Wednesday, May 22, 2024

ငြိမ်းချမ်းသည့် ပအိုဝ်းဒေသကို PNLA ကဖျက်ဆီးလိုက်သဖြင့် လူမှုအဖွဲ့အစည်းပေါင်း (၁၉၄) ဖွဲ့ ကန့်ကွက်ရှုတ်ချ ထုတ်ပြန်ချက်အတု

Must read

ငြိမ်းချမ်းသည့် ပအိုဝ်းဒေသကို ပအိုဝ်းအမျိုးသားလွတ်မြောက်ရေးအဖွဲ့ PNLA/PNLO က အာဏာရှင်တိုက်ခိုက်ရန်အကြောင်းပြပြီး ဖျက်ဆီးလိုက်သဖြင့် လှုမှုအဖွဲ့အစည်းပေါင်း (၁၉၄) ဖွဲ့က ကန့်ကွတ်ရှုတ်ချကြောင်း ထုတ်ပြန်ချက်အတု ဖြန့်ချိနေသည်။

လူမှုကွန်ရက် Facebook ဖြစ်သည့် Pa-Oh ပအိုဝ်း Page မှ “လူမှုအဖွဲ့အစည်းများက ပအိုဝ်းအမျိုးသား လွတ်မြောက်အဖွဲ့ကို ပြင်းထန်စွာ ကန့်ကွက်ရှုတ်ချ” ဟု ဆိုကာ ထုတ်ပြန်ချက်စာတစ်စောင်နှင့်အတူ လူမှုအဖွဲ့အစည်းပေါင်း (၁၉၄) ၏ အမည်ကို ထည့်သွင်းရေးသားဖြန့်ချိထားလျက်ရှိသည်။

မူရင်းလင့် – https://archive.ph/p5JB9

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှု ပြလုပ်ခဲ့သည်။

PNLA/ PNLO အဖွဲ့ကို ကန့်ကွတ်ရှုတ်ချကြောင်း ထုတ်ပြန်ချက်တွင် ဖော်ပြခံရသည့် လူမှုအဖွဲ့အစည်းတစ်ခုဖြစ်သည့် ပအိုဝ်းလူငယ်အစည်းအရုံး Pa-O Youth Organization ထံသို့ သျှမ်းသံတော်ဆင့်က မေးမြန်းခဲ့ရာမှာ အဆိုပါထုတ်ပြန်ချက် မဟုတ်မမှန်ကြောင်း၊ လုပ်ကြံဖန်းတီး သတင်းတုဖြစ်ကြောင်း ပြောသည်။

ဖော်ပြထားသော ထုတ်ပြန်ချက်ထဲ၌ ပအိုဝ်းလူငယ်အစည်းအရုံး (PYO) အပါအဝင် တစ်နိုင်ငံလုံးသော လှုမှုအဖွဲ့အစည်းများ၏ အမည်များအား သဘောထားဆန္ဒ (လုံးဝ) တောင်းခံခြင်းမရှိပဲ အလွဲသုံးစားလုပ်ပြီး ယူသုံးထားသည်ဟု ဆိုသည်။

မူရင်းလင့် – https://shorturl.at/DEJLV

ထို့အတူ ရှမ်းအမျိုးသမီးရေးရာ ဆက်သွယ်လှုပ်ရှားဆောင်ရွက်ရေး အသင်း (SWAN) ကလည်း အဆိုပါထုတ်ပြန်ချက်စာစောင်နှင့်ပတ်သက်၍ မဟုတ်မမှန်၊ သတင်းတုဖြစ်ကြောင်း၊ တိုင်းရင်းသားအချင်းချင်းကြား သွေးခွဲအောင်လုပ်ဆောင်နေခြင်းဖြစ်ကြောင်း ပြောသည်။

“သတင်းတွေကို ချက်ချင်းမယုံဖို့၊ ပြည်သူတွေ အနေနဲ့ သတိကြီးကြီးရှိဖို့လိုအပ်တယ်။ အခုက လူထုအထင်မှားအောင် ၊ သွေးခွဲအောင်လုပ်နေတာ တိုင်းရင်းသားအချင်းချင်းကြားကို သွေးခွဲနေတဲ့သဘော၊ တော်လှန်ရေးအဖွဲ့နဲ့ လူမှု အဖွဲ့အစည်းကြားသွေးခွဲအောင်ပြုလုပ်နေတာပဲ” ဟု SWAN တာဝန်ရှိသူ တစ်ဦးက ပြောသည်။

ထို့အပြင် ဖော်ပြချက်ထဲ၌ မိမိသဘောထားဆန္ဒမပါပဲ အဖွဲ့အစည်းအမည်ဖော်ပြခံရသည့် သက်ဆိုင်ရာအဖွဲ့အစည်း၏ ပုဂ္ဂိုလ်အသီးသီးကလည်း အဆိုပါပိုစ့်အောက်မှာပင် “ကန့်ကွက်တဲ့အဖွဲ့ စာရင်းကငါတို့အဖွဲ့ပါနေတယ်၊ သိတောင်မသိ လိုက်ဘူး”၊ “ကိုယ့်အဖွဲ့တွေပါနေဦးမယ် ကြည့်ကြဦး၊ တွေ့ရာနံမည်တွေကောက်ထည့်ထားပုံရ တယ်” စသည့်ဖြင့် ဝေဖန်ထားသည်ကို တွေ့ရသည်။

ထို့ကြောင့် ပအိုဝ်းအမျိုးသားလွတ်မြောက်အဖွဲ့ PNLA/PNLO ကို ကန့်ကွတ်ရှုတ်ချကြောင်း ထုတ်ပြန်ချက်မှာ အတုဖြစ်ပြီး၊ အာဏာရှင်ကို ဆန့်ကျင်တော်လှန်နေသည့် အင်အားစုများနှင့် ပြည်သူများအကြား ယုံကြည်မှု လျော့ကျစေရန်၊ အထင်အမြင်လွဲမှားစေရန် ရည်ရွယ်လုပ်ဆောင်နေခြင်း ဖြစ်သည်။

ထိုနည်းတူ မတ်လပိုင်းတွင်လည်း ဆီဆိုင်မြို့နယ်နှင့် ဟိုပုံးမြို့နယ်ရှိ ကျေးရွာများကို PNLA မှ မီးရှို့ခဲ့ကြောင်း ဝန်ခံထားသည်ဟု ထုတ်ပြန်စာစောင်အတု ဖြန့်ချိခဲ့ဖူးသည်။ ယင်းထုတ်ပြန်စာစောင်အတုကို သျှမ်းသံတော်ဆင့်မှ စီစစ်ထားသည်၊ အောင်ကလင့်တစ်ခုကို နှိပ်ပါ။

ထုတ်ပြန်ချက်စာစောင်အတု- https://shorturl.at/chM15

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။

Leave a Comments

- Advertisement -spot_img

Latest article