂိတ်မှတစ်ဆင့် တဘက်နိုင်ငံသို့ သွားရောက်အလုပ်လုပ်ကိုင်နိုင်သောကြောင့် တရုတ်-မြန်မာနယ်စပ် မုံးကိုးနှင့် ပန်ဆိုင်းဒေသများ၌ မှတ်ပုံတင်ပြုလုပ်လိုသူများဖြင့် ပြည့်နှက်နေသည်။

“လူတွေက အဲဒီအခွင့်အရေးကို လိုချင်လို့ သွားလုပြီး စာအုပ်လုပ်နေကြတာ။ ဒါပေမဲ့ အလကားတော့ မဟုတ်ဘူး။ တရုတ်ပွဲစားတွေကတစ်ဆင့် တစ်ယောက်ကို ယွမ် ၄,၀၀၀ ကနေ ၆,၀၀၀ ကျော် (မြန်မာကျပ်ငွေ ၂၅ သိန်းမှ ၃၈ သိန်းကျော်) အထိ ပေးနေရတယ်” ဟု ပန်ဆိုင်းဒေသခံ အမျိုးသားတစ်ဦးက ထပ်လောင်းပြောသည်။

အဆိုပါ ဖြစ်စဉ်များနှင့် ပတ်သက်၍ MNDAA ဘက်မှ တုံ့ပြန်ချက်ရရှိရန် သျှမ်းသံတော်ဆင့်က ဆက်သွယ်ခဲ့သော်လည်း ဆက်သွယ်၍ မရပေ။

MNDAA သည် ၎င်းတို့၏ အုပ်ချုပ်ရေးယန္တရားကို တရားဝင်မှုရှိစေရန်နှင့် စစ်အင်အားဖြည့်တင်းရန် ကြိုးပမ်းနေသော်လည်း မြင့်မားသော ကုန်ကျစရိတ်များနှင့် စစ်မှုထမ်းရမည့် စိုးရိမ်မှုများကြောင့် ဒေသခံပြည်သူများမှာ စားဝတ်နေရေးနှင့် လုံခြုံရေးကြားတွင် အခက်တွေ့နေကြရကြောင်း ဒေသခံများက ပြောသည်။